Cyaj ten Josué te t-xel Moisés
31
O yolin Moisés juntl maj cyucꞌil cycyakil aj Israel ex xi tmaꞌn cye cyjaꞌ: 2 Ma chin japune twiꞌ 120 abkꞌi, ex mlay chin cub nejtle cywitze. Ax icx o tzaj tmaꞌn Kman weye cyjaꞌ: Mlay tzꞌicxa jlajxi nima Jordán, chi Kman. 3 Axte Kman Dios cbel nej cywitze, ex cywitzxe che najel ke nasyon lu tuꞌn, tuꞌntzun cyoque tajwil cytxꞌotxꞌ. Ate Josué cꞌoquel te nejenel tuꞌn tcub nej cywitze ic tzaꞌnx o tma Kman. 4 Oc tbinchaꞌ Kman cyiꞌj ke nasyon lu ic tzaꞌnx o tbincha tiꞌj Sehón ex Og, akeju rey cye aj Amorrey; e naj ke jlu tuꞌn, cyucꞌix cytanmi. 5 Che tzajel tkꞌoꞌn Kman ke nasyon lu tuj cykꞌabe. Cybinchame cyiꞌj ic tzaꞌnx o txi nmaꞌne cyeye. 6 Tenx cyipune ex cyuwx cycꞌuꞌje, miꞌn che xobe ex miꞌn tzaj baj cycꞌuꞌje oc cypon weꞌye cywitz, porque ctel Kman Dios cyucꞌile; mlay che cyaj kꞌoꞌne ex mlay che cyaj coline tuꞌn.7 Tzajtzun txcoꞌn Josué tuꞌn Moisés, ex cywitz cycyakil aj Israel xi tmaꞌn te cyjaꞌ: Tenx tipuna ex cyuwx tcꞌuꞌja, porque aya cbel nej cywitz xjal lu tuꞌn cypon tuj txꞌotxꞌ aju tzaj ttziyan Kman cye cyxeꞌchel tuꞌn ttzaj tkꞌoꞌn cye. Aya cbel sipante cyetzbil. 8 Axte Kman cbel nej twitza ex ctel tucꞌila; mlay cyaj kꞌoꞌna tuꞌn, ex mlay cyaj colina tuꞌn. Tuꞌntzun jlu, miꞌn xoba ex miꞌn baj tcꞌuꞌja.
Tuꞌn tjaw schꞌit uꞌj te ley tuj abkꞌi te najsbil cꞌas
9 Cub ttzꞌiban Moisés aju ley lu ex xi tkꞌoꞌn cye pal aj Leví, akeju toc cyoclen tuꞌn t-xi cyiꞌn aju cax cꞌubl tley Dios, ax icx xi tkꞌoꞌn cye cycyakil tij xjal cyxol aj Israel, 10 ex xi tmaꞌn cye cyjaꞌ: Tuj wukchak abkꞌi, oc tjapun abkꞌi te najsbil cꞌas, tuj ninkꞌij oc cyjaw binchet ke ja t-xak tzeꞌyin cywiꞌ, 11 oc toc cychmon cyib cycyakil aj Israel twitz Kman Dios tuj lugar cjawil t-scꞌoꞌn, cjawiltzun cyschꞌiꞌne uꞌj te ley lu cywitz. 12 Cycyakil xjal il tiꞌj tuꞌn cyoc chmet, tzaꞌnx ke xinak icx ke xuꞌj, ke cꞌwaꞌl ex ke stranjer xjal ax najl cyxole, tuꞌntzun cybinte oc tjaw schꞌit uꞌj te ley, tuꞌn tbant cyniman te Kman Dios, ex tuꞌn tjapun cyuꞌn tcyakilju in tmaꞌn ley, 13 tuꞌntzun cybinte ke cꞌwaꞌl akeju naꞌnxtok cybinte, ex tuꞌn tbant cyniman te Kman Dios tuj tcyakil kꞌij oc cyten twitz txꞌotxꞌ, aju ctzajel kꞌoꞌn cyeye cyicꞌxlenxiye tuj nima Jordán.
Xi tmaꞌntl Kman te Moisés alcye tuꞌn tbant tuꞌn
14 Tzaj tmaꞌn Kman te Moisés cyjaꞌ: Bintza, in lakꞌeꞌ ttzaj tkꞌijlalil tuꞌn tcyima. Tuꞌntzun jlu txcontza Josué, ex cycabile cyxiꞌye tuj ja te mojbabl tibil tuꞌntzun t-xi nmaꞌne te alcye tuꞌn tbant tuꞌn.
