—Yajtzun ka miꞌn ẍinx cyniman, ka miꞌn ẍinx cybiꞌn, ex ka ma cyma cyjaꞌ: Mintiꞌ o cub tyecꞌun tib Kman twitza, ka che chi.

2 Tzajtzun tkanin Kman te:

—¿Titzun kꞌiꞌn tuꞌna tuj tkꞌaba?

Xi ttzakꞌweꞌn Moisés:

—Jun cyꞌakoꞌch, chi Moisés.

3 Tzaj tmaꞌn Kman te cyjaꞌ:

—Xoꞌnxa twitz txꞌotxꞌ.

Xitzun t-xoꞌn Moisés twitz txꞌotxꞌ, o chꞌexpaj naj ex oc te jun lobaj. Atzunte Moisés, el ok tiꞌj. 4 Tzajtzun tmaꞌn Kman te Moisés:

—Nukpinx tkꞌaba, ex tzyuntza tjeꞌ, chi Dios.

Xi tnukpiꞌn Moisés tkꞌab ex tzaj ttzyuꞌn; o chꞌexpaj naj, ex octl te cyꞌakoꞌch tuj tkꞌab. 5 Tzaj tmaꞌn Kman te cyjaꞌ:

—Tuꞌntzun jlu cꞌoquex cyniman ka ax toc o cub nyecꞌun wibe twitza, akine Dios, aju Cydios t-xeꞌchela, Tdios Abraham, Tdios Isaac ex Tdios Jacob. 6 Tzaj tmaꞌntl Kman te: Kꞌoꞌncx tkꞌaba ttzi t-xuꞌca.

Ocxtzun tkꞌoꞌn tkꞌab ttzi t-xuꞌc, ex tej tetz tiꞌn, lu nojnitok tiꞌj tuꞌn txꞌaꞌc, ex sak queꞌyintok ic tzaꞌn ttxa cheꞌw. 7 Tzaj tmaꞌntl Kman te cyjaꞌ:

—Kꞌoꞌncx juntl maj tkꞌaba ttzi t-xuꞌca.

Ocxtzun tkꞌoꞌntl Moisés tkꞌab ttzi t-xuꞌc ex tej tetz tiꞌntl, otok banix tkꞌab ic tzaꞌnx tten tcyakil t-ximlal.

8 —Katzun miꞌn ma txi nimana cyuꞌn, ex ka miꞌn ma txi cybiꞌn tyola oc tbant tnejel techal, cxeltzun nimana cyuꞌn oc tbant tcabin techal. 9 Katzun miꞌn ma txi cyniman ke cabe techal lu, ex ka miꞌn ma txi cybiꞌn tyola, cjawitztzun tiꞌna chꞌin aꞌ tuj nima ex cbel tkoꞌna twitz txꞌotxꞌ. Cchꞌexpeteltzun aꞌ lu ex cꞌoquel te chicꞌ twitz txꞌotxꞌ, chi Dios. 10 Xitzun ttzakꞌweꞌn Moisés te Kman cyjaꞌ:

—Ay, Tat. Bajx chin oque te jun xjal nok tocx yol tuj ttziꞌ; atxix wul-len itzꞌje ex mya nok oꞌcx tej ma yolina wucꞌile yaj in meltzꞌaj ntziꞌye tiꞌj yol, ex xtꞌab chin yoline, chi Moisés.

11 Tzajtzun tmaꞌn Kman te cyjaꞌ:

—¿Al uꞌn bant ttzi xjal? ¿Al uꞌn bant aju xjal miban yolin ex aju xjal miban bin, aju xjal baꞌn queꞌyin ex aju xjal moẍ? ¿Myapetzun wuꞌne, akine Cymane? 12 Txiꞌya jaꞌlo. Akine chin onil teya oc tyolina, ex cxel nxnakꞌtzaꞌne alcye yol cxel tmaꞌna, chi Dios.

13 Xitzun tmaꞌntl Moisés te Dios:

—Nman, chin cubsale twitza tuꞌn t-xi t-samaꞌna junxitl xjal, chi Moisés.

