2 Ma cyim nmajene Moisés, atzun jaꞌlo aya cxel ucꞌinte cye aj Israel, tuꞌn cypon max jlajxi nima Jordán tuj txꞌotxꞌ cxel nkꞌoꞌne cye. 3 Tcyakil txꞌotxꞌ jatum cbajel cybetine cxel nkꞌoꞌne cyeye, ic tzaꞌnx o txi ntziyane te Moisés. 4 Aju tmojonil cytxꞌotxꞌe ctzajel keꞌ max ttxaꞌn tzkij txꞌotxꞌ, tuꞌn tpon baj tuj tiwitz txꞌotxꞌ Líbano; ex tuꞌn ttzaj keꞌ jatum taꞌ nima Éufrates tucꞌix tcyakil cytxꞌotxꞌ aj Hetey, ex cpol baj ttzi Nintz Mar tuj telex kꞌij. 5 Mi aꞌl jun cbel tiꞌja tuꞌn tuj tcyakil kꞌij oc ttena twitz txꞌotxꞌ; akine chin tel tucꞌila ic tzaꞌn in tene tucꞌil Moisés; mlayx tzꞌel npaꞌn wibe tiꞌja ex mlay cyaj ncolina. 6 Tenx tipuna ex cyuwx tcꞌuꞌja. Aya cbel sipante cytxꞌotxꞌ ke xjal lu, aju cyetzbil xi ntziyane cye cyxeꞌchel. 7 Oꞌcx cxel nmaꞌne teya tuꞌn tten nimxix tipuna ex cyuwx tcꞌuꞌja, ex tuꞌn tjapun tuꞌna tcyakilju ley xi tkꞌoꞌn nmajene Moisés teya; japunx tuꞌna ex miꞌn tzꞌel tpaꞌn tiba tiꞌj, tuꞌntzun tel baꞌn tcyakilju cbantel tuꞌna. 8 Cucx yolina tiꞌj ju yol tzꞌiban tuj libro te nleye, ex ximana tiꞌj kꞌijl ex konicꞌan, tuꞌntzun tbinchanteya aju in tmaꞌn. Ka ma bant tuꞌna icju, tcyakilju cbantel tuꞌna baꞌn cꞌelel. 9 Akine in chin kꞌmante teya tuꞌn tten tipuna ex cyuwx tcꞌuꞌja. Miꞌn xoba ex miꞌn baj tcꞌuꞌja, porque akine Tmana aju Tdiosa chin tele tucꞌila nok jatumchak cxeꞌla, chi Dios te Josué.

10 Xitzun tmaꞌn Josué cye nejenel cyxol aj Israel alcye tuꞌn tbant cyuꞌn: 11 Cyxiꞌye cyxol cycyakil xjal ex cymanxe cye tuꞌn tbant tten cywa tuꞌn t-xi cyiꞌn tuj cybe, porque tuj ox kꞌij jaꞌlo ko icꞌex tuj nima Jordán tuꞌntzun kcꞌmonte aju txꞌotxꞌ tzul tkꞌoꞌn Kman Dios te ketzbil.

12 Ax icx xi tmaꞌn Josué cye tiyjil Rubén ex cye tiyjil Gad ex cye mij tiyjil Manasés:

13 —Cynaꞌntze aju o tma Moisés cyeye, aju tmajen Dios, tej tmante tuꞌn ttzaj kꞌoꞌn ju txꞌotxꞌ lu te cyeye tuꞌn Kman Dios, tuꞌntzun cynajane twitz. 14 Cykꞌon cyaje cyxuꞌjile tzalu, cyucꞌix ke tal cycꞌwaꞌle ex cyalune, tuj txꞌotxꞌ aju tzaj tkꞌoꞌn Moisés cyeye jlajtzi nima Jordán. Atzun ke xinak ma pon cyipun, baꞌn tuꞌn t-xi cyiꞌn cymacbil in ajben tuj kꞌoj, ex e cycub nej cywitz ke cyerman, tuꞌntzun cyonin cyiꞌj tuj kꞌoj. 15 Ocxi ttzaj tkꞌoꞌn Kman jun lugar cye jatum tuꞌn cynajan, ic tzaꞌn ma tzaj kꞌoꞌn cyeye, ex ocxi cyoc te tajwil txꞌotxꞌ tzul tkꞌoꞌn Kman cye, baꞌntzun tuꞌn cyajtze tzalu twitz cytxꞌotxꞌe jlajtzi nima Jordán tuj tjawitz kꞌij, tuꞌntzun cyoque tajwil txꞌotxꞌ lu, aju tzaj tkꞌoꞌn Moisés cyeye, aju tmajen Dios, chi Josué cye.

16 Atzun cye xi cytzakꞌweꞌn:

—Cbantel kuꞌne tcyakilju ma tzaj tmaꞌna keye, ex ko xeꞌle nok jatum ko xel t-samaꞌna. 17 Tcyakil maj cxel knimane ic tzaꞌn xi knimane Moisés. Nok oꞌcx kajbile tuꞌn t-xiꞌ Kman tucꞌila ic tzaꞌn o bet tucꞌil Moisés. 18 Ka at jun ma tzicꞌ tibaj tyola, ex ka mintiꞌ ma txi nimana tuꞌn, il tiꞌj tuꞌn tcyim. Nok oꞌcx kajbile tuꞌn tten tipuna ex cyuwx tcꞌuꞌja, che chi.