Tej tbaj naj twitz txꞌotxꞌ tuꞌn aꞌ
7
Xi tmaꞌn Kman Dios te Noé cyjaꞌ: Tocxa tuj matij barc cyucꞌix keju ateꞌ tuj tjaya, tuꞌnju ma wile oꞌcx aya tzꞌaklxix cyxol xjal ateꞌ tuj tkꞌijlalil jaꞌlo. 2 Cyxol cycyakil wik txcup sak ke, che oquex tiꞌna wuk tman ex wuk ttxuꞌ; atzun keju tzꞌil ke, cꞌoquex tiꞌna nok oꞌcx jun tman ex jun ttxuꞌ. 3 Ax icx che oquex tiꞌna wuk tman ex wuk ttxuꞌ tiꞌj teyle junjun wik chyuꞌj ex txkantl txcup in che lipan twitz cyaꞌj, tuꞌntzun tcyaj clet cyiyjil twitz txꞌotxꞌ. 4 Porque tbajlenxi wuk kꞌij, tzul jbal wuꞌne kꞌijl ex konicꞌan tuj 40 kꞌij. Che najel wuꞌne cycyakil keju itzꞌ, akeju e cub nbinchaꞌne twitz txꞌotxꞌ. 5 Tbinchatzun Noé tcyakilju o tma Kman te.6 Otok japun Noé twiꞌ kak syent abkꞌi tej ttzaj nimxix aꞌ twitz txꞌotxꞌ. 7 Ocxtzun Noé tuj matij barc cyucꞌix ke tcyꞌajal, tucꞌix t-xuꞌjil ex ke tlib, tuꞌntzun miꞌn cynaj tuꞌn aꞌ. 8 Ke txcup sak ke ex keju tzꞌil ke, ke chyuꞌj ex txkantl txcup in che lipan twitz cyaꞌj ex keju in xi cyjakuꞌn cycꞌuꞌj twitz txꞌotxꞌ, 9 e ocx tucꞌil Noé tuj matij barc, jun tman ex jun ttxuꞌ, ic tzaꞌnx otok tma Dios.
10 Tujtzun twukin kꞌij tzajtzun nimxix aꞌ twitz txꞌotxꞌ. 11 Tuj abkꞌi tej tjapun Noé twiꞌ kak syent abkꞌi, tuj wuklaj tajlal tcabin xjaw, tujtzun kꞌij lu e jaket cycyakil ke twi aꞌ t-xe nintz mar, jaket ttzi cyaꞌj, ex tzaj kꞌekab. 12 Kꞌijl ex konicꞌan tuj 40 kꞌij cub kꞌekab twitz txꞌotxꞌ. 13 Tujx kꞌij lu ocx Noé tuj matij barc, tucꞌix Sem, Cam ex Jafet, akeju tcyꞌajal, tucꞌix t-xuꞌjil ex ke ox tlib. 14 Ax icx tcyakil wik txcup at tjakꞌ cꞌul, teyle te junjun tiyjil, tcyakil wik alumaj, teyle te junjun tiyjil, tcyakil wik txcup in xi cyjakuꞌn cycꞌuꞌj twitz txꞌotxꞌ, teyle te junjun tiyjil ex tcyakil wik chyuꞌj ex txkantl txcup in che lipan twitz cyaꞌj, teyle te junjun tiyjil, 15 e ocx tucꞌil Noé tuj matij barc, mojmoj cyten. 16 Tman ex ttxuꞌ te tcyakil wik keju e ocx, ic tzaꞌnx o tma Dios te Noé. Cyocxlenxi baj ke jlu, octzun tlamoꞌn Kman tlamel matij barc.
17 Tzajtzun nimxix aꞌ twitz txꞌotxꞌ tuj 40 kꞌij. O chꞌiy aꞌ ex jaw ikan matij barc tuꞌn. 18 Nim jaw chꞌiy aꞌ twitz txꞌotxꞌ ex jaw lakꞌeꞌ matij barc tibaj. 19 Nimxix jaw chꞌiy aꞌ ex japun baj cyibaj cycyakil witz mas maꞌ cywaꞌl ateꞌ twitz txꞌotxꞌ. 20 Jaw chꞌiy aꞌ wuk var tucꞌil mey cyibaj ke witz mas maꞌ cywaꞌl. 21 E najtzun cycyakil keju najl twitz txꞌotxꞌ: Ke chyuꞌj ex txkantl txcup in che lipan twitz cyaꞌj, ke alumaj, ke txcup te tjakꞌ cꞌul, ke txcup in xi cyjakuꞌn cycꞌuꞌj twitz txꞌotxꞌ ex cycyakil xjal. 22 E cyim cycyakil keju ateꞌtok twitz txꞌotxꞌ, akeju itzꞌtok ke ex in jatz cyxew. 23 Oꞌcx te Noé cyaj clet cyucꞌix keju ateꞌtok tucꞌil tuj matij barc; atzun ke mastl biꞌx e naj: Ke xjal, ke alumaj, ke chyuꞌj ex txkantl txcup in che lipan twitz cyaꞌj ex ke txcup in xi cyjakuꞌn cycꞌuꞌj twitz txꞌotxꞌ. 24 Atzunte aꞌ cyaj ten 150 kꞌij twitz txꞌotxꞌ.