GÉNESIS
Tej tbant tcyakil tuꞌn Dios
1
T-xe tnejel cub tbinchaꞌn Dios cyaꞌj ex txꞌotxꞌ. 2 Mintiꞌtok ttxolil txꞌotxꞌ, ex mintiꞌtok at twitz; attok klolj tibaj mar maꞌ t-xeꞌ, ex in yucchtok T-xew Dios tibaj aꞌ.3 Tmatzun Dios: E tbant spicꞌun.
Banttzun spicꞌun. 4 O til Dios baꞌn eꞌla spicꞌun, ex el tpaꞌn spicꞌun tiꞌj klolj. 5 Kꞌijl tbi spicꞌun oc tkꞌoꞌn; atzun klolj, konicꞌan tbi oc tkꞌoꞌn. Extzun jun kꞌij tucꞌix jun konicꞌan; ex atzun tnejel kꞌij jlu.
6 Tmatl Dios: E tbant jun pabl tib t-xol aꞌ, tuꞌn tel tpaꞌn tib txkan aꞌ tiꞌj txkantl.
Ictzun tten o bant. 7 Tbincha Dios pabl tib t-xol aꞌ. Txkan aꞌ cyaj tjakꞌ pabl tib, ex txkantl aꞌ cyaj tibaj pabl tib. 8 Twitz cyaꞌj tbi pabl tib oc tkꞌoꞌn. Extzun juntl kꞌij tucꞌix juntl konicꞌan; ex atzun tcabin kꞌij jlu.
9 Tmatl Dios: E tcub tchmon tib tuj junx lugar tcyakil aꞌ at tjakꞌ twitz cyaꞌj, ex e tcyaj kꞌanchaꞌl aju tzkij.
Ictzun tten o bant. 10 Txꞌotxꞌ tbi aju tzkij oc tkꞌoꞌn; atzun aꞌ otok cub tchmon tib, mar tbi oc tkꞌoꞌn.
O til Dios baꞌn eꞌla jlu. 11 Tmatl Dios: E ttzaj pokꞌl cꞌul twitz txꞌotxꞌ tucꞌix tcyakil wik awal in tkꞌoꞌn tiyjil, ex tzeꞌ in tkꞌoꞌn twitz ex at tiyjil tuj, teyle te junjun tiyjil.
Ictzun tten o bant. 12 Jaw pokꞌl cꞌul twitz txꞌotxꞌ, tucꞌix tcyakil wik awal in tkꞌoꞌn tiyjil, ex tzeꞌ in tkꞌoꞌn twitz ex at tiyjil tuj, teyle te junjun tiyjil. O til Dios baꞌn eꞌla jlu. 13 Extzun juntl kꞌij tucꞌix juntl konicꞌan; atzun toxin kꞌij jlu.
14 Tmatl Dios: E cybant kꞌol spicꞌun twitz cyaꞌj, tuꞌn tel cypaꞌn kꞌijl tiꞌj konicꞌan, tuꞌn cyajben te cyechal tkꞌijlalil, kꞌijl ex abkꞌi, 15 ex tuꞌn cykoptzꞌaj twitz cyaꞌj, tuꞌn cykꞌonte spicꞌun twitz txꞌotxꞌ.
Ictzun tten o bant. 16 Tbincha Dios cabe nmak kꞌol spicꞌun, aju kꞌol spicꞌun mas matij tuꞌn t-spicꞌbante kꞌijl, atzun juntl chꞌin kꞌol spicꞌun tuꞌn t-spicꞌbante konicꞌan. Ax icx tbincha ke cheꞌw. 17 E oc tkꞌoꞌn Dios twitz cyaꞌj tuꞌn cykꞌonte spicꞌun twitz txꞌotxꞌ 18 kꞌijl ex konicꞌan, ex tuꞌn tel cypaꞌn spicꞌun tiꞌj klolj. O til Dios baꞌn eꞌla jlu. 19 Extzun juntl kꞌij tucꞌix juntl konicꞌan; ex atzun tcyajin kꞌij jlu.
