—Bintza. O txi nkꞌoꞌne toclena tuꞌn tyolina twitz Faraón te nxele; atzunte Aarón aju ttzica c-yolil te t-xela. 2 Cxel tmaꞌna te Aarón tcyakilju cxel nmaꞌne teya; atzunte Aarón aju ttzica cxel tmaꞌn te Faraón, tuꞌntzun cyetz ttzokpiꞌn ke aj Israel tuj ttxꞌotxꞌ. 3 Atzun weye cbel ncyuwsaꞌne tanmi Faraón, ex che bel nbinchaꞌne nim techal ex binchben nim cyipumal tuj Ejipt. 4 Pero mlay tzꞌocx tniman Faraón cyyole masque bant tcyakil jlu. Atzun weye cxel nyecꞌune wipumale, cbel nkꞌoꞌne castiw maꞌxix cyibaj aj Ejipt, ex tuj cꞌlojin che eletz wiꞌne ke xjal etzan wuꞌne, ake aj Israel. 5 Oc t-xi nyecꞌune wipumale cye aj Ejipt ex oc cyetz wiꞌne ke aj Israel cyxol, cꞌeleltzun cynicꞌ aj Ejipt tiꞌj ka akine Cymane, chi Dios te Moisés.

6 Cybinchatzun Moisés ex Aarón ic tzaꞌnx o tma Kman cye. 7 Otok japun Moisés twiꞌ 80 abkꞌi, atzunte Aarón otok japun twiꞌ 83 abkꞌi tej cyyolin twitz Faraón.

8 O yolin Kman tucꞌil Moisés ex Aarón ex tzaj tmaꞌn cye cyjaꞌ:

9 —Katzun ma tzaj tkanin Faraón cyeye: Cyyecꞌuntze jun techal ka chi, kꞌmanxtzuna te Aarón tuꞌn ttzaj tiꞌn tcyꞌakoꞌch ex tuꞌn t-xi t-xoꞌn twitz Faraón tuꞌn toc te jun lobaj, chi Kman.

10 E jeꞌxtzun Moisés ex Aarón twitz Faraón, ex o cybincha ic tzaꞌn otok tma Kman cye; xitzun t-xoꞌn Aarón tcyꞌakoꞌch twitz Faraón ex cywitz keju at cyoclen ttxlaj, ex oc tcyꞌakoꞌch te jun lobaj. 11 E tzajtzun ttxcoꞌn Faraón ke aj nabl ex ke chman; ax icx cye cybincha tuꞌn cymañ ic tzaꞌn otok tbincha Aarón. 12 Xi t-xoꞌn teyle junjun tcyꞌakoꞌch twitz txꞌotxꞌ, ex e joꞌc te lobaj. Atzunju tcyꞌakoꞌch Aarón e jeꞌx tbalkꞌuꞌn ke cycyꞌakoꞌch ke chman ex cycyꞌakoꞌch ke aj nabl. 13 Atzunte Faraón cub tcyuwsaꞌn tanmi, ex mintiꞌ xi tkꞌoꞌn twiꞌ tiꞌj tyol Moisés ex Aarón, ic tzaꞌn otok tma Kman.

14 Tzajtzun tmaꞌn Kman te Moisés cyjaꞌ:

—Ma cyuwix tanmi Faraón ex miꞌn taj tuꞌn cyex ttzokpiꞌn ke aj Israel, 15 txiꞌya prim nchiꞌj tucꞌil Faraón oc tcuꞌx ttzi nima, atzun bix ayona tiꞌj ttzi aꞌ, kꞌiꞌn tcyꞌakoꞌcha tuꞌna, aju oc te lobaj, 16 ex kꞌmanxa te cyjaꞌ: Ma chin tzaj samaꞌntle tucꞌila tuꞌn Kmane aju Kdiose akoꞌye aj Hebrey, tuꞌn t-xi nmaꞌne teya cyjaꞌ: Che ttzokpiꞌmexa ke xjal etzan wuꞌne, tuꞌn cycꞌulun weye tuj tzkij txꞌotxꞌ. Atzun teya bajx txi tnimana tuꞌn cyex ttzokpiꞌna. 17 Cbel npekꞌune nima tuꞌn ncyꞌakoꞌche tzyuꞌn wuꞌne, ex cꞌoquel nima te chicꞌ, ex tuꞌn jlu cꞌelel tnicꞌa tiꞌj ka akine Dios, chi Kmane. 18 Che cymel ke cyiẍ ateꞌ tuj nima, nim ctzuwixtel, ex ctzajel molmon cycꞌuꞌj aj Ejipt tiꞌj tuꞌn miꞌn t-xi cycꞌaꞌn, chicuya te Faraón.

19 Tzaj tmaꞌntl Kman te Moisés: Kꞌmanxa te Aarón cyjaꞌ: Tzyuma tcyꞌakoꞌcha ex nukpinx tkꞌaba cyibaj cycyakil aꞌ tuj Ejipt, tibaj nima, cyibaj ke toma, ke najab ex ke tcubil aꞌ, tuꞌn toc aꞌ te chicꞌ, ex tuꞌn tten chicꞌ cyuj ke choc tzeꞌ ex ke choc abj tuj tcyakil txꞌotxꞌ Ejipt, chicuya te Aarón, chi Kman te Moisés.

20 Tbinchatzun Moisés ex Aarón ic tzaꞌn otok tma Kman. Jaw tiꞌn Moisés tcyꞌakoꞌch, cub tpekꞌun tibaj nima twitz Faraón ex cywitz keju attok cyoclen ttxlaj, ex tcyakil aꞌ tuj nima oc te chicꞌ. 21 Ax icx e baj cyim ke cyiẍ ateꞌtok tuj, o tzuwix nima, ex tuꞌn jlu mintiꞌ e cꞌan aj Ejipt tiꞌj. Tuj tcyakil txꞌotxꞌ Ejipt attok chicꞌ.

22 Ax icx cye chman tuj Ejipt o cybincha jlu tuꞌn cymañ. Tuꞌntzun jlu cub tcyuwsaꞌn tanmi Faraón, ex mintiꞌ xi tkꞌoꞌn twiꞌ tiꞌj Moisés ex Aarón, ic tzaꞌn otok tma Kman. 23 Ajtzun meltzꞌaj Faraón tja, ex mintiꞌ xi tkꞌoꞌn twiꞌ tiꞌj jlu. 24 Tuj tcyakil txꞌotxꞌ Ejipt e cuꞌx cyjakoꞌn xjal jul ttziꞌyile nima tuꞌn tjatz aꞌ te cycꞌa, tuꞌnju mintiꞌtok tumel tuꞌn cycꞌan aꞌ tuj nima.

25 Cyjapunlenxi wuk kꞌij tcublen tcꞌixbisaꞌn Kman nima,