Cub tcyꞌiwlaꞌn Moisés cycyakil cꞌloj cyiyjil aj Israel
Max twi witz Sinaí tzaj Kman, ex max tuj tiwitz txꞌotxꞌ Seir tzaj tkꞌoꞌn spicꞌun cye. Max twi witz Parán tzaj koptzꞌaj, ex tej ttzaj, etz cyxol ela mil anjel xjan, tuj tbankꞌab kꞌiꞌn ley tuꞌn ic tzaꞌn kꞌakꞌ in cꞌant.
3 In tcꞌujlaꞌn Kman ke xjal etzan tuꞌn, in tcloꞌn keju nneꞌl cypaꞌn cyib tuꞌn cyajben te, akeju in che cub ten t-xe tkan ex in xi cybiꞌn alcye in tmaꞌn cye.
4 Tzaj tkꞌoꞌn Moisés aju ley te ke, te jun etzbil cye cycyakil tiyjil Jacob.
5 Ax te Kman oc te rey cyxol aj Israel tej tbaj cychmon cyib ke nejenel cye, cyucꞌix cycyakil cꞌloj cyiyjil aj Israel.
6 Atzun yol lu xi tmaꞌn tiꞌj Rubén:
Cucxwit tzꞌel tkꞌij Rubén ex miwt cyim, chmet-xwit nim cybaj ke tiyjil.
7 Atzun yol lu xi tmaꞌn tiꞌj Judá:
Nman, bintza tkꞌajkꞌajel twi Judá; ẍaklunxa tuꞌn tjunin tib cyucꞌil t-xjalil; tuꞌnx tib e tclonte tib; oninxa tuꞌn miꞌn tcub tiꞌj cyuꞌn ke aj kꞌoj tiꞌj.
8 Atzun yol lu xi tmaꞌn tiꞌj Leví:
Nman, teya aju Tumim ex Urim, teya ex teju xinak cꞌujlaꞌn tuꞌna aju oc tkꞌoꞌna tuj malbil tuj Masah, aju tzaj tkꞌoja tiꞌj tuj Meriba jatum tzaj tkꞌoꞌna aꞌ te kcꞌaye,
9 aju o tma tiꞌj tman ex tiꞌj ttxuꞌ cyjaꞌ: Naꞌnx twile cywitz; ax icx o tma cyiꞌj terman: Mintiꞌ ojtzkiꞌn ke wuꞌne, ex xi tmaꞌn cyiꞌj tcꞌwaꞌl: Mintiꞌ baꞌn wuꞌne alcye ke. Ke aj Leví o japun tyola cyuꞌn, o cyakꞌ cyib tuꞌn tjapun cyuꞌn aju yol cyaj bant tiꞌj tuꞌna cyucꞌil.
10 Ake in che kꞌonte xnakꞌtzbil cyiꞌj ke tcawbila ex ke tleya cye tiyjil Jacob akeju aj Israel; ake in che kꞌonte storac twitza, ex ake in che cub patunte alumaj te chojbil tibaj t-altara.
11 Nman, cyꞌiwlama aju in cybinchaꞌn, ex cꞌmonxa tucꞌil tzalajbil aju takꞌunben cykꞌab. Tokin cuba ttzal cyiꞌj ke aj kꞌoj cyiꞌj ex keju in che icꞌun cye, tuꞌntzun miꞌn cyjaw weꞌtl.
12 Atzun yol lu xi tmaꞌn tiꞌj Benjamín:
Txubtxaj cꞌankꞌil aju cꞌujlaꞌn tuꞌn Kman, porque nikaꞌ taꞌ Dios tiꞌj, cwentin tuꞌn tuj tcyakil tankꞌibl, ex ax cnajal Dios tucꞌil te clol te.
13 Atzun yol lu xi tmaꞌn tiꞌj José:
Awt Kman cub cyꞌiwlante ttxꞌotxꞌ tuꞌn tkꞌab cheꞌw tbanilxix in tzaj twitz cyaꞌj, tucꞌix aꞌ in jatz jlet tjakꞌ txꞌotxꞌ;
14 mejorxwit tzꞌoc twitz tawal tuꞌn kꞌij, tbanilxixwit cyaj twitz tawal tuꞌn xjaw,
15 mejorxwit tzꞌoc twitz awal cywiꞌ ke ojtxi witz tuj ttxꞌotxꞌ, ex tbanilxixwit cyaj tcyakil cyiꞌjele ke witz ateꞌ te jumajx,
16 tzajxwit kꞌoꞌn nimxix te; ex tbanilxixwit tzꞌoc twitz tawal tuj ttxꞌotxꞌ, ex tzajxwit xtalin tuꞌn Dios aju cub tyecꞌun tib cyxol ke tkꞌab chꞌiꞌx in che cꞌanttok. Tzajxwit kꞌoꞌn tcyakil cyꞌiwbil lu tibaj José aju jaw scꞌoꞌn tuꞌn toc te nejenel cyxol ke terman.
