—Ate Kmane ex Kdiose, akoꞌye aj Israel, in tmaꞌn teya cyjaꞌ: Che ttzokpintza ke xjal etzan wuꞌne, tuꞌn cyicꞌsan ninkꞌij te nimbil weye tuj tzkij txꞌotxꞌ.

2 Xi ttzakꞌweꞌn Faraón cyjaꞌ:

—¿Alcyeju nnoꞌc cykꞌoꞌne te Cymane, ex cyaje tuꞌn t-xi nbiꞌne tyol tuꞌn cyex ntzokpiꞌne ke aj Israel? Mintiꞌ ojtzkiꞌn Cymane wuꞌne, ex mlayx che ex ntzokpiꞌne ke aj Israel tuꞌn cyex, chi Faraón.

3 Xitzun cymaꞌn te cyjaꞌ:

—Aju Kmane ex Kdiose, akoꞌye aj Hebrey, o cub tyecꞌun tib kwitze. Ko xeꞌltzune jaꞌlo tuj tzkij txꞌotxꞌ ox kꞌij kbeye, ex cxel kkꞌoꞌne chojbil te, tuꞌn miꞌn ttzaj tkꞌoꞌn txꞌuꞌj yabil ex ka kꞌoj kibaje, che chi.

4 Xitzun tmaꞌn rey te Ejipt cye Moisés ex Aarón cyjaꞌ:

—¿Tikuꞌn in che el cypaꞌne ke xjal tiꞌj cyakꞌun? Cyxiꞌtle akꞌnal, chi rey.

5 Ax icx xi tmaꞌntl Faraón: Ma chmet nimxix cyajlal aj Israel tzalu, atzun cyeye cyaje tuꞌn cyel cypaꞌne ke tiꞌj cyakꞌun, chi Faraón.

6 Tujx kꞌij lu xi tmaꞌn Faraón cye caporal ex cye tmayordom cyjaꞌ:

7 —Texju jaꞌlo miꞌn txi cykꞌoꞌntle tkan triw cye aj Israel tuꞌn tbant lokꞌ ic tzaꞌn in bant jaꞌlo. Cyuꞌnx e ttzaj cyjyoꞌn tkan triw, 8 ex cykꞌoncuye cytarey ax ic tzaꞌn jaꞌlo; miꞌn tzꞌajtz cylakꞌbaꞌne. Ake jlu cyꞌaj ke, ex tuꞌntzun jlu in jaw tkꞌajkꞌajel cywiꞌ ex in cymaꞌn: Koꞌke, ex kkꞌonx chojbil te Kdios, che chi. 9 E tcub mas nim akꞌuntl cyibaj tuꞌntzun cyakꞌnan tiꞌj, ex mya tuꞌn t-xi cybiꞌn nicꞌaj yol, chi Faraón.

10 E jeꞌtztzun ke caporal ex ke mayordom, ex xi cymaꞌn cye xjal cyjaꞌ: Ma tma Faraón tuꞌn miꞌn t-xi kkꞌoꞌne tkan triw cyeye. 11 Ax keye che xeꞌl jyolte nok jatum ccnetel cyuꞌne, ex ax tajlal cytareye cbantel ic tzaꞌn nej, che chi.

12 Bajtzun cysipan cyib aj Israel tuj tcyakil txꞌotxꞌ Ejipt, ex tzaj cyiꞌn tlocꞌ triw tuꞌn tajben te t-xel tkan triw. 13 Atzun cye mayordom e oc cylajoꞌn ke xjal tiꞌj akꞌuntl, ex xi cymaꞌn cye cyjaꞌ: Cybinchame tajlal cytareye teyle junjun kꞌij ic tzaꞌn in banttok cyuꞌne tej cucxtok t-xi kꞌot tkan triw cyeye, che chi. 14 E baj asyalin ke caporal aj Israel cyuꞌn ke tmayordom Faraón, ex xi cymaꞌntl cye cyjaꞌ: ¿Tikuꞌn mintiꞌ ma bant tajlal lokꞌ ic tzaꞌn nej, mi ew ex mi jaꞌlo? Che chi.

15 E ultzun ke caporal aj Israel twitz Faraón ex xi cymaꞌn te cyjaꞌ:

—¿Tikuꞌn in tbinchaꞌna kiꞌje icju, akoꞌye tmajena? 16 Mintiꞌ in tzaj kꞌoꞌn tkan triw keye. Nnoꞌc kꞌoꞌn il kiꞌje tuꞌn tbant tajlal lokꞌ ic tzaꞌn nej, ex in ko baj asyaline. Bix ake t-xjalila at cypaj, che chi.

17 Xitzun ttzakꞌweꞌn Faraón:

—Cyꞌaj keye. Ax toc cyꞌaj keye. Tuꞌntzun jlu in cymaꞌne: Koꞌke ex kkꞌonx chojbil te Kman, che chiye. 18 Cyxiꞌye ex che akꞌnantle. Miꞌn txi kꞌot tkan triw cyeye, ex ax tajlal lokꞌ cbantel cyuꞌne ic tzaꞌn nej, chi Faraón.

19 Atzun cye caporal aj Israel biꞌx e bisun tej ttzaj kꞌmaꞌn cye cyjaꞌ: Miꞌn tzꞌajtz lakꞌeꞌ tajlal lokꞌ in bant teyle junjun kꞌij. 20 Tej cyetz ke caporal yolil twitz Faraón, oc cycꞌulban cyib tucꞌil Moisés ex Aarón, akeju in che ayontok cyiꞌj. 21 Xi cymaꞌn ke caporal cye cyjaꞌ:

—Jacu til Kman cyiꞌje, ex ate cbel kꞌonte cycastiwoye. Tuꞌn cylaje ma ko el icꞌune tuꞌn Faraón ex cyuꞌn ke tmayordom. Mer ic tzaꞌn jun spad o txi cykꞌoꞌne tuj cykꞌab tuꞌn kcub byoꞌne cyuꞌn, che chi caporal.

22 O yolin Moisés juntl maj tucꞌil Kman, ex chi cyjaꞌ:

—Nman, ¿tikuꞌn in che cub tcꞌixbisaꞌna ke xjal lu? ¿Ti wile in tzaj t-samaꞌna? 23 Atxix tej wule yolil tucꞌil Faraón te t-xela, mas ma che cub tcꞌixbisaꞌn ke xjal etzan tuꞌna, ex naꞌnx cyclet tuꞌna, chi Moisés.