2 Tuj tnejel kꞌij te tnejel xjaw cjawil twabana njaye, aju ja xbalun te mojbabl tibil. 3 Cꞌoquex tkꞌoꞌna cax cꞌubl nleye tuj, ex cbel tkꞌoꞌna xbalun te makbil tuj tmij ja, tuꞌntzun miꞌn tkꞌanchaꞌlin cax. 4 Cꞌoquex tkꞌoꞌna aju mes tuj, ex che bel tkꞌoꞌna tuj ttxolil keju che bel ten tibaj. Ax icx cꞌoquex tkꞌoꞌna aju cycubil candil ex che oquel ttxakoꞌna ke candil. 5 Cbel tkꞌoꞌna aju altar kꞌan pwak ttxꞌotxꞌil te patbil storac twitz cax cꞌubl nleye, ex cjawil tyobina xbalun ttzi njaye. 6 Te tibajxi cbel tkꞌoꞌna aju altar te patbil chojbil twitz ttzi njaye, aju ja xbalun te mojbabl tibil. 7 Cbeltzun tkꞌoꞌna aju tcubil aꞌ t-xol ja xbalun te mojbabl tibil tucꞌil altar, ex cbelex tnojsaꞌna tuꞌn aꞌ. 8 Cbel tbinchaꞌna jun ttxaꞌn peꞌn tiꞌjele ex cjawil tyobina xbalun te makbil ttzi peꞌn.

9 Ctzajeltzun tiꞌna aju aseyt in ajben oc toc toclen jun xjal, cbel tkoꞌna chꞌin tibaj njaye ex tibaj tcyakilju tocx tuj. Tcyakilju in ajben tuj, cxjansetel tuꞌna ex cꞌoquel te xjan. 10 Ax icx cbel tkoꞌna chꞌin aseyt tibaj altar te patbil chojbil, ex cyibaj cycyakil ke macbil in che ajben tiꞌj. Cxjanseteltzun tuꞌna ex cꞌoquel te jun altar xjanxix. 11 Ax icx cbel tkoꞌna chꞌin aseyt tibaj tcubil aꞌ ex tibaj tkꞌukbil, ex cxjanseteltzun tuꞌna.

12 Cxeltzun tiꞌna Aarón cyucꞌix ke tcyꞌajal ttzi ja xbalun te mojbabl tibil, ex che bajel ttxꞌjoꞌna tuꞌn aꞌ. 13 Che oquel tkꞌoꞌna ke xbalun xjan tiꞌj Aarón, cbel tkoꞌna aseyt tibaj twiꞌ ex cxjansetel tuꞌna tuꞌn toc te pal te weye. 14 Te tibajxi che pol tlakꞌbaꞌna ke tcyꞌajal, ex cꞌoquel tkꞌoꞌna ke ẍjoꞌw cyiꞌj. 15 Cbel tkoꞌna aseyt tibaj cywiꞌ, ic tzaꞌn cub tkoꞌna aseyt tibaj twi cyman, ex che oquel te pal te weye. Cꞌoqueltzun cyoclen te pal, ex aju cyoclen lu cucx ctel te jumajx tuj tcyakil tabkꞌiyil, chi Kman.

16 O tbincha Moisés tcyakil ic tzaꞌn otok tzaj tmaꞌn Kman te. 17 Tuj tnejel kꞌij te tnejel xjaw te tcabin abkꞌi cyetzlen aj Israel tuj Ejipt, jaw wabit tja Dios. 18 Tej tjaw twaban Moisés tja Dios, e cub tkꞌoꞌn ke tkꞌukbil, e oc ttxolbaꞌn ke tzꞌlom, e oc tkꞌoꞌn ke tzeꞌ te tkꞌeꞌlil, ex e cuꞌx tkꞌoꞌn ke tkan. 19 Jax tkꞌoꞌn xbalun twi tja Dios ex jax tkꞌoꞌn juntl tmaksil tibaj, ic tzaꞌn otok tzaj tmaꞌn Kman te.

