Caín ex Abel
4
Mojeꞌtzun Adán tucꞌil Eva aju t-xuꞌjil. Octzun ten tal Eva, ex ul itzꞌj jun tal, Caín tbi oc. Tmatzun Eva cyjaꞌ: Ma tzul itzꞌj jun wale xinak. A Kman ma tzaj kꞌonte te, chi Eva. 2 Ul itzꞌj juntl tal, Abel tbi oc, titzꞌin Caín. Ate Abel oc pastoril ẍneꞌl; atzunte Caín akꞌnal tiꞌj txꞌotxꞌ.3 Eltzun tyemp. At jun kꞌij tzaj tiꞌn Caín twitz tawal tuꞌn t-xi tkꞌoꞌn te jun oyaj te Kman. 4 Ax icx te Abel e tzaj tiꞌn ke cynejel cyal t-ẍneꞌl akeju tbanilxix. Tzajtzun tqueꞌyin Kman ex o tzalaj tiꞌj Abel tucꞌix tiꞌj toyaj. 5 Atzun tiꞌj Caín ex tiꞌj toyaj, mintiꞌ o tzalaj Dios. Tzajtzun nim tkꞌoj Caín ex miyalnix oc twitz. 6 Tzajtzun tmaꞌn Kman te Caín: ¿Tikuꞌn ma tzaj tkꞌoja ex miyalnix ma tzꞌoc twitza? 7 Ka ma tbinchaya baꞌn, ¿mlaypelo cꞌmeta? Katzun miꞌn ma tbinchaya baꞌn, aju il lepch tiꞌja, ex in ayon tuꞌn tcub tiꞌja tuꞌn. Pero jacu cub tiꞌj tuꞌna, chi Kman.
8 At jun kꞌij xi tmaꞌn Caín te Abel aju titzꞌin:
—Koꞌ betel tuj cojbil, chi Caín.
Tejtzun cypon tuj cojbil, oc tzokpaj Caín tiꞌj Abel aju titzꞌin, ex cub tbyoꞌn. 9 Tzajtzun tkanin Kman te Caín:
—¿Jatum taꞌ Abel aju titzꞌina?
Xitzun ttzakꞌweꞌn Caín:
—Mintiꞌ biꞌn wuꞌne. ¿Baka cwentil wermaniye kine?
10 Tzajtzun tmaꞌn Kman te:
—¿Ti ma tbinchaya? Aju tchcꞌel titzꞌina ma cub twitz txꞌotxꞌ, mer ic tzaꞌn in schꞌin wiꞌje in tkanin tuꞌn tbinchet tiꞌj. 11 Tuꞌntzun jlu cbel tcastiwoya ex cꞌelex lajoꞌna tuj txꞌotxꞌ lu, aju ma txi cꞌante tchcꞌel titzꞌina ma cub tbyoꞌna. 12 Masque akꞌnana twitz txꞌotxꞌ, pero mlay tzaj tkꞌoꞌntl nim twitz tawala. Betin xjal cꞌoquela twitz txꞌotxꞌ ex mintiꞌ tuꞌn tojlana, chi Kman.
13 Xitzun ttzakꞌweꞌn Caín te Kman:
—Aju ncastiwoye lu maꞌxix, mlay tzicꞌx wuꞌne. 14 Jaꞌlo chin elex tkꞌoꞌna tiꞌjxi txꞌotxꞌ lu, mlay chin tentle tucꞌila, betin xjal chin oquele ex mintiꞌ tuꞌn wojlane. Cyjaꞌtzun, nok alcyex ma tzꞌoc noj wiꞌje, chin bel tbyoꞌn, chi Caín.
15 Tzajtzun ttzakꞌweꞌn Kman:
—Miꞌn. Alcye ma cub byonte teya, cbel tcastiw wuk maj, chi Kman.
Octzun tkꞌoꞌn Kman jun techal tiꞌj Caín tuꞌntzun miꞌn tcub byoꞌn tuꞌn jun xjal oc toc noj tiꞌj. 16 Extzun Caín twitz Kman ex ax najan tuj txꞌotxꞌ Nod, tuj tjawitz kꞌij ttxlaj Edén.
Ke tiyjil Caín
17 Mojeꞌtzun Caín tucꞌil t-xuꞌjil. Octzun ten tal t-xuꞌjil ex ul itzꞌj jun tal, Enoc tbi oc. Cubtzun tbinchaꞌn Caín jun tnam, ex Enoc tbi oc tkꞌoꞌn, ic tzaꞌnx tbi tcꞌwaꞌl. 18 Ate Enoc tman Irad; Irad tman Mehujael; Mehujael tman Metusael; Metusael tman Lamec. 19 Cabe t-xuꞌjil Lamec ten. Ada tbi jun ex Zila tbi juntl. 20 Ultzun itzꞌj jun tal Ada, Jabal tbi oc, ex atzun cyxeꞌchel keju najl tjakꞌ ja xbalun, ke chꞌisal cye alumaj. 21 At jun titzꞌin Jabal, Jubal tbi, ex atzun cyxeꞌchel cycyakil ke chimbal tiꞌj arpa ex xux. 22 Ax icx te Zila ul itzꞌj jun tal, Tubal-caín tbi oc. Oc te txꞌinol cꞌuxbil ex binchal macbil tiꞌj cꞌuxbil ex kꞌan cꞌuxbil. Attok jun tanb Tubal-caín, Naama tbi.
23 At jun kꞌij xi tmaꞌn Lamec cye t-xuꞌjil cyjaꞌ:
Akeye nxuꞌjile, Ada ex Zila, cybintze aju cxel nmaꞌne: Cub nbyoꞌne jun xinak tuꞌnju oc tcꞌixbisaꞌn kine; cub nbyoꞌne jun cuꞌxun tuꞌnju oc tbajuꞌn kine.
24 Ka at jun ma cub byonte Caín, wuk maj cꞌoquel t-xel tiꞌj, atzun weye, ka ma chin oc cꞌixbisaꞌne tuꞌn juntl, 77 maj cꞌoquel t-xel tiꞌj, chi Lamec.
Aju toxin tcyꞌajal Adán
25 Cubtzun tantl Adán tucꞌil t-xuꞌjil. Ul itzꞌj juntl tal t-xuꞌjil, Set tbi oc tkꞌoꞌn. Tmatzun Eva: Ma tzaj tkꞌoꞌn Dios juntl wale te t-xel Abel aju cub tbyoꞌn Caín, chi Eva.
26 Ax icx te Set ul itzꞌj jun tcyꞌajal, Enós tbi oc tkꞌoꞌn. Axtzun tkꞌijlalil lu tzyet cynaꞌn xjal Dios, ajben tbi Kman cyuꞌn.