14 Tzajtzun tkꞌoj Kman tiꞌj Moisés ex tzaj tmaꞌn te cyjaꞌ:

—¿Myapetzun ojtzkiꞌn Aarón wuꞌne, aju aj Leví ex ttzica? Baꞌn wuꞌne baꞌnxix yolin. Tzul canul tiꞌja, ex oc tqueꞌyinjtza tuꞌn ctzalajel nim tuj tanmi. 15 Aya c-yolil tucꞌil, ex cxel tmaꞌna te alcye yol tuꞌn t-xi tmaꞌn. Akine chin xel kꞌonte yol tuj ttziꞌya, ax icx tuj ttzi Aarón, ex che xel nxnakꞌtzaꞌne alcye cbantel cyuꞌne. 16 A Aarón c-yolil te t-xela cywitz xjal. Ate cꞌoquel mer ic tzaꞌn ttziꞌya; atzun teya cꞌoquela mer ic tzaꞌn Dios te te. 17 Kꞌinxa aju cyꞌakoꞌch lu, porque tuꞌntzun jlu che bantel ke techal tuꞌna, chi Dios.

18 Icꞌtzun Moisés, pon tja Jetro aju tjiꞌ ex xi tmaꞌn te cyjaꞌ:

—Waje tuꞌn waj meltzꞌaje cyucꞌil nxjalile ateꞌ tuj Ejipt, tuꞌn twile ka itzꞌx ke, chi Moisés.

Xitzun tmaꞌn Jetro te Moisés:

—Txiꞌya tucꞌil tzalajbil.

19 Ax icx otok tzaj tmaꞌn Kman te Moisés tuj Madián cyjaꞌ:

—Taj meltzꞌaja tuj Ejipt porque o che cyim cycyakil keju cyajbiltok tuꞌn tcub byoꞌna cyuꞌn.

20 Tzajtzun tiꞌn Moisés aju t-xuꞌjil cyucꞌix ke tcꞌwaꞌl, e jax tkꞌoꞌn cyibaj bur, ex aj meltzꞌaj tuj Ejipt. Ax icx xi tiꞌn Moisés aju cyꞌakoꞌch te Dios. 21 Xi tmaꞌn Kman te Moisés:

—Oc tpona tuj Ejipt nok mi bant tuꞌna ke binchben nim cyipumal twitz Faraón, porque o txi nkꞌoꞌne tipumala tuꞌn cybant tuꞌna. Masque icju, pero cbel ncyuwsaꞌne tanmi, ex miꞌn che etz ttzokpiꞌn ke aj Israel. 22 Cxeltzun tmaꞌna te Faraón: O tzaj tmaꞌn Kmane cyjaꞌ: Ke aj Israel mer ic tzaꞌn tnejel ncyꞌajale ke. 23 Ma txi nmaꞌne teya tuꞌn cyex ttzokpiꞌna tuꞌn cycꞌulun weye; atzun teya miꞌn taja tuꞌn cyex ttzokpiꞌna. Tuꞌn jlu cbel nbyoꞌne aju tnejel tcyꞌajala, chicuya te Faraón, chi Dios te Moisés.

24 Cyjaꞌtok t-xiꞌ Moisés tuj be ex pon jatum tuꞌn tex akꞌbil te. Cub tyecꞌun tib Kman twitz ex o tajbe Kman tuꞌn tcub byoꞌn Moisés tuꞌn. 25 Tzajtzun tiꞌn Séfora jun abj attok ttziꞌ wen, el tkesin ttzꞌumal twi ttzꞌaꞌlbil tal, xi t-xoꞌn cyxe tkan Moisés ex xi tmaꞌn te cyjaꞌ: Ax toc nchmil, nok tuꞌn tlaja ma tzꞌel chicꞌ, chi xuꞌj.

26 O tma Séfora icju tuꞌn tlaj sircunsisyón. Cyjaꞌtzun tten tzokpet Moisés tuꞌn Kman.

27 Tzaj tmaꞌn Kman te Aarón:

—Txiꞌya canul tiꞌj Moisés tuj tzkij txꞌotxꞌ, chi Kman.

Tzajtzun Aarón, ex o cnet Moisés tuꞌn t-xe witz te Dios ex el ttzꞌuban twitz. 28 Xitzun ttxꞌolbaꞌn Moisés te Aarón tcyakil yol otok tzaj tmaꞌn Kman te, cyucꞌix cycyakil ke techal otok che tzaj kꞌmaꞌn te tuꞌn tbinchante. 29 E jeꞌxtzun Moisés ex Aarón ex e oc cychmoꞌn cycyakil ke tij xjal at cyoclen cyxol aj Israel. 30 Xi ttxꞌolbaꞌn Aarón tcyakilju otok tzaj tmaꞌn Kman te Moisés ex tbincha ke techal cywitz ke xjal.

31 Xitzun cyniman aj Israel tyol Moisés. Tej cybinte ka otok til Kman aju yajbil cye ex tajbiltok tuꞌn t-onin cyiꞌj, e cub mocꞌeꞌ ex e cꞌulun.