Tej tweꞌ kꞌekab
8
Ultzun Noé tuj t-ximbetz Dios cyucꞌix cycyakil ke txcup ateꞌcxtok tucꞌil tuj matij barc. Tzaj tkꞌoꞌn Dios jun cykꞌikꞌ tibaj txꞌotxꞌ ex cub lakꞌeꞌ aꞌ; 2 e maket ke twi aꞌ t-xe nintz mar, maket ttzi cyaꞌj ex weꞌtzun jbal. 3 Chebale cub tiꞌj aꞌ. Tbajlenxi 150 kꞌij, otok cub lakꞌeꞌ aꞌ. 4 Atzun cub ten matij barc cywi witz tuj Ararat tuj wuklaj tajlal twukin xjaw. 5 Atzunte aꞌ in cub lakꞌeꞌtok, ex tuj tnejel kꞌij tuj tlajin xjaw, maxitzun tkꞌanchaꞌlin cywiꞌ junjun witz mas nmak cywaꞌl.6 Tbajlenxitzun 40 kꞌij, ocx tjakoꞌn Noé aju tventanil matij barc otok bant tuꞌn. 7 Etztzun ttzokpiꞌn jun joj; atzunte joj nok o lipan ticꞌ, nneꞌlxi lakꞌeꞌ ex nnuꞌlxi lakꞌeꞌ tiꞌj matij barc tejxi tcub tzkij aꞌ. 8 Te tibajxi joj, etz ttzokpiꞌn Noé jun paloma tuꞌntzun tqueꞌyinte ka otok tzkij aꞌ twitz txꞌotxꞌ. 9 Mintiꞌ cnet jatum tuꞌn tcub weꞌ tuꞌnju atxtok aꞌ twitz txꞌotxꞌ. Ajtzun meltzꞌaj jatum taꞌtok matij barc. Etz tkꞌoꞌn Noé tkꞌab tzyulte ex ocx tiꞌn tucꞌil.
10 Ayon Noé wuk kꞌijtl. Etztzun t-samaꞌn juntl maj aju paloma. 11 Chꞌixtok toc yupj tej tul meltzꞌaj paloma kꞌiꞌntok jun tal t-xak tzeꞌ olivo tuꞌn ttziꞌ. Tuꞌntzun jlu el tnicꞌ Noé tiꞌj cyjaꞌtok tcub tzkij aꞌ twitz txꞌotxꞌ. 12 Ayon Noé wuk kꞌijtl. Etztzun t-samaꞌn juntl maj aju paloma; atzunte paloma mintiꞌ ul meltzꞌaj juntl maj.
13 Tuj abkꞌi tej tjapun Noé twiꞌ 601 abkꞌi, tuj tnejel kꞌij tuj tnejel xjaw, tzkij twitz txꞌotxꞌ. Eltzun tiꞌn Noé aju tmaksil matij barc ex o til otok tzkij twitz txꞌotxꞌ. 14 Tuj 27 tajlal tcabin xjaw otok baj tzkij twitz txꞌotxꞌ. 15 Tzajtzun tmaꞌn Dios te Noé cyjaꞌ: 16 Tetza tuj matij barc, tucꞌix t-xuꞌjila, cyucꞌix ke tcyꞌajala ex ke tliba. 17 Kꞌiꞌmetza cycyakil ke txcup ateꞌ tucꞌila: Ke chyuꞌj ex txkantl txcup in che lipan twitz cyaꞌj, ke alumaj, ex ke txcup in xi cyjakuꞌn cycꞌuꞌj twitz txꞌotxꞌ, tuꞌn t-xi cysipan cyib twitz txꞌotxꞌ, tuꞌn cypokꞌl ex tuꞌn tchmet cybaj twitz txꞌotxꞌ, chi Dios. 18 Etztzun Noé, cyucꞌix ke tcyꞌajal, tucꞌix t-xuꞌjil ex ke tlib. 19 E jeꞌtz tuj matij barc cycyakil txcup in che yucch twitz txꞌotxꞌ, cycyakil keju in xi cyjakuꞌn cycꞌuꞌj ex keju in che lipan twitz cyaꞌj, teyle te junjun tiyjil. 20 Cubtzun tbinchaꞌn Noé jun altar te patbil chojbil twitz Kman, e tzaj tiꞌn ke txcup ex ke chyuꞌj sak ke, jun tiꞌj teyle junjun wik, ex e cub tpatun te jun oyaj tibaj altar. 21 Tejtzun tnaꞌnte Kman tbanilxix tcꞌocꞌjal oyaj, tma tuj tanmi cyjaꞌ: Mlay tzaj nkꞌoꞌntle sentens tibaj txꞌotxꞌ tuꞌn tlaj xjal, porque ate xjal atxix tuj tcuꞌxumal oꞌcx in ximan tiꞌj mya baꞌn, ex mlay che najtl tcyakil txcaj jil wuꞌne ic tzaꞌn o nbinchaye.
22 Acux atx txꞌotxꞌ, cucx ctel tkꞌijlalil awbil ex chembil twitz awal, tkꞌijlalil cyak ex cheꞌw, tkꞌijlalil jbalil ex coresma, cucx ctzajel kꞌijl ex konicꞌan, chi Kman.