Xiꞌtzun Moisés tucꞌix Josué, ex e ocx tuj ja te mojbabl tibil. 15 Tujtzun ja lu cub tyecꞌun tib Kman cywitz tuj txkan muj cub ten ttzi ja. 16 Tmatzun Kman te Moisés cyjaꞌ: Chꞌix tpon tkꞌijlalil tuꞌn tcyima. Ke xjal lu cꞌelel cypaꞌn cyib wiꞌje, porque che oquel ten cꞌulul cywitz cydios xjal tuj txꞌotxꞌ jatum che pol; atzun weye chin cyjel coline cyuꞌn ex mlay japun cyuꞌn aju yol cyaj bant tiꞌj wuꞌne cyucꞌil. 17 Octzun tel cypaꞌn cyib wiꞌje ctzajel nimxix nkꞌoje cyiꞌj, che cyjel ncoline, cꞌelel wewan wibe cywitz ex che najel cycyakil, ctzajel nim mya baꞌn cyibaj ex nim yajbil cye tzul. Maxitzun oc cymaꞌ: ¿Myapelo tuꞌnju mi aꞌl Dios kucꞌil o tzaj tcyakil mya baꞌn lu kibaj? 18 Oc tbant tcyakil jlu cyuꞌn, ax toc cꞌelel npaꞌn wibe cyiꞌj tuꞌn tlaj tcyakil mya baꞌn otok cybincha, ex tuꞌn tlaj otok che cꞌulun cywitz junxitl dios.
19 Jaꞌlotzun, cytzꞌiban cube aju bitz lu ex cyxnakꞌtzanxe cye aj Israel, tuꞌntzun t-xi cybitzan ex tuꞌn toc bitz lu te jun testiw wuꞌne cyiꞌj, 20 porque cyocxlenxi nkꞌoꞌne tuj txꞌotxꞌ aju xi ntziyane cye cyxeꞌchele, aju txꞌotxꞌ kꞌinunxix ex tbanilxix, atzun che nojel wen ex che gordyixel, ex octzun cynoj wen che oquel lpeꞌ cyiꞌj junxitl dios ex che cꞌulul cywitz, atzun weye chin elel icꞌune cyuꞌn, ex mlay japun cyuꞌn aju yol ma cyaj bant tiꞌj wuꞌne cyucꞌil. 21 Octzun ttzaj nim mya baꞌn ex yajbil cyibaj, atzunju bitz lu cꞌoquel te testiw cyiꞌj, porque ctzajel cynaꞌn ex cxel cybitzan ke cyiyjil che ul itzꞌj te tibajxi. Tej naꞌnxtok cyocx nkꞌoꞌne tuj txꞌotxꞌ o txi ntziyane cye, ya baꞌntl wuꞌne alcye cyximbetz, chi Dios.
22 Tujx kꞌij lu cub ttzꞌiban Moisés aju bitz lu, ex xi t-xnakꞌtzaꞌn cye aj Israel tuꞌn tbant cyuꞌn.
23 Xitzun tmaꞌn Kman te Josué aju tcyꞌajal Nun, chi cyjaꞌ: Tenx tipuna ex cyuwx tcꞌuꞌja, porque aya cꞌoquex kꞌinte cye aj Israel tuj txꞌotxꞌ o txi ntziyane cyeye, ex akine chin tel tucꞌila.
24 Tej tbaj ttzꞌiban Moisés tcyakil ley lu tuj jun uꞌj, 25 xi tmaꞌn cye aj Leví akeju at cyoclen tuꞌn t-xi cyiꞌn cax cꞌubl tley Dios, ex chi cyjaꞌ: 26 Cyiꞌnxe aju uꞌj lu jatum tzꞌiban ley, ex cykꞌoncuye ttxlaj cax cꞌubl tley Dios tuꞌntzun ax tuꞌn tten te jun testiw cyiꞌje. 27 Baꞌn wuꞌne, akeye jun cꞌloj xjal miban che niman ex cyuw cywiꞌye. Katzun mintiꞌ ma txi cynimane Kman acux itzꞌx kine cyxole, pyortzunlo cyuꞌne oc ncyime. 28 Cyiꞌntze cycyakil ke tij xjal ex ke nejenel cyxol cycyakil cꞌloj cyiyjile, tuꞌntzun t-xi nmaꞌne tcyakil yol lu cye, ex che oquel nkꞌoꞌne cyaꞌj ex txꞌotxꞌ te testiw cyiꞌj. 29 Baꞌn wuꞌne, ncyimlenxiye che elel txalpuje ex cyjel cycoline be otok txi nmaꞌne cyeye. Ax icx baꞌn wuꞌne, tzul mya baꞌn cyibaje tuꞌn tlaj mya baꞌn otok cybinchaye twitz Kman, ex tzul tkꞌoj cyiꞌje tuꞌn tlaj cybinchbene mya baꞌn, chi Moisés.
Aju tbitz Moisés
30 Xitzun tmaꞌn Moisés aju bitz lu cye cycyakil aj Israel otok baj cychmon cyib, tzajx keꞌ tuꞌn t-xe tnejel tejxi tpon baj: