Cyaj bant tiꞌj jun yol tuꞌn Dios tucꞌil Noé
9
Cub cyꞌiwlaꞌn Noé tuꞌn Dios cyucꞌix ke tcyꞌajal, ex xi tmaꞌn cye cyjaꞌ: Che cꞌwaꞌline, chmet-x cybaje, ex cynojsame twitz txꞌotxꞌ. 2 Che xobel cywitze cycyakil txcup twitz txꞌotxꞌ, cycyakil keju in che lipan twitz cyaꞌj, keju in xi cyjakuꞌn cycꞌuꞌj twitz txꞌotxꞌ ex keju ateꞌ tuj mar; cycyakil ke jlu che tel tjakꞌ cycawbile. 3 Tcyakil txcup itzꞌ ex in yucch cꞌajbel te cychiꞌye. Ic tzaꞌn o txi nkꞌoꞌne awal te cynicꞌbeble, icxtzun jaꞌlo tcyakil in xi nkꞌoꞌne cyeye te cynicꞌbeble. 4 Pero miꞌn txi cychyoꞌne chibj atx chicꞌ tuj, tuꞌnju atzun taꞌ chwinklal tuj chicꞌ. 5 Cꞌoquel tuj xjel wuꞌne aju cbel byonte jun xjal, ka jun txcup ma cub byonte ex ka jun xjal ma cub byonte juntl; il tiꞌj cꞌoquel tuj xjel wuꞌne.6 Ka at jun ma cub byonte jun xjal, ax juntl xjal cbel byonte te, porque cub tbinchaꞌn Dios xjal ic tzaꞌnx te tilbilal.
7 Atzun cyeye, che cꞌwaꞌline, chmet-x cybaje, ex cynojsame twitz txꞌotxꞌ, chi Dios.
8 Xi tmaꞌntl Dios te Noé ex cye tcyꞌajal cyjaꞌ: 9 Cybintze, cyjel bant tiꞌj jun nyole cyucꞌile ex cyucꞌil ke cyiyjile che ul itzꞌj te tibajxi, 10 cyucꞌix cycyakil ke txcup ateꞌ cyucꞌile, keju e jeꞌtz tuj matij barc; ke chyuꞌj ex txkantl txcup in che lipan twitz cyaꞌj, ke alumaj, ke txcup ateꞌ tjakꞌ cꞌul, ex cycyakil txcup tuj tcyakil twitz txꞌotxꞌ. 11 Cyjel bant tiꞌj nyole lu cyucꞌile: Mlay che najtl tuꞌn aꞌ cycyakil keju at cychwinklal, ex mlay tzajtl aꞌ tuꞌn tnaj tcyakil twitz txꞌotxꞌ. 12 Aju techal tiꞌj nyole cbantel tiꞌj cyucꞌile te jumajx, ex cyucꞌil cycyakil txcup, 13 atzun t-xmacal lobaj ma cub nkꞌoꞌne tuj muj. Cꞌajbel te techal tiꞌj nyole cyajni bant tiꞌj wuꞌne tucꞌil twitz txꞌotxꞌ. 14 Oc ttzaj muj twitz cyaꞌj wuꞌne, atzun ckꞌanchaꞌlil t-xmacal lobaj tuj muj. 15 Atzun ctzajel nnaꞌne nyole otok bant tiꞌj cyucꞌile ex cyucꞌil cycyakil txcup, ex mlay tzajtl aꞌ tuꞌn cynaj cycyakil keju at cychwinklal. 16 Oc tcub ten t-xmacal lobaj tuj muj, oc wilaꞌye ex ctzajel nnaꞌne nyole cyajni bant tiꞌj cyucꞌile te jumajx, ex cyucꞌil cycyakil keju at cychwinklal, chi Dios cye. 17 Atzun techal nyole aju ma cyaj bant tiꞌj wuꞌne cyucꞌil cycyakil keju at cychwinklal twitz txꞌotxꞌ, chi Dios te Noé.
Noé ex ke tcyꞌajal
18 Ke tcyꞌajal Noé e jeꞌtz tuj matij barc atzun ke jlu: Sem, Cam ex Jafet. Ate Cam tman Canaán. 19 Atzun ke ox lu tcyꞌajal Noé. Cyuꞌntzun cyiyjil o noj twitz txꞌotxꞌ juntl maj.
20 Oc ten Noé akꞌnal tiꞌj txꞌotxꞌ ex cuꞌx tawaꞌn tkan uva. 21 At jun kꞌij xi tcꞌan vin, ex chyoꞌn twiꞌ. Cyajtzun coẍeꞌ tuj tmij tja, ex mintiꞌtok t-xbalun tocsaꞌn. 22 Atzunte Cam tman Canaán o til mintiꞌtok t-xbalun tman tocsaꞌn. Xitzun tmaꞌn cye ke cabe terman cyetzsaꞌn tiꞌjxi. 23 Atzunte Sem ex Jafet tzaj cyiꞌn jun xbalun ex jax cykꞌoꞌn cywi cysemil. E ocxtzun bet tuꞌn ttzal cyiꞌj, in xi cyqueꞌyintok juntl pacꞌ, ex cub cykꞌoꞌn xbalun tibaj cyman. Cyjaꞌtzun mintiꞌ o cyil cyman tej mintiꞌtok t-xbalun tocsaꞌn.
Ctzajel mya baꞌn tibaj Canaán. Cꞌoquel te cymajen ke terman ex chꞌinxix cꞌoquel toclen. 26 Ax icx tmatl:
Nimanxwit tbi Kman aju Tdios Sem ex tzꞌocwit Canaán te tmajen.
27 Tzꞌelxwit nimax ttxꞌotxꞌ Jafet tuꞌn Dios, najanxwit junx tucꞌil Sem, ex tzꞌocwit Canaán te tmajen, chi Noé.