8
Tzaj tmaꞌn Kman te Moisés:—Tocxa twitz Faraón ex kꞌmanxa te: Chi Kmane aju Kdiose cyjaꞌ: Che ttzokpiꞌmexa ke xjal etzan wuꞌne tuꞌn cycꞌulun weye. 2 Katzun miꞌn ma che ex ttzokpiꞌna, che cꞌixbiseteltzun xjal wuꞌne cyuꞌn ẍal tuj tcyakil txꞌotxꞌ Ejipt. 3 Che ul tpokꞌsaꞌn nima nim ẍal, che jawitz tuj aꞌ, che oquex tuj tjaya, che oquex jatum in tana, che jawix twi twatbila, che oquex tuj cyja keju at cyoclen ttxlaja ex tuj cyja ke t-xjalila, che oquex tuj cyjorniye, ex che belex cyuj ke cychoque jatum in xyokꞌit pan. 4 Che jawix tꞌicpaj tibaja, cyibaj ke t-xjalila ex cyibaj cycyakil keju at cyoclen ttxlaja, chicuya te Faraón, chi Dios.
5 Tzaj tmaꞌntl Kman te Moisés:
—Kꞌmanxa te Aarón tuꞌn t-xi tnukpiꞌn tkꞌab tucꞌil tcyꞌakoꞌch cyibaj ke nima, cyibaj ke toma ex cyibaj ke najab, tuꞌn cyjatz ẍal cyuj, tuꞌn tnoj twitz txꞌotxꞌ Ejipt cyuꞌn.
6 Xitzun tnukpiꞌn Aarón tkꞌab cyibaj ke nima tuj Ejipt, e jatztzun ẍal, ex baj noj tcyakil twitz txꞌotxꞌ Ejipt cyuꞌn. 7 Ax icx cye chman o cybincha jlu tuꞌn cymañ, ex e jatz ẍal cyuꞌn tuj aꞌ tuj txꞌotxꞌ Ejipt. 8 E tzajtzun txcoꞌn Moisés ex Aarón tuꞌn Faraón ex xi tmaꞌn cye cyjaꞌ:
—Che cubsane twitz Cymane aju Cydiose tuꞌn cyel tiꞌn ke ẍal wiꞌje ex cyiꞌj ke nxjalile, ex jacutzun che ex ntzokpiꞌne ke cyxjalile tuꞌn cyxiꞌ kꞌolte chojbil te Cymane aju Cydiose, chi Faraón.
9 Xi ttzakꞌweꞌn Moisés te Faraón:
—Kꞌmantza jtoj taja tuꞌn ncubsane tiꞌja, cyiꞌj keju at cyoclen ttxlaja ex cyiꞌj ke t-xjalila, tuꞌntzun cyel kꞌiꞌn ke ẍal cyiꞌje ex tuj cyjaye ex oꞌcx tuꞌn cycyaj ten tuj nima.
10 Xi ttzakꞌweꞌn Faraón:
—Nchiꞌjxi, chi Faraón.
Xi tmaꞌn Moisés te:
—Cbantel ic tzaꞌn ma tmaya, tuꞌntzun tel tnicꞌa tiꞌj ka mi aꞌl juntl ic tzaꞌn te Kmane, aju Kdiose. 11 Cꞌelel cypaꞌn cyib ke ẍal tiꞌja, cyiꞌj ke tjaya, cyiꞌj keju at cyoclen ttxlaja ex cyiꞌj ke t-xjalila, ex oꞌcxtzun che cyjel ten tuj nima, chi Moisés.
12 E etztzun Moisés ex Aarón twitz Faraón ex cubsan Moisés twitz Kman tuꞌn cyel tiꞌn ke ẍal, akeju otok che tzaj t-samaꞌn tiꞌj Faraón. 13 O tbincha Kman ic tzaꞌn o tma Moisés. E baj cyim ke ẍal tuj cyja xjal, ttxaꞌn cypeꞌn ex tuj cojbil. 14 E baj chmoꞌn ke ẍal cyuꞌn aj Ejipt, junx e cub cybuybaꞌn, ex baj tzuwix tcyakil txꞌotxꞌ Ejipt cyuꞌn. 15 Tejtzun tqueꞌyinte Faraón otok che el kꞌiꞌn ke ẍal ex mintiꞌtltok in yajlanjtz, cub tcyuwsaꞌn tanmi ex mintiꞌ xi tkꞌoꞌn twiꞌ tiꞌj tyol Moisés ex Aarón, ic tzaꞌn otok tma Kman.
Aju cꞌixbisabl cyuꞌn xmisak
16 Xitzun tmaꞌn Kman te Moisés cyjaꞌ:
—Kꞌmanxa te Aarón tuꞌn t-xi tnukpiꞌn tcyꞌakoꞌch, ex e tcub tpekꞌun tkukil txꞌotxꞌ, tuꞌn toc te xmisak tuj tcyakil txꞌotxꞌ Ejipt.
