Aju tcyimlen Moisés ex aju tcuꞌxlen makuꞌn
34
Icꞌtzun Moisés tuj chkꞌajlaj Moab, ex jax twi witz Nebo aju taꞌ tuj tiwitz txꞌotxꞌ Pisga, aju tajtz jlajtzi twitz tnam Jericó. Atzun tzaj tyecꞌun Kman te tcyakil txꞌotxꞌ Galaad ponin baj max tiꞌj ttxꞌotxꞌ Dan, 2 tucꞌix ttxꞌotxꞌ Neftalí, ttxꞌotxꞌ Efraín, ttxꞌotxꞌ Manasés ex tcyakil ttxꞌotxꞌ Judá, ponin baj max ttzi Nintz Mar, 3 tucꞌix txꞌotxꞌ Néguev, txꞌotxꞌ ttziꞌyile nima Jordán ex tchkꞌajlajil tnam Jericó aju tnam at nim tkan palma tuj, ponin baj max tiꞌj tnam Zoar. 4 Tmatzun Kman te cyjaꞌ:Atzun txꞌotxꞌ lu xi ntziyane te Abraham, te Isaac ex te Jacob tuꞌn t-xi nkꞌoꞌne cye cyiyjil. Ma txi nkꞌoꞌne ambil teya tuꞌn t-xi tqueꞌyina, pero miꞌn pona tuj.
5 Cyimtzun Moisés aju tmajen Dios tuj txꞌotxꞌ Moab, ic tzaꞌnx otok tma Kman, 6 cuꞌx makuꞌn tuꞌn Dios tuj chkꞌajlaj tuj txꞌotxꞌ Moab tajtz jlajtzi Bet-peor, ex cucx jaꞌlo mi jun ojtzkilte jatum makuꞌn. 7 Otok japun Moisés twiꞌ 120 abkꞌi tej tcyim; baꞌnxtok ateꞌ ke tbakꞌ twitz, ex atxtok tipun t-ximlal.
8 Atzun cye aj Israel o che okꞌxix tiꞌj Moisés tuj 30 kꞌij tuj tchkꞌajlajil txꞌotxꞌ Moab. Cyjaꞌtzun e japun baj cyuꞌn ke kꞌij te okꞌel ex te bis tiꞌj tcyimlen. 9 Atzunte Josué aju tcyꞌajal Nun otok tzꞌoc nim tnabl tuꞌnju otok cub tkꞌoꞌn tkꞌab Moisés tibaj twiꞌ; tuꞌntzun jlu xi cyniman ke aj Israel, ex o cybincha ic tzaꞌnx otok tma Kman te Moisés.
10 Mi aꞌl juntl t-sanjel Dios o ten cyxol aj Israel ic tzaꞌn te Moisés, twitzelcu Kman o yolin tucꞌil; 11 mi aꞌl juntl o binchante ke techal ex ke binchben nim cyipumal ic tzaꞌn keju e tzaj tmaꞌn Kman te tuꞌn tbinchante tuj Ejipt, tiꞌj Faraón, cyiꞌj ke aj sanjelal ateꞌtok ttxlaj ex tiꞌj tcyakil txꞌotxꞌ Ejipt, 12 ex mi aꞌl juntl o pon tipumal ic tzaꞌn te Moisés, tej cybant ke binchben maꞌxix ex xobajilxix tuꞌn cywitz cycyakil aj Israel.