—Jaꞌlo oc tilaꞌya aju cbantel wuꞌne tiꞌj Faraón, porque tuꞌn wipumale che eletz ttzokpiꞌn, ex tuꞌnx wipumale che eletz tlajoꞌn tiꞌjtzi ttxꞌotxꞌ, chi Dios.

2 O yolin Dios juntl maj tucꞌil Moisés ex tzaj tmaꞌn te cyjaꞌ: Akine Jehová aju Cydiose. 3 Cub nyecꞌun wibe twitz Abraham, twitz Isaac ex twitz Jacob ex xi nmaꞌne cye: Akine Dios at wipumale tuꞌn tbant tcyakil wuꞌne; atzun tiꞌj nbiye Jehová mintiꞌ xi nmaꞌne cye. 4 Cyaj bant tiꞌj jun nyole axix toc cyucꞌil, tuꞌn t-xi nkꞌoꞌne txꞌotxꞌ Canaán cye, jatum e najan ic tzaꞌn stranjer xjal. 5 Atzun jaꞌlo, in nbiꞌne in che ayayan aj Israel tuꞌnju ma che oc lajwersin tiꞌj akꞌuntl cyuꞌn aj Ejipt, ex ma tzaj nnaꞌne nyole cyaj bant tiꞌj cyucꞌil. 6 Tuꞌntzun jlu kꞌmanxa cye aj Israel: Akine Cymane, ex akine chin eletz kꞌinte cyeye tjakꞌ yajbil cyeye aju in cub cykꞌoꞌn aj Ejipt. Che eletz ntzokpiꞌne tjakꞌ akꞌuntl ex che coꞌpjele wuꞌne tuꞌn wipumale nim, tucꞌil cꞌixbisabl maꞌxix cyibaj aj Ejipt. 7 Che oquel nkꞌoꞌne te jun cꞌloj xjal etzan wuꞌne, ex akine chin oquel te Cydiose. Cꞌelel cynicꞌe wiꞌje, ka akine Cymane ex Cydiose aju etz kꞌinte cyeye tjakꞌ yajbil maꞌxix cub kꞌoꞌn cyuꞌn aj Ejipt. 8 Atzun che pol wiꞌne tuj txꞌotxꞌ xi ntziyane te Abraham, te Isaac ex te Jacob, ex cxel nkꞌoꞌne txꞌotxꞌ lu te cyetzbile, akine Cymane, chicuya cye, chi Dios te Moisés.

9 Atzun yol lu xi tmaꞌn Moisés cye aj Israel; atzun cye mintiꞌ xi cybiꞌn tyol tuꞌnju otok baj cycꞌuꞌj tuꞌn akꞌuntl cyuw. 10 O yolintl Kman tucꞌil Moisés ex tzaj tmaꞌn te cyjaꞌ:

11 —Txiꞌya tucꞌil Faraón aju rey te Ejipt ex kꞌmanxa te tuꞌn cyetz ttzokpiꞌn aj Israel tuj ttxꞌotxꞌ, chi Kman.

12 Xi ttzakꞌweꞌn Moisés te Kman:

—Mintiꞌ in chin ocx nimane cyuꞌn aj Israel. ¿Tzaꞌntzun tten chin oquex biꞌne tuꞌn Faraón, porque xtꞌab chin yoline? Chi Moisés.

13 O yolin Kman tucꞌil Moisés ex Aarón, ex tzaj tmaꞌn cye tuꞌn t-xi cymaꞌn cye aj Israel ex te Faraón ka otok tma Dios cye tuꞌn cyetz cyiꞌn aj Israel tuj txꞌotxꞌ Ejipt.

14 Atzun ke nejenel cyxol ke cyxeꞌchel:

Ke tcyꞌajal Rubén, aju tnejel tcyꞌajal Israel, atzun ke jlu: Hanoc, Falú, Hezrón ex Carmi. Atzun ke jlu cyxeꞌchel tiyjil Rubén.

15 Ke tcyꞌajal Simeón, atzun ke jlu: Jemuel, Jamín, Ohad, Jaquín, Zohar ex Saúl aju tal jun aj Canaán. Atzun ke jlu cyxeꞌchel tiyjil Simeón.

16 Ke tcyꞌajal Leví, atzun ke jlu: Gersón, Coat ex Merari, atzun ke jlu cyxeꞌchel tiyjil Leví. 137 abkꞌi ten Leví twitz txꞌotxꞌ. 17 Ke tcyꞌajal Gersón, atzun ke jlu: Libni ex Simei, teyle te junjun cꞌloj tiyjil. 18 Ke tcyꞌajal Coat, atzun ke jlu: Amram, Izhar, Hebrón ex Uziel. 133 abkꞌi ten Coat twitz txꞌotxꞌ. 19 Ke tcyꞌajal Merari, atzun ke jlu: Mahli ex Musi. Atzun ke jlu cyxeꞌchel tiyjil Leví.

20 Mojeꞌ Amram tucꞌil Jocabed aju tanb tman, ex e ul itzꞌj cabe tcyꞌajal tiꞌj; Aarón tbi jun, ex Moisés tbi juntl. 137 abkꞌi ten Amram twitz txꞌotxꞌ. 21 Ke tcyꞌajal Izhar, atzun ke jlu: Coré, Nefeg ex Zicri. 22 Ke tcyꞌajal Uziel, atzun ke jlu: Misael, Elzafán ex Sitri. 23 Mojeꞌ Aarón tucꞌil Elisabet aju tmeꞌjel Aminadab ex tanb Naasón. Ke tcyꞌajal e tzaj tiꞌj Elisabet, atzun ke jlu: Nadab, Abiú, Eleazar ex Itamar. 24 Ke tcyꞌajal Coré, atzun ke jlu: Asir, Elcana ex Abiasaf. Atzun ke jlu cyxeꞌchel tiyjil Coré. 25 Mojeꞌ Eleazar aju tcyꞌajal Aarón tucꞌil jun xuꞌj cyxol ke tmeꞌjel Futiel, ex ul itzꞌj jun tcyꞌajal tiꞌj, Finees tbi. Atzun ke jlu nejenel cyxol teyle junjun cꞌloj aj Leví.

26 Axtzun ke jlu, Aarón ex Moisés, akeju o yolin Kman cyucꞌil tuꞌn cyetz cyiꞌn aj Israel tuj txꞌotxꞌ Ejipt tuj cꞌlojin cyten. 27 Axte Moisés ex Aarón e yolin twitz Faraón aju rey te Ejipt tuꞌn cyetz ttzokpiꞌn ke aj Israel tuj Ejipt.

28 Tej tyolin Kman tucꞌil Moisés tuj txꞌotxꞌ Ejipt, 29 tzaj tmaꞌn te cyjaꞌ:

—Akine Cymane. Kꞌmanxa te Faraón aju rey te Ejipt tcyakilju cxel nmaꞌne teya, chi Kman.

30 Xitzun ttzakꞌweꞌn Moisés:

—Nman, xtꞌab chin yoline. ¿Tzaꞌntzun tten chin oquex biꞌne tuꞌn Faraón?