2 Yolina cyucꞌil aj Israel ex kꞌmanxa cye cyjaꞌ: Ka at jun cye ma tzaj tkꞌoꞌn alumaj te jun oyaj weye, baꞌn tuꞌn tetz tiꞌn cyxol ke twacẍ ex ka cyxol ke t-ẍneꞌl.

3 Ka cyxol ke tex twacẍ cꞌeletz tiꞌn aju ctzajel tkꞌoꞌn weye te jun oyaj patun in cub, il tiꞌj tuꞌn ttzaj tkꞌoꞌn jun tor mintiꞌ chꞌin tpaltil. Tuꞌn tcꞌmonjtz oyaj lu, il tiꞌj tuꞌn tcub patit nwitze ttzi ja xbalun te mojbabl tibil, 4 ex cbel tkꞌoꞌn xjal tkꞌab tibaj twiꞌ alumaj. Cyjaꞌtzun ccꞌmonjtzel alumaj ex cnajsetel til xjal. 5 Cꞌoquex tkesin xjal tjakꞌ tkul tor nwitze, atzun cye pal tiyjil Aarón, ctzajel cyyecꞌun chicꞌ nwitze, ex te tibajxi cꞌoquel cytxꞌitoꞌn tiꞌjele tcꞌuꞌj altar aju tcubsaꞌn ttzi ja xbalun te mojbabl tibil. 6 Cꞌelel tiꞌn ttzꞌumal ex cbajel tkesin xjal t-ximlal alumaj tuj piẍun, 7 atzun cye pal, akeju tiyjil Aarón, cbel cykꞌoꞌn kꞌakꞌ tibaj altar ex cbel cybinchaꞌn tten siꞌ tibaj. 8 Ex cbel cykꞌoꞌn alumaj tuj piẍun tten, tucꞌix twiꞌ, tucꞌix t-sebyil, tibaj kꞌakꞌ tjax tibaj altar. 9 Ex ax xjal cbajel txꞌjonte tuj tcꞌuꞌj alumaj tuꞌn aꞌ, cyucꞌix ke tkan; atzunte pal cbel tpatun tcyakil jlu tibaj altar, te jun oyaj patun in cub at tcꞌocꞌjal in chin tzalaje tiꞌj.

10 Ka cyxol ke tex t-ẍneꞌl ex ka tchip cꞌeletz tiꞌn aju ctzajel tkꞌoꞌn weye te jun oyaj patun in cub, il tiꞌj tuꞌn ttzaj tkꞌoꞌn jun tman mintiꞌ tpaltil. 11 Cꞌoquex tkesin xjal tjakꞌ tkul alumaj nwitze tuj tbankꞌab kꞌij te altar. Atzun cye pal tiyjil Aarón, cxel cytxꞌitoꞌn tchcꞌel alumaj tiꞌjele tcꞌuꞌj altar. 12 Cbajel tkesin xjal t-ximlal alumaj tuj piẍun; atzunte pal cbel tkꞌoꞌn chibj kesimaj tibaj siꞌ in cꞌant tuꞌn kꞌakꞌ tjax tibaj altar, junx tucꞌil twiꞌ ex t-sebyil. 13 Ex ax xjal cbajel txꞌjonte keju tuj tcꞌuꞌj alumaj tuꞌn aꞌ, cyucꞌix ke tkan ex ke tcux; atzunte pal cbel tpatun tcyakil jlu tibaj altar te jun oyaj patun in cub at tcꞌocꞌjal in chin tzalaje tiꞌj.

14 Katzun jun chyuꞌj ctzajel tkꞌoꞌn xjal te toyaj patun in cub te weye, il tiꞌj tuꞌn ttzaj tkꞌoꞌn jun ẍpoꞌk ex ka jun tal paloma. 15 Ctzajel tiꞌn pal aju chyuꞌj, cꞌelel tjawoꞌn twiꞌ ex cbel tpatun tibaj altar tel-lenxi tyatzꞌoꞌn tchcꞌel tiꞌj tcꞌuꞌj altar. 16 Cꞌeletz tiꞌn twabl chyuꞌj tucꞌix tcyakil ttzꞌilil at tuj, ex cꞌelex t-xoꞌn tumlal tjawitz kꞌij te altar, tuj lugar jatum nneꞌx ket tzaꞌj; 17 ex cbel tpicꞌchuꞌn ttzi t-xuꞌc chyuꞌj ex ctzajel ttzyuꞌn cyiꞌj ke tkꞌab, pero miꞌn cub tiꞌn tmij, ex te mancbilxitzun cbel tpatun chyuꞌj te oyaj tibaj siꞌ in cꞌant tuꞌn kꞌakꞌ tjax tibaj altar, te jun oyaj patun in cub at tcꞌocꞌjal in chin tzalaje tiꞌj.