—¿Maj o tzaj tmaꞌn Dios cyeye tuꞌn miꞌn t-xi cyloꞌne twitz tcyakil tzeꞌ cyxol awal lu? Chi lobaj.

2 Xitzun ttzakꞌweꞌn xuꞌj te lobaj cyjaꞌ:

—Baꞌn t-xi kloꞌne cywitz tzeꞌ cyxol awal lu, 3 atzun tiꞌj twitz tzeꞌ tcub tuj tmij awal tzaj tmaꞌn Dios cyjaꞌ: Miꞌn txi cyloꞌne ex miꞌn tzꞌoc cymacoꞌne, tuꞌntzun miꞌn cycyime, chi Dios keye.

4 Xitzun tmaꞌn lobaj te xuꞌj cyjaꞌ:

—Mlay che cyime. 5 Porque ojtzkiꞌn tuꞌn Dios, oc t-xi cyloꞌne twitz tzeꞌ lu, cjaketel cynable, che oquele ic tzaꞌn te Dios ex cꞌelel cynicꞌe tiꞌj baꞌn ex tiꞌj mya baꞌn, chi lobaj.

6 Tej ttil xuꞌj baꞌntok tloꞌnjtz twitz tzeꞌ, tbaniltok queꞌyin ex attok tajben tuꞌn toc tnabl, eltzun tiꞌn twitz tzeꞌ ex xi tloꞌn; ax icx xi tkꞌoꞌn te tchmil. Ax icx te xi tloꞌn. 7 Jakettzun cynabl ex el cynicꞌ cyiꞌj mintiꞌtok cyxbalun tocsaꞌn. Bajtzun cyslapun ke t-xak higo te cylanter te txaybil cye.

8 Xi tbiꞌn Adán tucꞌix t-xuꞌjil in bettok Kman Dios t-xol awal tej otok chewix kꞌij te kale. Xitzun cyewan cyib twitz Kman Dios cyxol tkan awal. 9 Octzun ten Kman Dios txcolte Adán, chi cyjaꞌ:

—¿Jatum taꞌya?

10 Xitzun ttzakꞌweꞌn Adán cyjaꞌ:

—Ma nbiye in bettoka t-xol awal ex ma tzaj nxobile tuꞌnju mintiꞌ txaybil weye tocsaꞌn. Tuꞌntzun jlu ma txi wewan wibe twitza, chi Adán.

11 Xitzun tmaꞌn Dios te cyjaꞌ:

—¿Alcye ma kꞌmante teya tuꞌnju mintiꞌ txaybil teya tocsaꞌn? ¿Kape ma txi tloꞌna twitz tzeꞌ o txi nmaꞌne teya tuꞌn miꞌn txi tloꞌna?

12 Xitzun ttzakꞌweꞌn Adán cyjaꞌ:

—Aju xuꞌj tzaj tkꞌoꞌna te wucꞌile, atzunju saj kꞌonte twitz tzeꞌ weye, ex ma txi nloꞌne.

13 Xitzun tmaꞌn Kman Dios te xuꞌj cyjaꞌ:

—¿Alcye ma tbinchaya?

Xitzun tmaꞌn xuꞌj cyjaꞌ:

—Aju lobaj ma sbunte weye, ex ma txi nloꞌne.

14 Xitzun tmaꞌn Kman Dios te lobaj cyjaꞌ:

—Tuꞌnju ma tbinchaya jlu, oꞌcx teya cbel tcastiwoya cyxol cycyakil alumaj ex cyxol cycyakil txcup ateꞌ tuj cꞌul. Oc tbeta, cxeꞌl tjakuꞌn tcꞌuꞌja twitz txꞌotxꞌ, ex kuk cxel tloꞌna cyuj cycyakil kꞌij ctela twitz txꞌotxꞌ. 15 Cbel nkꞌoꞌne kꞌoj cyxole tucꞌil xuꞌj, ex cyxol tiyjila tucꞌil tiyjil xuꞌj. Aju tiyjil xuꞌj cbel paꞌn twiꞌya tuꞌn, atzun teya cꞌoquel ttxꞌaꞌna t-xe tkan, chi Dios.

16 Xitzun tmaꞌn te xuꞌj cyjaꞌ:

—Cꞌoquel nkꞌoꞌne mas nim taꞌw tiꞌja oc cyul itzꞌj tala, ex tucꞌil cꞌixcꞌoj che ul itzꞌj tala. Nim oc tajbeya tchmila, atzun tchmila ccawil tibaja, chi Dios.

17 Xitzun tmaꞌn te Adán cyjaꞌ:

—Tuꞌnju ma txi tnimana tyol t-xuꞌjila, ex ma txi tloꞌna twitz tzeꞌ aju xi nmaꞌne teya: Miꞌn txi tloꞌna twitz, nchitzune, jaꞌlotzun cbel t-sentens txꞌotxꞌ tuꞌn tlaja; tucꞌil sictleꞌn ccnetel twaya twitz txꞌotxꞌ cyuj cycyakil kꞌij ctela twitz. 18 Tzul tpokꞌsaꞌn txꞌotxꞌ chꞌiꞌx cꞌul ex txkantl cꞌul cyxol tawala ex cxel tchyoꞌna itzaj at tuj cojbil. 19 Cꞌelel aꞌ tiꞌj twiꞌya tuꞌn tcnet twaya ocxi taj meltzꞌaja tuj txꞌotxꞌ, porque tiꞌj txꞌotxꞌ cub binchaꞌna; tkukil txꞌotxꞌa, ex ax tkukil txꞌotxꞌ cꞌoquela oc tcyima, chi Dios.

20 Eva tbi t-xuꞌjil Adán oc tkꞌoꞌn tuꞌnju atzun cꞌoquel te cytxuꞌ cycyakil xjal che ul itzꞌj. 21 Cyiꞌj cytzꞌumal alumaj cub tbinchaꞌn Kman Dios t-xbalun Adán tucꞌix te t-xuꞌjil, octzun tkꞌoꞌn cyiꞌj. 22 Tma Kman Dios cyjaꞌ:

—Lu ma tzꞌoc Adán ic tzaꞌn jun ke. Ma tzꞌel tnicꞌ tiꞌj baꞌn ex tiꞌj mya baꞌn. Jaꞌlotzun, mya yajcu txi tnukpiꞌn tkꞌab tiꞌj ju tzeꞌ in tkꞌoꞌn chwinklal tuꞌn t-xi tloꞌn twitz, ex jacu tzꞌankꞌin te jumajx, chi Dios.

23 Tuꞌntzun jlu etz tlajoꞌn Kman Dios Adán tuj awal Edén tbi, tuꞌn tbaj takꞌnaꞌn txꞌotxꞌ jatum jatz kꞌiꞌn ttxꞌotxꞌil. 24 Tejtzun tetz tlajoꞌn, e cub tkꞌoꞌn querubín ttxlaj awal tuj tjawitz kꞌij, tucꞌix jun spad in cꞌanttok ex in yucchtok tuj tcyakil pacꞌ, tuꞌntzun miꞌn cyocx xjal tiꞌj ju tzeꞌ in tkꞌoꞌn chwinklal.