6 Cyimtzun José cyucꞌix cycyakil ke terman ex cycyakil keju e ul itzꞌj tuj tkꞌijlalil lu. 7 Tzajtzun nim cycꞌwaꞌl aj Israel, chmet-xix cybaj, o chꞌiyxix cyajlal, oc nimxix cyipun ex noj twitz txꞌotxꞌ Ejipt cyuꞌn. 8 Te tibajxi oc juntl rey tuj Ejipt, mintiꞌ ojtzkiꞌntok José tuꞌn ex xi tmaꞌn cye t-xjalil cyjaꞌ:

9 —Cyqueꞌyinxe; ma chmet cyajlal aj Israel mas ic tzaꞌn ke, ex mas at cyipun kwitz. 10 Mya yajcu che ul xjal kꞌojlel kiꞌj, ex jaculo bant tuꞌn toc cymojban cyib aj Israel cyucꞌil tuꞌn cykꞌojin kiꞌj, ex biꞌxlo che icꞌel tuj txꞌotxꞌ lu. Jaꞌlo baꞌn tuꞌn kximan cyiꞌj ti che oquel kuꞌn, tuꞌn miꞌn tchmet nim cybet, chi rey.

11 E joꞌctzun kꞌoꞌn caporal cyibaj aj Israel cyuꞌn aj Ejipt tuꞌn cyakꞌnan cyuw. Jaw cybinchaꞌn aj Israel cabe tnam te Faraón tuꞌn tcꞌuꞌt twitz awal cyuj, jun Pitón tbi, atzun juntl Ramesés tbi. 12 Tej cycub cꞌixbisaꞌn nimxix, nok mas nim e chmet ex nimxix oc cyajlal. Tuꞌntzun jlu tzaj nimxix cyxobil aj Ejipt cywitz aj Israel.

13 E cubtzun jatzꞌoꞌn aj Israel tuꞌn akꞌuntl cyuꞌn aj Ejipt. 14 Tuj cꞌixcꞌoj e ten cyuꞌn aj Ejipt, tuꞌnju cyuwxix akꞌuntl cub kꞌoꞌn cyibaj tuꞌn tbant xokꞌl ex lokꞌ cyuꞌn, ax icx tuꞌn tbant cycyakil wik akꞌuntl tuj cojbil. E oc lajwersin tuꞌn tbant tcyakil jlu cyuꞌn. 15 Xitzun tmaꞌn rey te Ejipt te Sifra ex Fúa, akeju betxꞌlon ateꞌ cyxol ke xuꞌj aj Israel:

16 —Oc cypone yokꞌil cyiꞌj ke xuꞌj aj Hebrey oc tul cyal, bix tzꞌoc cyqueꞌyine ti klelte neꞌ. Ka kꞌa, biꞌx cub cybyoꞌne; katzun xuꞌj, miꞌn cub cybyoꞌne, chi rey. 17 Atzun cye betxꞌlon e xob twitz Dios, mintiꞌ o cybincha ic tzaꞌn o tma rey, nok oꞌcx cyakꞌ ambil tuꞌn cyankꞌin ke tal kꞌa. 18 E tzaj ttxcoꞌn rey ke betxꞌlon ex xi tmaꞌn cye cyjaꞌ:

—¿Tikuꞌn ma cybinchaye jlu? Ma cyakꞌe ambil tuꞌn cyankꞌin ke tal kꞌa, chi rey.

19 Xitzun cytzakꞌweꞌn ke betxꞌlon te Faraón:

—Ke xuꞌj aj Hebrey micꞌx cyten ic tzaꞌn ke xuꞌj aj Ejipt pen nnuꞌl itzꞌj cyal. Ke xuꞌj aj Hebrey at nim cyipun; naꞌnxtok cypon canun betxꞌlon, otok tzul itzꞌj naj cyal, che chi.

20 O tbincha Dios baꞌn cyiꞌj ke betxꞌlon. O chmet nimxix cyajlal aj Israel, ex oc nimxix cyipun. 21 Tuꞌnju e xob ke betxꞌlon twitz Dios, o chmet cyiyjil tuꞌn. 22 Xitzun tmaꞌn Faraón cye cycyakil t-xjalil cyjaꞌ: Cyxon cuꞌxe tuj nima cycyakil tal kꞌa in che itzꞌj cyxol aj Hebrey; atzun ke tal txin, cykꞌonxe ambil cye tuꞌn cyankꞌin, chi Faraón.