Tej tcub tbinchaꞌn Dios xjal, cub tbinchaꞌn ic tzaꞌnx te tilbilal; 2 xinak ex xuꞌj e cub tbinchaꞌn ex e cub tcyꞌiwlaꞌn. Xjal cybi oc tkꞌoꞌn tuj kꞌij tej cycub tbinchaꞌn.

3 Otok japun Adán twiꞌ 130 abkꞌi tej tul itzꞌj jun tcyꞌajal ic tzaꞌnx te queꞌyin ex ic tzaꞌnx te tilbilal. Set tbi oc tkꞌoꞌn. 4 Titzꞌjlenxi Set, ankꞌintl Adán wajxak syenttl abkꞌi ex e ul itzꞌjtl tcyꞌajal ex tmeꞌjel. 5 Ten Adán twitz txꞌotxꞌ tuꞌn tcyakil 930 abkꞌi ex cyim.

6 Otok japun Set twiꞌ 105 abkꞌi tej tul itzꞌj Enós aju tcyꞌajal. 7 Titzꞌjlenxi Enós, ankꞌintl Set 807 abkꞌi ex e ul itzꞌjtl tcyꞌajal ex tmeꞌjel. 8 Ten Set twitz txꞌotxꞌ tuꞌn tcyakil 912 abkꞌi ex cyim. 9 Otok japun Enós twiꞌ 90 abkꞌi tej tul itzꞌj Cainán aju tcyꞌajal. 10 Titzꞌjlenxi Cainán, ankꞌintl Enós 815 abkꞌi ex e ul itzꞌjtl tcyꞌajal ex tmeꞌjel. 11 Ten Enós twitz txꞌotxꞌ tuꞌn tcyakil 905 abkꞌi ex cyim.

12 Otok japun Cainán twiꞌ 70 abkꞌi tej tul itzꞌj Mahalaleel aju tcyꞌajal. 13 Titzꞌjlenxi Mahalaleel, ankꞌintl Cainán 840 abkꞌi ex e ul itzꞌjtl tcyꞌajal ex tmeꞌjel. 14 Ten Cainán twitz txꞌotxꞌ tuꞌn tcyakil 910 abkꞌi ex cyim.

15 Otok japun Mahalaleel twiꞌ 65 abkꞌi tej tul itzꞌj Jared aju tcyꞌajal. 16 Titzꞌjlenxi Jared, ankꞌintl Mahalaleel 830 abkꞌi ex e ul itzꞌjtl tcyꞌajal ex tmeꞌjel. 17 Ten Mahalaleel twitz txꞌotxꞌ tuꞌn tcyakil 895 abkꞌi ex cyim.

18 Otok japun Jared twiꞌ 162 abkꞌi tej tul itzꞌj Enoc aju tcyꞌajal. 19 Titzꞌjlenxi Enoc, ankꞌintl Jared wajxak syenttl abkꞌi ex e ul itzꞌjtl tcyꞌajal ex tmeꞌjel. 20 Ten Jared twitz txꞌotxꞌ tuꞌn tcyakil 962 abkꞌi ex cyim.

21 Otok japun Enoc twiꞌ 65 abkꞌi tej tul itzꞌj Matusalén aju tcyꞌajal. 22 Titzꞌjlenxi Matusalén, bettl Enoc tucꞌil Dios ox syenttl abkꞌi ex e ul itzꞌjtl tcyꞌajal ex tmeꞌjel. 23 Ten Enoc twitz txꞌotxꞌ tuꞌn tcyakil 365 abkꞌi. 24 O bet Enoc tucꞌil Dios. At jun kꞌij nok cub naj tuꞌnju o tzꞌaj kꞌiꞌn tuꞌn Dios.

25 Otok japun Matusalén twiꞌ 187 abkꞌi tej tul itzꞌj Lamec aju tcyꞌajal. 26 Titzꞌjlenxi Lamec, ankꞌintl Matusalén 782 abkꞌi ex e ul itzꞌjtl tcyꞌajal ex tmeꞌjel. 27 Ten Matusalén twitz txꞌotxꞌ tuꞌn tcyakil 969 abkꞌi ex cyim.

28 Otok japun Lamec twiꞌ 182 abkꞌi tej tul itzꞌj jun tcyꞌajal. 29 Noé tbi oc tkꞌoꞌn ex tma cyjaꞌ: Tzaj tkꞌoꞌn Kman sentens tibaj txꞌotxꞌ. Tuꞌntzun jlu in ko akꞌnan nimxix. Atzunte cꞌwaꞌl lu cꞌelel kꞌinte akꞌuntl kiꞌj, ex ckebel kcꞌuꞌj tuꞌn, chi Lamec. 30 Titzꞌjlenxi Noé, ankꞌintl Lamec 595 abkꞌi, ex e ul itzꞌjtl tcyꞌajal ex tmeꞌjel. 31 Ten Lamec twitz txꞌotxꞌ tuꞌn tcyakil 777 abkꞌi ex cyim.

32 Otok japun Noé twiꞌ jweꞌ syent abkꞌi tej tul itzꞌj Sem, Cam ex Jafet, akeju tcyꞌajal.