17 Cybinchatzun icju. Xi tnukpiꞌn Aarón tkꞌab tucꞌil tcyꞌakoꞌch, cub tpekꞌun tkukil txꞌotxꞌ, ex e oc chmet xmisak cyiꞌj ke xjal ex cyiꞌj ke alumaj, ex oc tcyakil tkukil txꞌotxꞌ te xmisak tuj tcyakil txꞌotxꞌ Ejipt. 18 Ax icx oc tilil cyuꞌn chman tuꞌn cyjaw jlet xmisak tuꞌn cymañ, pero mintiꞌ o bant cyuꞌn. E oc cychmon cyib xmisak cyiꞌj xjal ex cyiꞌj alumaj. 19 Xitzun cymaꞌn ke chman te Faraón cyjaꞌ:
—Tuꞌn Dios te jlu, che chi.
Masque icju, pero cub tcyuwsaꞌn tanmi Faraón, ex mintiꞌ xi tkꞌoꞌn twiꞌ tiꞌj tyol Moisés ex Aarón, ic tzaꞌn otok tma Kman.
Aju cꞌixbisabl cyuꞌn xcatz
20 Xi tmaꞌn Kman te Moisés cyjaꞌ:
—Primx jaw weꞌya nchiꞌj, weꞌcuya twitz Faraón oc tcuꞌx ttzi aꞌ, ex kꞌmanxa te, chi Kmane cyjaꞌ: Che ttzokpiꞌmexa ke xjal etzan wuꞌne tuꞌn cycꞌulun weye. 21 Katzun miꞌn ma che ex ttzokpiꞌna, che tzajeltzun nsamaꞌne xcatz tiꞌja, cyiꞌj keju at cyoclen ttxlaja, cyiꞌj ke t-xjalila ex cyuj ke cyjaye. Cnojel cyja aj Ejipt cyuꞌn xcatz, ax icx tcyakil txꞌotxꞌ jatum najl ke. 22 Tuj kꞌij lu cꞌelel npaꞌne txꞌotxꞌ Gosén, jatum najl ke xjal etzan wuꞌne, ex mlay jaw jlet xcatz ma chixin, tuꞌntzun tel tnicꞌa tiꞌj ka akine Cyman aju Cydios aj Israel, ex atine tuj txꞌotxꞌ Ejipt. 23 Che elel npaꞌne ke xjal etzan wuꞌne cyiꞌj ke t-xjalila. Nchiꞌj bant aju techal lu, chicuya te Faraón.
24 Tbinchatzun Kman icju. Chmet nimxix xcatz tuj tja Faraón ex tuj cyja keju attok cyoclen ttxlaj, ex baj naj tcyakil txꞌotxꞌ Ejipt cyuꞌn xcatz.
25 E tzajtzun txcoꞌn Moisés ex Aarón tuꞌn Faraón, ex xi tmaꞌn cye cyjaꞌ:
—Cyxiꞌye, ex cykꞌonxe chojbil te Cydiose, pero ax tuj txꞌotxꞌ lu, chi Faraón.
26 Xitzun ttzakꞌweꞌn Moisés:
—Mya baꞌn tuꞌn tbant kuꞌne icju, porque aju chojbil cxel kkꞌoꞌne te Kmane aju Kdiose, mya baꞌn tuj cywitz aj Ejipt, ex ka ma txi kkꞌoꞌne chojbil mya baꞌn tuj cywitz, jaculo ko oc xoꞌne tuꞌn abj cyuꞌn. 27 Il tiꞌj tuꞌn kxi bete ox kꞌij tuj tzkij txꞌotxꞌ, ex atzun cxel kkꞌoꞌne chojbil te Kmane aju Kdiose, ic tzaꞌn o tzaj tmaꞌn keye, chi Moisés.
28 Xitzun tmaꞌn Faraón cye:
—Jacu txi nkꞌoꞌne ambil cyeye tuꞌn cyxiꞌye kꞌolte chojbil te Cymane aju Cydiose tuj tzkij txꞌotxꞌ, pero miꞌn cheꞌxe najchak. Che naꞌne Dios wiꞌje, chi Faraón.
29 Xi ttzakꞌweꞌn Moisés:
—Oc wexe twitza, chin cubsale twitz Kmane aju Kdiose tuꞌn cyel tiꞌn ke xcatz nchiꞌj, tuꞌn cyel tiꞌn tiꞌja, cyiꞌj keju at cyoclen ttxlaja ex cyiꞌj ke t-xjalila, pero miꞌn ko cub t-sbuꞌna tuꞌn miꞌn kex ttzokpiꞌna, akoꞌye aj Israel, tuꞌn t-xi kkꞌoꞌne chojbil te Kmane aju Kdiose, chi Moisés.