Ul itzꞌj Moisés
2
At jun xinak cyxol tiyjil Leví o mojeꞌ tucꞌil jun xuꞌj ax aj Leví. 2 Oc ten tal xuꞌj lu, ex kꞌa tal ul itzꞌj. Tej ttil tbaniltok queꞌyin, xi tewan ox xjaw. 3 Tej mintiꞌtl bant tuꞌn t-xi tewan, tzaj tiꞌn jun chiꞌl binchamaj tiꞌj ajlaj, baj tloꞌtzin tiꞌj tuꞌn taꞌl ula ex kꞌol, cuꞌx tkꞌoꞌn tal neꞌ tuj ex ocx tewan cyxol tkan ajlaj ttzi nima Nilo. 4 Najchak xi weꞌ jun tanb neꞌ queꞌyilte te, tuꞌn tlonte ti at tbajel tiꞌj.5 Cuꞌxtzun tmeꞌjel Faraón chil ttzi nima ex tej in che bettok ke kꞌapoj ttzi nima, akeju ucꞌintok tuꞌn, o til tmeꞌjel Faraón aju chiꞌl tocx cyxol tkan ajlaj, ex xi t-samaꞌn jun tmajen kꞌilte te. 6 Tej tjaw tjakoꞌn, o til tal neꞌ ex lu in okꞌtok. Tzajtzun kꞌakꞌan tcꞌuꞌj tmeꞌjel Faraón tiꞌj ex tma: Tcꞌwaꞌl jun aj Hebrey te jlu, chi tmeꞌjel Faraón. 7 Xitzun tmaꞌn tanb tal neꞌ te tmeꞌjel Faraón cyjaꞌ:
—Ka taja, jacu chinxe txcolte jun xuꞌj aj Hebrey tuꞌn t-xi kꞌot tchꞌuꞌ neꞌ, chi txin.
8 Xi ttzakꞌweꞌn tmeꞌjel Faraón:
—Txiꞌya.
Xiꞌtzun te txin ex tzaj ttxcoꞌn aju ttxu neꞌ. 9 Xitzun tmaꞌn tmeꞌjel Faraón te cyjaꞌ: Kꞌinxa tal neꞌ lu, chꞌiysama ex cchjetela wuꞌne. Xitzun tiꞌn txubaj tal neꞌ ex o chꞌiy tuꞌn. 10 Tejtzun tchꞌiy neꞌ, xi tiꞌn twitz tmeꞌjel Faraón, octzun tkꞌoꞌn tmeꞌjel Faraón mer ic tzaꞌn te tal, Moisés tbi oc tkꞌoꞌn ex tma: Atzun tbi cꞌoquel tuꞌnju tuj aꞌ jatz wiꞌne, chi tmeꞌjel Faraón.
Etz ok Moisés tuj Ejipt
11 At jun kꞌij, tej otok chꞌiy Moisés, etz queꞌyilte cye t-xjalil ex o til cyuw akꞌuntl tcub cyibaj. Ax icx o til lu jun aj Ejipt in cꞌixbisantok tiꞌj jun aj Hebrey aju t-xjalil. 12 Xitzun tqueꞌyin Moisés tiꞌjele, ex tej ttil mi aꞌltok jun in queꞌyin tiꞌj, cub tbyoꞌn aju aj Ejipt ex cuꞌx tmakuꞌn tjakꞌ poklaj. 13 Tuj juntl kꞌij, etztl Moisés ex o til cabe aj Hebrey in che kꞌojintok cyxolx. Xi tmaꞌn teju otok tbincha mya baꞌn tiꞌj tucꞌil:
—¿Tikuꞌn nnoꞌc tbyoꞌna t-xjalila? Chi Moisés.
14 Xitzun ttzakꞌweꞌn aj Hebrey te:
—¿Alcye ma tzꞌoc kꞌonte teya te nejenel ex te jwes kibaje? ¿Kape taja tuꞌn ncub tbyoꞌna ic tzaꞌn cub tbyoꞌna aju aj Ejipt? Chi xjal.
Tzajtzun t-xobil Moisés, ex tma tuj tanmi: Malo chin binjtze tiꞌj xjal o cub wuꞌne, chi Moisés. 15 Tej tbinte Faraón aju otok binchanjtz, oc tkꞌoꞌn tilil tuꞌn tcub byoꞌn Moisés tuꞌn, atzunte Moisés etz ok twitz, ex xiꞌ najal tuj txꞌotxꞌ Madián.
16 Tej kꞌukltok ttzi jun xoch, e ul wuk tmeꞌjel pal te Madián, ex jatz cyiꞌn aꞌ tuꞌn cynoj ke choc tuꞌn cycꞌan t-ẍneꞌl cyman. 17 E ultzun txkantl pastor ex e jeꞌl cylajoꞌn ke txin. Atzunte Moisés oc ten colol cyiꞌj txin ex xi tkꞌoꞌn cycꞌa ke cyẍneꞌl. 18 Tej cypon meltzꞌaj ke txin tja Reuel aju cyman, tzaj tkanin cye cyjaꞌ:
—¿Tzaꞌn tten ma che ul naje jaꞌlo? Chi Reuel.
19 Xitzun cytzakꞌweꞌn txin:
—At jun xinak aj Ejipt ma colon kiꞌje tuj cykꞌab txkantl pastor. Ax icx ma jatz tiꞌn aꞌ ex ma txi tkꞌoꞌn cycꞌa ẍneꞌl, che chi txin.
20 Xitzun tmaꞌn Reuel cye tmeꞌjel:
—¿Jatum taꞌ xinak lu? ¿Tikuꞌn miꞌn saj cyucꞌine tzalu? Cytxcaꞌtze tuꞌn twaꞌn kucꞌil, chi Reuel.
21 Baꞌn eꞌla tuj twitz Moisés tuꞌn tcyaj ten tucꞌil xinak lu, ex xi tkꞌoꞌn xinak jun tmeꞌjel aju Séfora tbi te t-xuꞌjil Moisés. 22 Ul itzꞌj jun tal xuꞌj lu. Gersón tbi oc tkꞌoꞌn Moisés ex tma: Atzun tbi cꞌoquel tuꞌnju stranjer xjal kine tuj txꞌotxꞌ lu.
23 Tbajlenxi nim kꞌij cyim rey te Ejipt. Atzun cye aj Israel cucx e ayayan tuꞌnju nim akꞌuntl cub kꞌoꞌn cyibaj, ex jaw tkꞌajkꞌajel cywiꞌ. O japun tkꞌajkꞌajel cywiꞌ tucꞌil Dios, tuꞌn tlaj akꞌuntl tcubtok cyibaj. 24 O tbi Dios tkꞌajkꞌajel cywiꞌ in che ayayantok, ex ultzun tiꞌj tcꞌuꞌj aju yol otok tzaj ttziyan te Abraham, te Isaac ex te Jacob. 25 O til Dios ke aj Israel ex el tnicꞌ tiꞌj ju in bajtok cyiꞌj.