4 Ictzun tten txꞌolbabl tiꞌj cyaꞌj ex txꞌotxꞌ tej cybant tuꞌn Kman Dios.

Tej tcub tbinchaꞌn Dios txꞌotxꞌ ex cyaꞌj, 5 mintiꞌtok jun awal twitz txꞌotxꞌ, ex naꞌnxtok ttzaj pokꞌl cꞌul, tuꞌnju naꞌnxtok ttzaj tkꞌoꞌn Kman Dios jbal, ex mi aꞌltok jun xjal tuꞌn toc ten akꞌnal twitz txꞌotxꞌ. 6 Masque mintiꞌtok jbal, pero ax tuj txꞌotxꞌ in jatz jlettok xmuꞌs, ex atzun jlu in aꞌlin twitz txꞌotxꞌ. 7 Cubtzun tbinchaꞌn Kman Dios xinak tiꞌj tkukil txꞌotxꞌ, ex ocx t-xupin Dios t-xew tuj ttxaꞌn tuꞌn tkꞌonte tchwinklal. Ictzun tten oc xjal te itzꞌ.

8 Cubtzun tkꞌoꞌn Kman Dios txkan awal tuj Edén tuj tjawitz kꞌij, ex atzun cub tkꞌoꞌn aju xinak otok cub tbinchaꞌn. 9 Jawtzun tchꞌisan Kman Dios tuj txꞌotxꞌ lu tcyakil wik tzeꞌ tbanilxix queꞌyin ex baꞌn tloꞌnjtz twitz, ax icx jaw tchꞌisan tuj tmij awal aju tzeꞌ in tkꞌoꞌn chwinklal, tucꞌix aju tzeꞌ tuꞌn tel nicꞌbaj tiꞌj baꞌn ex tiꞌj mya baꞌn.

10 Tuj Edén nneꞌtztok jun nima, atzun in baj aꞌlintok t-xol awal. Tetzlenxi tuj Edén, nneꞌltok tpaꞌn tib, cyaje nima nneꞌltok. 11 Aju tnejel nima Pisón tbi; atzunju in baj tbetintok tiꞌjele tcyakil txꞌotxꞌ Havila tbi, jatum at kꞌan pwak. 12 Tbanilxix aju kꞌan pwak at tuj txꞌotxꞌ lu, ax icx atzun in cnet tkꞌolil tzeꞌ tbanilxix tcꞌocꞌjal, tucꞌix abj tbanilxix, ónice tbi. 13 Aju tcabin nima Gihón tbi; atzunju in baj tbetintok tiꞌjele tcyakil txꞌotxꞌ Cus tbi. 14 Aju toxin nima Tigris tbi; atzunju in baj tbetintok tuj tjawitz kꞌij ttziꞌyile txꞌotxꞌ Asiria. Aju tcyajin nima Éufrates tbi.

15 Tejtzun tocx tkꞌoꞌn Kman Dios aju xinak t-xol awal tuj Edén tuꞌn toc ten akꞌnal tiꞌj ex tuꞌn toc tcꞌujlaꞌn, 16 xi tmaꞌn te cyjaꞌ: Baꞌn t-xi tloꞌna twitz tcyakil tzeꞌ at tuj tkan awal; 17 atzunju twitz tzeꞌ tuꞌn tel nicꞌbaj tiꞌj baꞌn ex tiꞌj mya baꞌn, miꞌn txi tloꞌna; katzun ma txi tloꞌna, ax toc cymela, chi Dios te.

18 Tmatzun Kman Dios cyjaꞌ: Mya baꞌn tuꞌn tten xinak tjunal. Cbel nbinchaꞌne jun tucꞌil te onil te, chi Dios. 19 Tcyakil txcup ex tcyakil chyuꞌj, tucꞌix tcyakil jil in lipan twitz cyaꞌj, akeju otok che cub tbinchaꞌn Kman Dios tiꞌj txꞌotxꞌ, e tzaj tiꞌn twitz xinak, Adán tbi, tuꞌntzun toc tkꞌoꞌn Adán cybi; ex teyle te junjun oc tbi ic tzaꞌnx oc tkꞌoꞌn. 20 Oc tkꞌoꞌn Adán cybi alumaj, cybi chyuꞌj ex txkantl jil in che lipan twitz cyaꞌj ex cybi txkantl txcup ateꞌ tjakꞌ cꞌul, pero cyxol cycyakil txcup lu, mintiꞌ cnet jun tucꞌil te onil te. 21 Tzajtzun tiꞌn Kman Dios nim watl tuj twitz Adán, ex tej in tantok, jatz tiꞌn Dios jun t-xuꞌc ex cyaj tmojbaꞌn jatum otok jatz tiꞌn. 22 Tiꞌjtzun xuꞌcbaj lu, cub tbinchaꞌn Kman Dios jun xuꞌj. Tzajtzun tiꞌn twitz Adán. 23 Tej ttil Adán aju xuꞌj, tma cyjaꞌ:

Ate jlu cꞌoquel tbi xuꞌj, tuꞌnju tiꞌjx xinak ma jatz kꞌiꞌn, chi Adán.

24 Tuꞌntzun jlu, cyjel tkꞌoꞌn xinak tman ex ttxuꞌ, cꞌoqueltzun mojeꞌ tucꞌil t-xuꞌjil, ex cycabil che oquel te junx.

25 Cycabil xjal lu, ate Adán ex t-xuꞌjil, mintiꞌtok cyxbalun tocsaꞌn, pero mintiꞌtok in tzaj cychꞌixwi.