20 Tzajtzun tiꞌn Moisés aju ley ex cuꞌx tkꞌoꞌn tuj cax. E oc tkꞌoꞌn ke tzeꞌ tolin cyiꞌj tiꞌj cax ex cub tkꞌoꞌn tmaksil. 21 Ocxtzun tkꞌoꞌn Moisés aju cax cꞌubl tley Dios tuj ja xbalun, ex cub tkꞌoꞌn xbalun te makbil tuj tmij ja tuꞌntzun miꞌn tkꞌanchaꞌlin cax, ic tzaꞌn otok tzaj tmaꞌn Kman te.

22 Ocx tkꞌoꞌn aju mes tuj ja xbalun te mojbabl tibil, tuj tumlal tbankꞌab kꞌij ex tiꞌjtzi xbalun te makbil, 23 ex tibaj mes lu, e cub ttxolbaꞌn ke pan in che cub kꞌoꞌn twitz Kman, ic tzaꞌn otok tzaj tmaꞌn Kman te.

24 Ocx tkꞌoꞌn aju cycubil candil tuj ja xbalun te mojbabl tibil, tuj tumlal tnayaj kꞌij, twitz mes ex tiꞌjtzi xbalun te makbil, 25 ex e oc ttxakoꞌn ke candil twitz Kman, ic tzaꞌn otok tzaj tmaꞌn Kman te.

26 Ocx tkꞌoꞌn aju altar kꞌan pwak ttxꞌotxꞌil te patbil storac tuj ja xbalun te mojbabl tibil, twitz xbalun te makbil, 27 ex cub tpatun storac at tcꞌocꞌjal tibaj, ic tzaꞌn otok tzaj tmaꞌn Kman te.

28 Jaw tyobin aju xbalun ttzi tja Dios. 29 Cub tkꞌoꞌn aju altar te patbil chojbil twitz ttzi tja Dios, aju ja xbalun te mojbabl tibil, ex e cub tpatun ke alumaj tibaj, tucꞌix twitz awal, te jun oyaj te Kman, ic tzaꞌn otok tzaj tmaꞌn te.

30 Cub tkꞌoꞌn aju tcubil aꞌ t-xol ja xbalun te mojbabl tibil tucꞌil altar, ex cuꞌx tnojsaꞌn tuꞌn aꞌ te txꞌajbil. 31 Atzun in che el ttxꞌjoꞌntok tkꞌab Moisés cyucꞌix ke tkan, icx te Aarón ex ke tcyꞌajal. 32 Oc cyocx tuj ja xbalun te mojbabl tibil ex oc cypon lakꞌeꞌ tiꞌj altar, tnejel in che txꞌajintok, ic tzaꞌn otok tzaj tmaꞌn Kman te Moisés.

33 Te bajsbil oc tkꞌoꞌn Moisés peꞌn tiꞌjele tja Dios, ex tiꞌjele ttxaꞌn tpeꞌn jatum tcub altar te patbil chojbil, ex jaw tyobin aju xbalun ttzi peꞌn. Cyjaꞌtzun tten baj bant aju akꞌuntl tuꞌn Moisés.

34 Cub ten muj tibaj ja xbalun te mojbabl tibil ex o noj tuj tuꞌn tajwalil Kman. 35 Mintiꞌ o bant tuꞌn tocx Moisés tuj ja xbalun te mojbabl tibil, porque otok cub ten muj tibaj ex nojnitok tuj tuꞌn tajwalil Kman. 36 Oc tjaw lakꞌeꞌ muj tibaj ja xbalun te mojbabl tibil, in jaw cyiꞌntok aj Israel cyja ex in che icꞌ bettok. 37 Katzun mintiꞌ in jaw lakꞌeꞌ muj, mintiꞌ in jaw cyiꞌn cyja, ex maxi in che icꞌ bet oc tjaw lakꞌeꞌ muj. 38 Te kꞌijl in cub tentok aju muj te Kman tibaj ja xbalun te mojbabl tibil, atzun te konicꞌan in cub tentok kꞌakꞌ tibaj, ex kꞌanchaꞌltok jlu cywitz cycyakil aj Israel. Iclex tten tcyakil maj oc cyicꞌ bet ex nok jatum oc cycub ten.