Aju cyetzbil cymeꞌjel aj Israel
27
Cyxol ke tiyjil Manasés attok jweꞌ xuꞌj cyerman cyib, ex atzun cybi jlu: Maala, Noa, Hogla, Milca ex Tirsa. Ake jlu tmeꞌjel Zelofehad aju tcyꞌajal Hefer, atzunte Hefer tcyꞌajal Galaad, atzunte Galaad tcyꞌajal Maquir, atzunte Maquir tcyꞌajal Manasés ex atzunte Manasés tcyꞌajal José. 2 E jeꞌx ke xuꞌj lu ttzi ja xbalun te mojbabl tibil tuꞌn cyyolin tucꞌil Moisés, tucꞌil pal Eleazar ex cyucꞌil ke nejenel cye tnam xjal, ex xi cymaꞌn cye cyjaꞌ: 3 Aju kmane cyim tuj tzkij txꞌotxꞌ, pero mya ajun oc tkꞌon tib cyucꞌil jun cꞌloj xjal e jeꞌx lpeꞌ tiꞌj Coré, akeju jaw cyiꞌn cyib tiꞌj Kman. O cyim te, pero tuꞌn tex til, ex mintiꞌ jun tcyꞌajal tzaj. 4 Pero mya tuj tumel tuꞌn tnaj tbi ktzan kmane cyxol txkantl cꞌloj tiyjil nok tuꞌnju mintiꞌ jun tcyꞌajal o tzaj. Cykꞌontze jun piẍ txꞌotxꞌ keye cyxol terman ktzan kmane, che chi xuꞌj lu.5 Atzunte Moisés xi tkanin te Kman alcye tuꞌn tbant tuꞌn tiꞌj jlu. 6 Tzajtzun ttzakꞌweꞌn Kman te Moisés cyjaꞌ: 7 Tuj tumelxix taꞌ aju in cymaꞌn ke tmeꞌjel Zelofehad. Kꞌonxa jun piẍ cytxꞌotxꞌ cyxol ke terman ktzan cyman, ex kꞌonxtzuna tetzbil ktzan cyman cye. 8 Kꞌmanxa cye aj Israel cyjaꞌ: Oc tcyim jun cye ex ka mintiꞌ jun tcyꞌajal otok tzaj, tetzun tmeꞌjel cxel kꞌot tetzbil; 9 katzun mintiꞌ jun tmeꞌjel, cyetzun terman cxel kꞌot tetzbil; 10 katzun mintiꞌ jun terman, cyetzun terman tman cxel kꞌot tetzbil, 11 ex katzun mintiꞌ jun terman tman, tetzun jun xjal mas at t-xilen tucꞌil cxel kꞌot tetzbil. A jlu jun ley cyjel ten cye aj Israel, ic tzaꞌnx ma txi nmaꞌne teya, chi Kman te Moisés.
Jaw scꞌoꞌn Josué tuꞌn Dios tuꞌn toc te t-xel Moisés
12 Tzaj tmaꞌn Kman te Moisés cyjaꞌ:
—Tjaxa twi witz Abarim, ex queꞌyinxa aju txꞌotxꞌ cxel nkꞌoꞌne cye aj Israel. 13 Tbajlenxitzun tqueꞌyina txꞌotxꞌ, cymeltzuna ex cpola cyucꞌil ktzan tchmana ic tzaꞌn ktzan ttzica Aarón, 14 tuꞌnju cycabile e icꞌe tibaj nyole xi nmaꞌne cyeye tuj tzkij txꞌotxꞌ Zin, tej cyoc ten tnam xjal yolil mya baꞌn wiꞌje, ex mintiꞌ inx cynimane cywitz xjal tej cyoc ten kanil cycꞌa aꞌ, chi Dios. Atzun o baj jlu ttxlaj twi aꞌ Meriba tuj Cades tuj tzkij txꞌotxꞌ Zin.
15 Xitzun tmaꞌn Moisés te Kman:
16 —Nman Dios, aya in tzaj kꞌonte cychwinklal cycyakil xjal; jaꞌlo scꞌoꞌn jawa juntl nejenel cye tnam xjal etzan tuꞌna, tuꞌn tcub nej cywitz 17 oc cyex tuj kꞌoj ex oc cyajtz meltzꞌaj, ex tuꞌn toc te ẍaklul cye nok jatum tuꞌn cyxiꞌ, tuꞌntzun miꞌn cyoc ic tzaꞌn ẍneꞌl mintiꞌ pastor cyiꞌj, chi Moisés.
18 Atzunte Kman tzaj ttzakꞌweꞌn te Moisés:
—Kꞌintza Josué aju tcyꞌajal Nun, aju xinak lu at nim tnabl wuꞌne; kꞌoꞌn cuba tkꞌaba tibaj, 19 kꞌoncuya twitz pal Eleazar ex cywitz cycyakil tnam xjal, kꞌonxa toclen cywitz cycyakil xjal 20 ex kꞌonx mij toclena te, tuꞌntzun t-xi cyniman cycyakil tnam xjal aj Israel. 21 Pero il tiꞌj tuꞌn t-xiꞌ Josué tucꞌil pal Eleazar, tuꞌntzun ttzaj tkanin Eleazar weye tuꞌn Urim alcye tuꞌn tbant. Te tibajxi, atzunte Josué cxel kꞌmante cye cycyakil xjal alcye cbantel cyuꞌn, chi Kman.