Aju cyil xjal
6
Tejtzun cychmet xjal twitz txꞌotxꞌ, ex tej cyul itzꞌj cymeꞌjel, 2 o cyil ke tcyꞌajal Dios ke xuꞌj lu, tbanilxix ke. Etztzun cyjyoꞌn cyxuꞌjil cyxol ke txin lu ex e najan cyucꞌil keju at cygan cyiꞌj. 3 Tmatzun Kman cyjaꞌ: Mlay tzicꞌxtl cyil xjal wuꞌne tuꞌnju tkukil txꞌotxꞌ ke; oꞌcx 120 abkꞌi che tel twitz txꞌotxꞌ.4 Tuj tkꞌijlalil lu ateꞌtok xjal maꞌ cywaꞌl twitz txꞌotxꞌ, ax icx te tibajxi, tej cymojeꞌ ke tcyꞌajal Dios cyucꞌil cymeꞌjel xjal ex tzaj cycꞌwaꞌl cyiꞌj. Atzun ke jlu e oc nmak xjal ex nimxix nabl cye tuj tkꞌijlalil ojtxi.
5 Tejtzun tlonte Kman Dios mya baꞌntok cybinchben xjal twitz txꞌotxꞌ ex cucx in che ximantok oꞌcx tiꞌj mya baꞌn, 6 tzaj t-ximbetz tiꞌj cybantlen xjal tuꞌn, ex tzaj taꞌw tuj tanmi, 7 ex tma cyjaꞌ: Ke xjal o che bant wuꞌne twitz txꞌotxꞌ biꞌx che najel wuꞌne, cyucꞌix ke alumaj, cyucꞌix ke txcup in xi cyjakuꞌn cycꞌuꞌj twitz txꞌotxꞌ ex ke chyuꞌj ex txkantl txcup in che lipan twitz cyaꞌj, tuꞌnju ma tzul tilil wuꞌne cycublen nbinchaꞌne.
8 Atzunte Noé o tzalaj Kman tiꞌj.
Jaw tbinchaꞌn Noé jun barc matij
9 Atzun txꞌolbabl cyiꞌj tiyjil Noé.
Oꞌcx te Noé jun xinak tzꞌaklxix ex baꞌnxix cyxol cycyakil xjal e ankꞌin tuj tkꞌijlalil tej tten. O bet tucꞌil Dios. 10 Ul itzꞌj ox tcyꞌajal Noé, ake jlu: Sem, Cam ex Jafet.
11 Otok chmet il twitz txꞌotxꞌ tuj twitz Dios, puro txꞌuꞌj ke xjal, ex nojni tuj cyanmi tuꞌn kꞌoj. 12 O til Dios mya baꞌntok twitz txꞌotxꞌ tuꞌnju cycyakil xjal in cybinchaꞌntok mya baꞌn twitz txꞌotxꞌ. 13 Xitzun tmaꞌn Dios te Noé cyjaꞌ: Ma cub nximane tuꞌn cynaj cycyakil xjal tuꞌnju puro txꞌuꞌj ke ex nojni tuj cyanmi tuꞌn kꞌoj. Tuꞌntzun jlu che najel cycyakil xjal wuꞌne, tucꞌix twitz txꞌotxꞌ. 14 Binchama jun matij barc tiꞌj tzeꞌ tzis, binchama elaꞌ cwart tuj, ex loꞌtzin baja tuꞌn kꞌol tujxi ex tiꞌjxi. 15 Aju echbil te barc cbantel tuꞌna, atzun jlu: 150 var tnukbil, 25 var twitz, ex olaj var twaꞌl. 16 Binchama te ox col, tucꞌix ventan tiꞌjele te mey var twaꞌl, tcuꞌtz tjakꞌ twiꞌ, ex aju tlamel binchama tuj ttxlaj. 17 Ctzajel nkꞌoꞌne kꞌekab twitz txꞌotxꞌ, tuꞌntzun cynaj cycyakil keju itzꞌ ex at xewbaj cyuj. Tcyakilju at twitz txꞌotxꞌ cymel. 18 Atzun tucꞌila cbantel tiꞌj jun kyol, ex cꞌoquexa tuj matij barc cyucꞌix ke tcyꞌajala, tucꞌix t-xuꞌjila ex ke tliba. 19 Ax icx che oquex tkꞌoꞌna ke txcup tucꞌila tuj matij barc, jun tman ex jun ttxuꞌ tiꞌj teyle te junjun wik jnicꞌju at twitz txꞌotxꞌ, tuꞌntzun cycyaj clet junx tucꞌila. 20 Che oquex tucꞌila tuj matij barc cabe txcup tiꞌj teyle junjun wik: ke chyuꞌj cyucꞌix txkantl txcup in che lipan twitz cyaꞌj, ke alumaj, cyucꞌix ke txcup in xi cyjakuꞌn cycꞌuꞌj twitz txꞌotxꞌ, tuꞌntzun cycyaj clet. 21 Chmoma tcyakil wik wabj ex cꞌuꞌnxa, tuꞌntzun tajben te cywaye tucꞌix cye txcup, chi Dios te Noé.
22 Tbinchatzun Noé tcyakil ic tzaꞌnx o tzaj tmaꞌn Dios te.