Tej ttxocl Moisés tuꞌn Dios
3
In cwentintok Moisés cyiꞌj t-ẍneꞌl Jetro aju tjiꞌ ex pal te Madián, at jun kꞌij xi tiꞌn ke ẍneꞌl tuj tzkij txꞌotxꞌ ex pon t-xe witz Horeb, aju witz te Dios. 2 Cubtzun tyecꞌun tib t-anjel Kman twitz tuj jun wiꞌ chꞌiꞌx cꞌul in julintok tuꞌn kꞌakꞌ. O til in julintok chꞌiꞌx cꞌul tuꞌn kꞌakꞌ ex mintiꞌ in cub tzꞌeꞌytok. 3 Tmatzun Moisés: Chin xel lakꞌeꞌye queꞌyilte te, ex oc wilaꞌye tikuꞌn mintiꞌ in cub tzꞌeꞌy aju chꞌiꞌx cꞌul lu. 4 Tej tlonte Kman cyjaꞌtok t-xi lakꞌeꞌ Moisés queꞌyilte te, tzaj kꞌajt tuj chꞌiꞌx cꞌul ex tzaj tmaꞌn te cyjaꞌ:—Moisés, Moisés.
—Lu kine lu, chi Moisés, xi ttzakꞌweꞌn.
5 Tzajtzun tmaꞌn Dios te cyjaꞌ:
—Miꞌn tzaj lakꞌeꞌya. Kꞌiꞌmela t-xajbiya cyiꞌj tkana, porque xjan aju lugar jatum tcuba. 6 Ex tzaj tmaꞌntl: Akine Tdios tmana, aju Tdios Abraham, Tdios Isaac ex Tdios Jacob, chi Kman.
—Ma wile yajbil cye xjal etzan wuꞌne, akeju ateꞌ tuj Ejipt. Ma nbiye tkꞌajkꞌajel cywiꞌ in che ayayan cyuꞌn caporal, ex baꞌn wuꞌne nicꞌpun in che cꞌixbisanjtz, 8 ex tuꞌntzun jlu ma chin cuꞌtze tuꞌn cyclet wuꞌne tuj cykꞌab aj Ejipt, tuꞌn cyetz wiꞌne tuj txꞌotxꞌ ma chixin ex tuꞌn cypon wiꞌne tuj jun txꞌotxꞌ baꞌn ex maꞌ twitz. Aju txꞌotxꞌ lu, kꞌinunxix ex tbanilxix. Atzun najl ke aj Canaán, ke aj Hetey, ke aj Amorrey, ke aj Ferezey, ke aj Hevey ex ke aj Jebusey. 9 Ma nbiye in che ayayan aj Israel ex ma wile in che cꞌixbisanjtz cyuꞌn aj Ejipt. 10 Tuꞌntzun jlu, txiꞌya jaꞌlo. Cxel nsamaꞌna twitz Faraón tuꞌn cyetz tiꞌna tuj Ejipt ke xjal etzan wuꞌne, akeju aj Israel, chi Dios.
11 Xitzun tmaꞌn Moisés te Dios:
—¿Ti woclene tuꞌn nxiꞌye twitz Faraón ex tuꞌn cyetz wiꞌne aj Israel tuj Ejipt?
12 Tzaj ttzakꞌweꞌn Dios te:
—Txiꞌya, porque chin tele tucꞌila. Atzun jlu cꞌajbel te jun techal teya ka wuꞌne otok txi nsamaꞌna: Oc cyetz tiꞌna tuj Ejipt ke xjal etzan wuꞌne, cycyakile che cꞌulule weye t-xe witz lu, chi Dios.
13 Xitzun tmaꞌn Moisés te Dios:
—Oc npone cywitz aj Israel, ex oc t-xi nmaꞌne cye cyjaꞌ: Ma chin tzaj samaꞌne cyucꞌile tuꞌn Cydios kxeꞌchel, nchiloye, ex ka ma tzaj cykanin weye: ¿Titzun tbi? ka che chi, ¿titzun cxel nmaꞌne cye? Chi Moisés.
14 Tzaj ttzakꞌweꞌn Dios te Moisés:
—AKINE AJU AX KINE, chi Dios. Ax icx tzaj tmaꞌntl: Cyjaꞌtzun tten cxel tmaꞌna cye aj Israel: Aju toc tbi AKINE ma tzaj samante weye cyucꞌile, chicuya. 15 Xi tmaꞌntl Dios te Moisés: Atzun jlu cxel tmaꞌna cye aj Israel: Ate Kman aju Cydios kxeꞌchel, Tdios Abraham, Tdios Isaac ex Tdios Jacob, ma tzaj samante weye cyucꞌile. Atzun nbiye jlu te jumajx, chi Dios, ex cucx ctzajel naꞌn cyuj cycyakil tabkꞌiyil, chicuya cye. 16 Txiꞌya, chmon baja ke tij xjal at cyoclen cyxol aj Israel ex kꞌmanxa cye cyjaꞌ: Ate Kman aju Cydios kxeꞌchel, Tdios Abraham, Tdios Isaac ex Tdios Jacob, cub tyecꞌun tib nwitze, ex tzaj tmaꞌn weye cyjaꞌ: Ax toc ma tzꞌoc nkꞌoꞌne cwent cyiꞌje ex ma wile aju in binchanjtz cyiꞌje tuj Ejipt, chi Dios. 17 Ex tmatl: Akine chin eletz kꞌinte cyeye tuj yajbil cyiꞌje tuj Ejipt, tuꞌn cyxiꞌye tuj cytxꞌotxꞌ aj Canaán, aj Hetey, aj Amorrey, aj Ferezey, aj Hevey ex aj Jebusey. Aju txꞌotxꞌ lu kꞌinunxix ex tbanilxix, chicuya cye. 18 Cxel biꞌn tyola cyuꞌn ke tij xjal cyxol aj Israel. Aya cyucꞌix ke tij xjal lu che xeꞌle twitz rey te Ejipt, ex cxel cymaꞌne te cyjaꞌ: Ate Kmane aju Kdiose, akoꞌye aj Hebrey, cub tyecꞌun tib kwitze. Tuꞌntzun jlu, kꞌontza ambil keye tuꞌn kxiꞌye tuj tzkij txꞌotxꞌ ox kꞌij kbeye, tuꞌn t-xi kkꞌoꞌne chojbil te Kmane aju Kdiose, che chicuye te. 19 Baꞌn wuꞌne, mlay che etz tzokpiꞌne tuꞌn rey te Ejipt ka mintiꞌ ma cub tcastiw wuꞌne. 20 Atzun weye cxel nyecꞌune wipumale, che bel ncꞌixbisaꞌne ke aj Ejipt cyuꞌn cycyakil nbinchbene nim cyipumal che bantel wuꞌne cyiꞌj, ex maxitzun che eletz tzokpiꞌne tuꞌn. 21 Wuꞌne cnetel xtalbil cyuꞌn aj Israel cywitz aj Ejipt, tuꞌntzun miꞌn cyetz mintiꞌ kꞌiꞌn cyuꞌn. 22 Cxel tkanin teyle junjun xuꞌj te tvesin aj Ejipt, ex te xuꞌj aj Ejipt ax najl tuj tja, ke tiꞌxti sak pwak cytxꞌotxꞌil, kꞌan pwak cytxꞌotxꞌil ex xbalun tuꞌn toc cykꞌoꞌn cyiꞌj cyal; cyjaꞌtzun tten cꞌeletz cyiꞌn aju at cye aj Ejipt, chi Dios.