32
Bintza cyaꞌj, chin yolile; ex aya txꞌotxꞌ, kꞌontz twiꞌya tiꞌj nyole.2 Cbel chitj nxnakꞌtzbile ic tzaꞌn jbal; ic cꞌoquel nyole ic tzaꞌn tkꞌab cheꞌw, ic tzaꞌn xmuꞌs in cub tibaj chꞌim, ex ic tzaꞌn tkan jbal in cub tibaj cꞌul.
3 Chin yolile tiꞌj tbi Kman; cynimsaꞌnctze tbi Kdios.
4 Ate Colol ic tzaꞌn jun pic; tzꞌaklxix ke tbinchben, tuj tumelxix tcyakilju in tbinchaꞌn. Ate Dios axix toc tyol, mintiꞌ jun mya baꞌn in tbinchaꞌn; tzꞌaklxix te ex jikun tiꞌj tmod.
5 Akeye xjal mya baꞌn keye ex miban che bine; o cybinchaye mya baꞌn twitz Dios, ex mya baꞌn keye tuꞌn cyoque te tcꞌwaꞌl.
6 ¿Maj cyjaꞌtzun tten in chjet cyuꞌne te Kman, akeye xjal miban che bine ex mintiꞌ cynable? ¿Myapetzun ate Cymane pokꞌsalte cyeye? Tuꞌn o che cub binchaꞌne, ex tuꞌn o che oque te jun nasyon.
7 Cynaꞌntze ke tkꞌijlalil ojtxi, che ximane cyiꞌj ke abkꞌi o che ex; cykaninxe te cymane ex ctzajel tmaꞌn cyeye, cykaninxe cye tij xjal ex ctzajel cytxꞌolbaꞌn cyeye.
8 Tej tbaj paꞌn txꞌotxꞌ cyxol xjal tuꞌn Dios maꞌxix toclen, tej tcyaj techan aju tmojonil ttxꞌotxꞌ junjun cꞌloj xjal, biꞌxtzun el tpaꞌn Dios aju txꞌotxꞌ jatum tuꞌn cyten ke tiyjil Israel ic tzaꞌnx cyajlal.
9 Aju tetzbil Kman, atzun ke xjal etzan tuꞌn, akeju tiyjil Jacob.
10 E cnet tuꞌn tuj tzkij txꞌotxꞌ, tuj txꞌotxꞌ jumajx tzkij, jatum in jumin nim cykꞌikꞌ; e tzaj tchleꞌn tuj tkꞌab, e baj t-xnakꞌtzaꞌn, ex e oc tcwentin ic tzaꞌn t-santil tbakꞌ twitz.
11 Ic tzaꞌn jun ttxuꞌ tꞌiw in putin cyibaj ke tal ateꞌ tuj cykꞌuꞌ, ex in xmoxin cyiꞌj tuꞌn tbant cylipan, in che el tlicꞌun t-xicꞌ, in che tzaj tiꞌn tal ex in cheꞌx tiꞌn cyibaj t-xicꞌ,
12 ax icxtzun te Kman, oꞌcx te xi ẍaklunte cye ex mi aꞌl juntl; mi jun dios nnoꞌc cydiosin xjal o onin te.
13 E jeꞌx tiꞌn twi witz, e oc tcꞌaꞌchin tuꞌn twitz awal tuj cojbil, tzaj tkꞌoꞌn cyloꞌ taꞌl cab etz tuj toyꞌ pic, ex tzaj tkꞌoꞌn cychiꞌ aseyt cyiꞌj ke tzeꞌ in che chꞌiy cyxol abj cyuwxix.
14 Tzaj tkꞌoꞌn cycꞌa lech ex cychiꞌ cyes el cyiꞌj vac ex cyiꞌj cytxu chip in che tzaj tuj txꞌotxꞌ Basán. Tzaj tkꞌoꞌn cywa triw tbanilxix, ex tzaj tkꞌoꞌn cycꞌa taꞌl twitz uva cyak queꞌyin.
15 Pero tejtzun cygordyix aj Israel oc cyxajoꞌn Cyajaw, o che gordyix wen ex puro kꞌiban oc cyiꞌj; cyajtzun cycolin Cydios aju binchal cye, ex el cyicꞌun aju Cwentil cye ex Clol cye.
16 Tzaj tloꞌch tcꞌuꞌj Dios cyuꞌn, ex tzaj tkꞌoj cyiꞌj tej cyoc ten cꞌulul cywitz tilbilal icꞌun tuꞌn, akeju nnoꞌc cydiosin xjal cyuj mastl nasyon.
17 Xi cykꞌoꞌn chojbil cywitz juꞌẍ ex mya twitz Dios, cywitz ke dios mintiꞌtok ojtzkiꞌn cyuꞌn; acꞌaj dios ke jlu, acꞌaj cyponlen kꞌiꞌn, ex mintiꞌ o che cꞌulun cyman cywitz.