17 Tbanilxix queꞌyin José ic tzaꞌn tnejel tcꞌwaꞌl jun tor, at nim tipum ic tzaꞌn jun wacẍ te tjakꞌ cꞌul, ex che bajel t-ẍuꞌyin cycyakil tnam max ttxaꞌnpun txꞌotxꞌ. Ictzun cyten ke tiyjil Efraín nimxix cybaj; ex ictzun cyten ke tiyjil Manasés nim cyajlal.
18 Atzun yol lu xi tman tiꞌj Zabulón ex Isacar:
Tzalajxwit Zabulón oc t-xiꞌ cyuj tbe; ax icx Isacar, tzalajxwit cyuj tja xbalun.
19 Ake che tzajel txconte cycyakil cyxjalil tuꞌn cypon twi witz, ex atzun che xel cykꞌoꞌn ke chojbil tzꞌaklxix. Che tzalajel tiꞌj kꞌinumabl cjawitz cyiꞌn tuj mar, ex tiꞌj kꞌinumabl ewan ttzi mar.
20 Atzun yol lu xi tmaꞌn tiꞌj Gad:
Nimanxwit tbi Dios aju in tzaj kꞌonte nim ttxꞌotxꞌ. Ic tten Gad ic tzaꞌn jun ttxu balun in ewan tuꞌn t-xi wutꞌpaj tuꞌn ttzyet tcanb, ex nneꞌl ttxꞌaꞌn tkꞌab ex twiꞌ tcanb.
21 Jaw t-scꞌoꞌn Gad aju txꞌotxꞌ mas tbanil, ex tzaj kꞌoꞌn te aju paꞌmaj te nejenel. A cub nej cywitz xjal; japun aju tajbil Kman tuꞌn, ex tzꞌaklxix aju bant tuꞌn cyxol aj Israel.
22 Atzun yol lu xi tmaꞌn tiꞌj Dan:
Ic tten Dan ic tzaꞌn jun tal balun in tzaj tꞌicpaj max tuj txꞌotxꞌ Basán.
23 Atzun yol lu xi tmaꞌn tiꞌj Neftalí:
In tcꞌmoꞌn Neftalí nim t-xtalbil Kman ex nim tcyꞌiwbil Dios tcub tibaj. A cꞌoquel tajaw lagun ulni baj tcuꞌtz t-xeꞌ.
24 Atzun yol lu xi tmaꞌn tiꞌj Aser:
Cubxwit cyꞌiwlaꞌn Aser cyxol ke tcyꞌajal Jacob, ex che tzalajxwit cyiꞌj ke terman. Che cuꞌxwit tmuꞌn tkan tuj aseyt.
25 Puro cꞌuxbil ex kꞌan cꞌuxbil ke cyuwsabl tpwertil ttanmi cꞌoquel; tenxwit tipun nok jteꞌ kꞌij ctel twitz txꞌotxꞌ.
26 Akeye aj Israel, mi aꞌl juntl Dios ic tzaꞌn cyeye Cydios, in bet twitz cyaꞌj ikan tuꞌn muj tucꞌil nim tajwalil, tuꞌn tul onil cyeye.
27 Aju Dios mintiꞌ bajsbil te, atzun clol cyeye, ex ke tkꞌab mintiꞌ bajsbil cye atzun tocx cyjakꞌe te tzyul cyeye. Tuꞌn e jeꞌl ok ke aj kꞌoj cywitze, ex tzaj tmaꞌn cyeye tuꞌn cybaj naj cyuꞌne.
28 Tuj txubtxaj che ankꞌil ke aj Israel, ex tuj tzalajbil che ankꞌil ke cyiyjil. Ctzajel triw tucꞌix tkan uva tuj cytxꞌotxꞌ, ex ctzajel tkꞌab cheꞌw twitz cyaꞌj tibaj cytxꞌotxꞌ.
29 At tzalajbil cyeye akeye aj Israel. ¿Alcye juntl cꞌloj xjal jacu pon ic tzaꞌn cyeye? Ax te Kman o clonte cyeye, ax te cwentil cyeye ex onil cyeye. Ate Kman ic tten ic tzaꞌn jun spad in cub cyiꞌj aj kꞌoj tuꞌn, cyjaꞌtzun akeju aj kꞌoj cyiꞌje, tucꞌil cyxobil cꞌajetz cykꞌon cyib cyucꞌile, ex cbel cyiꞌj cyuꞌne.