20 Tmatl Dios: E cypokꞌl nim cyajlal txcup tuꞌn cyyucch tuj aꞌ, ex e cypokꞌl chyuꞌj ex txkantl jil tuꞌn cylipan twitz cyaꞌj.
21 Tbinchatzun Dios ke nmak txcup tuj mar ex cycyakil ke jil nim cyajlal in che yucch tuj, akeju ax e pokꞌl tuj mar, teyle te junjun tiyjil, ax icx ke chyuꞌj ex ke txkantl txcup in che lipan twitz cyaꞌj, teyle te junjun tiyjil. O til Dios baꞌn eꞌla jlu. 22 E cubtzun tcyꞌiwlaꞌn ex tma cyjaꞌ: Che pokꞌlxe, chmet-x cybaje ex cynojsame mar; ex e tchmet cybaj chyuꞌj twitz txꞌotxꞌ ex txkantl jil in che lipan twitz cyaꞌj, chi Dios. 23 Extzun juntl kꞌij tucꞌix juntl konicꞌan; ex atzun tjweꞌyin kꞌij jlu.
24 Tmatl Dios: E cypokꞌl alumaj twitz txꞌotxꞌ, teyle te junjun tiyjil, ex txcup in xi cyjakuꞌn cycꞌuꞌj twitz txꞌotxꞌ, ex txkantl txcup ateꞌ twitz txꞌotxꞌ, teyle te junjun tiyjil.
Ictzun tten o bant. 25 Tbincha Dios ke txcup twitz txꞌotxꞌ, teyle te junjun tiyjil, ke alumaj, teyle te junjun tiyjil, ex cycyakil txcup in xi cyjakuꞌn cycꞌuꞌj twitz txꞌotxꞌ, teyle te junjun tiyjil. O til Dios baꞌn eꞌla jlu.
26 Tmatl Dios: Kbinchan cub xjal ic tzaꞌnx ke kilbilal, ic tzaꞌnx ke ko queꞌyin, ex e tten tcawbil cyibaj cyiẍ tuj mar, cyibaj chyuꞌj ex txkantl jil in che lipan twitz cyaꞌj, cyibaj alumaj, tibaj tcyakil twitz txꞌotxꞌ, ex cyibaj txcup in xi cyjakuꞌn cycꞌuꞌj twitz txꞌotxꞌ.
27 Cubtzun tbinchaꞌn Dios xjal ic tzaꞌnx te tilbilal, ic tzaꞌnx tilbilal Dios cub tbinchaꞌn; xinak ex xuꞌj e cub tbinchaꞌn.
28 E cubtzun tcyꞌiwlaꞌn ex xi tmaꞌn cye cyjaꞌ: Che cꞌwaꞌline, chmet-x cybaje, cynojsame twitz txꞌotxꞌ ex che cawine tibaj. Cbel ten cycawbile cyibaj cyiẍ tuj mar, cyibaj chyuꞌj ex txkantl jil in che lipan twitz cyaꞌj, ex cyibaj cycyakil txcup ateꞌ twitz txꞌotxꞌ.
29 Tmatltzun Dios cye cyjaꞌ: Ma txi nkꞌoꞌne cyeye tcyakil awal in tkꞌoꞌn tiyjil, aju tcub tuj tcyakil twitz txꞌotxꞌ, ex tcyakil tzeꞌ in tkꞌoꞌn twitz ex at tiyjil tuj. Atzun cxeꞌl cynicꞌbeꞌne. 30 Atzun cye cycyakil txcup ateꞌ twitz txꞌotxꞌ, cyucꞌix ke chyuꞌj ex txkantl jil in che lipan twitz cyaꞌj, cyucꞌix keju in xi cyjakuꞌn cycꞌuꞌj twitz txꞌotxꞌ, cycyakil keju itzꞌ ke, chaꞌx cꞌul cꞌoquel te cywa, chi Dios.