18 O tzicꞌ tnaꞌl Dios cyuꞌn, aju Pokꞌsal cye ex Colol cyiꞌj; o tzicꞌ tnaꞌl Dios cyuꞌn, aju binchal cye.
19 Tzajtzun tkꞌoj Kman tej ttil jlu, tuꞌnju el icꞌun cyuꞌn ke tcyꞌajal ex ke tmeꞌjel;
20 ex tma cyjaꞌ: Cꞌelel wewan wibe cywitz, jacu cyil ti che oquel; axix toc mya baꞌn ke xjal lu; cꞌwaꞌlbaj ke, mintiꞌ in pon Cyman tiꞌj cycꞌuꞌj.
21 Tzaj tloꞌch ncꞌuꞌje cyiꞌj tuꞌnju e cꞌulun twitz jun dios mya Dios; tzaj nkꞌoje cyuꞌn tuꞌn cylaj ke tilbilal mintiꞌ cyajben. Ax icx cye ctzajel tloꞌch cycuꞌuꞌj wuꞌne tuꞌn tlaj juntl tnam aju in cymaꞌn tiꞌj ka mintiꞌ tajben, ex che jawil kꞌojl wuꞌne tuꞌn tlaj jun tnam mintiꞌ tnabl.
22 Ma tzaj nkꞌoje mer ic tzaꞌn kꞌakꞌ ex max cpol cꞌant tuj cynajbil cyimni; cbajel tzꞌeꞌy twitz txꞌotxꞌ ex twitz awal tuꞌn, ex che bajel patun ke cykꞌukbil nmak witz tuꞌn.
23 Ctzajel nkꞌoꞌne nim mya baꞌn cyibaj, che xeꞌl nxoꞌne cycyakil npleche cyiꞌj;
24 che cymel tuꞌn weꞌyaj ex tuꞌn cyak oc ttzaj cyiꞌj; che najel tuꞌn txꞌuꞌj yabil nim taꞌw; che xeꞌl nsamaꞌne ke txcup te tjakꞌ cꞌul cyiꞌj te chyoꞌlte cye, cyucꞌix ke lobaj jurat in che cyim xjal cyuꞌn.
25 Tuj cay che cymel xjal tuꞌn spad, ex tuj cyja ctel nim t-xoblal. Che cymel ke cuꞌxun ex ke kꞌapoj, ax icx ke tij xjal ex ke tal neꞌ cucx cychꞌuꞌn.
26 Otok cub nximane tuꞌn cybaj nsputine najchak, ex tuꞌn tcub naj cybi cyxol xjal tuꞌn miꞌn cytzaj naꞌntl,
27 pero mintiꞌ cub tuj nwitze tuꞌn woc xmayine cyuꞌn aj kꞌoj cyiꞌj; mintiꞌ wajbeye tuꞌn tjaw cyniman cyib keju in che kꞌojin cyiꞌj, ex tuꞌn miꞌn cymante cyjaꞌ: Tuꞌnx kipumal o bant tcyakil jlu; mya ate Dios binchante, jaculo che chi.
28 Ke aj Israel jun cꞌloj xjal o tzꞌel tzpet cynabl, ex jumajx mintiꞌ cynabl.
29 Nokwit at cynabl mawtlo che ximan tiꞌj jlu, ex mawtlo tzꞌel cynicꞌ tiꞌj alcye tuꞌn ttzaj cyibaj te bajsbil.
30 ¿Tzaꞌn tten jlu: Nok tuꞌn jun xjal e jeꞌl ok jun mil, ex nok tuꞌn cabe xjal e icꞌ lajoꞌn laj mil? O bant jlu nok tuꞌnju ate Kman, aju Clol ke, xi tkꞌoꞌn koꞌ tuj cykꞌab ke aj kꞌoj kiꞌj.
31 Ax toc biꞌn cyuꞌn ke aj kꞌoj kiꞌj, aju cye clol cye mlay pon tipumal ic tzaꞌn ke Clol ke.
32 Porque cye, ic cyten ic tzaꞌn tkan uva mya baꞌn, ax cyiyjil ic tzaꞌn ke xjal e ten tuj Sodoma ex Gomorra; ke xjal lu ic cyten ic tzaꞌn tkan uva cꞌa twitz ex in che cyim xjal tuꞌn;
33 aju taꞌl twitz puro mya baꞌn ic tten ic tzaꞌn ttxꞌaben kꞌantiꞌ; ka ma txi tcꞌaꞌn jun xjal jacu jurat cyim tuꞌn, mer ic tzaꞌn otok tzꞌoc txꞌaꞌn tuꞌn lobaj.
34 Cycyakil cybinchben mya baꞌn cꞌuꞌn ke wuꞌne; cꞌuꞌn ke wuꞌne tuj ncꞌuble.
35 Wuꞌne cꞌajel t-xel; akine chin bel kꞌonte castiw oc tpon tkꞌijlalil tuꞌn cycub tzꞌak. Ma tzul lakꞌeꞌ tkꞌijlalil tuꞌn cynaj, chꞌix tpon tkꞌijlalil tuꞌn tcub cycastiw, aju banimaj tiꞌj.
36 Tzul Kman colol cyiꞌj xjal etzan tuꞌn oc tqueꞌyinte mintiꞌtl cyipun; ctzajel kꞌakꞌan tcꞌuꞌj Kman cyiꞌj ke tmajen oc tqueꞌyinte mi jun xjal cyjel ten, mi ke xjal majen ex mi ke xjal mya majen.
37 Ctzajeltzun tmaꞌn Kman: ¿Jatumtzun ateꞌ ke cydiose, ke clol cyeye, akeju oc keꞌ cycꞌuꞌje cyiꞌj,
38 akeju e jeꞌx chyonte t-sebyil cyoyaje patun in che cub, akeju e jeꞌx cꞌante taꞌl twitz uva xi cyoyine cye? Etzun cyjaw weꞌ tuꞌn cyonin cyiꞌje. E cytzaj tuꞌn cycolin cyiꞌje.
39 Oꞌcx akine Dios, mintiꞌ juntl Dios, oꞌcx akine. Wuꞌne in tzaj camic ex wuꞌne in tzaj ankꞌibl; wuꞌne in che cꞌixbi xjal ex wuꞌne in che banix. Mlay colpaj jun xjal tuj nkꞌabe tuꞌn juntl.
40 In jaw nkꞌoꞌne nkꞌabe twitz cyaꞌj te cyuwsabl nyole, ex in xi nmaꞌne cyjaꞌ: Axix toc itzꞌ kine te jumajx,
41 oc tbaj njakuꞌne ttzi nspadiye in koptzꞌaj wen, ex oc cyoc xjal tuj xjel wuꞌne, cꞌajel nkꞌoꞌne t-xel cybinchben aj kꞌoj wiꞌje, cbel nkꞌoꞌne castiw cyibaj keju in che el icꞌunte weye.
42 Cnojel cyiꞌj npleche tuꞌn cychcꞌel xjal ex che najel cycyakil tuꞌn nspadiye; keju otok che cyim ex keju otok cheꞌx kꞌiꞌn pres nim cychcꞌel cꞌelel, ex cꞌelel kꞌiꞌn cywiꞌ ke nejenel cyxol aj kꞌoj, akeju matij ttzmal cywiꞌ.
43 Akeye txkantl xjal cyuj mastl nasyon, che tzalajxe junx tucꞌil ju tnam etzan tuꞌn Dios, porque cbel tkꞌoꞌn cycastiw keju e cub byonte cye tmajen; cꞌajel tkꞌoꞌn t-xel cybinchben aj kꞌoj tiꞌj, cbajel t-saksaꞌn ttxꞌotxꞌ, ex cbel tnajsaꞌn cyil ke xjal etzan tuꞌn.
44 Bajtzun tmaꞌn Moisés aju bitz lu waꞌltok cywitz cycyakil aj Israel, junx tucꞌil Josué aju tcyꞌajal Nun.
Aju mancbil tyol Moisés
45 Tej tbaj tmaꞌn Moisés jlu cye aj Israel, 46 xi tmaꞌn cye cyjaꞌ: Che ximane tiꞌj tcyakil yol ma txi nmaꞌne cyeye jaꞌlo, ex cymanxe cye cycꞌwaꞌle, tuꞌn tjapun tcyakil ley lu cyuꞌn, 47 porque aju ley lu mya nok chꞌin t-xilen te cyeye; aju ley lu kꞌol cychwinklale, ex tuꞌntzun ley lu che tele nim tyemp twitz txꞌotxꞌ jlajxi nima Jordán, aju ctzyetel cyuꞌne te cyetzbile.
Xi tkꞌoꞌn Dios ambil te Moisés tuꞌn t-xi tqueꞌyin aju txꞌotxꞌ otok tzaj ttziyan Dios tuꞌn t-xi tkꞌoꞌn cye aj Israel
48 Ax kꞌij lu xi tmaꞌn Kman te Moisés cyjaꞌ: 49 Txiꞌya cywi witz Abarim ex tjaxa twi witz Nebo, aju tcub tuj cytxꞌotxꞌ aj Moab, twitz Jericó, ex axtzun queꞌyinxa txꞌotxꞌ Canaán aju cxel nkꞌoꞌne te cyetzbil aj Israel. 50 Twiꞌtzun witz lu, aju cjawixa twiꞌ, axtzun cymela ex cpola cyucꞌil ktzan t-xeꞌchela, ic tzaꞌnx ktzan ttzica Aarón, aju cyim twi witz Hor ex o pon cyucꞌil ktzan t-xeꞌchel, 51 porque cycabile e binchane il nwitze, tuꞌnju mintiꞌ oc cykꞌoꞌne kine te nim woclene cywitz aj Israel tej ateꞌtok ttzi aꞌ Meriba-cades tuj tzkij txꞌotxꞌ Zin. 52 Tuꞌntzun jlu, nok cxel tqueꞌyina najchak aju txꞌotxꞌ cxel nkꞌoꞌne cye aj Israel, pero mlay pona tuj, chi Dios te Moisés.