—Tocxa twitz Faraón ex kꞌmanxa te cyjaꞌ: Chi Kmane, aju Kdiose akoꞌye aj Hebrey: Che ttzokpiꞌmexa ke xjal etzan wuꞌne, tuꞌn cycꞌulun weye, chi Kman. 2 Katzun miꞌn ma che ex ttzokpiꞌna, ex ka cucx ma che cub ttzyuꞌna, 3 tzul t-samaꞌn Kmane jun yabil cyuwxix cyibaj ke taluna ateꞌ tuj cojbil, ke tcheja, ke tburra, ke tcheja camey, ke twacẍa, ke t-ẍneꞌla ex ke tchipa. 4 Atzun ke cyalun aj Israel che elel tpaꞌn Kmane cyiꞌj ke cyalun aj Ejipt, ex mi jun cyalun aj Israel cymel, chicuya te.

5 Biꞌx o tma Kman alcye kꞌij tuꞌn ttzaj cꞌixbisabl lu: Nchiꞌj bant jlu wuꞌne tuj txꞌotxꞌ Ejipt, chi Kmane, chi Moisés.

6 Tujtzun juntl kꞌij tzaj cꞌixbisabl lu tuꞌn Kman. E baj cyim cycyakil cyalun aj Ejipt; atzun cye aj Israel mi jun cyalun o cyim. 7 Xitzun t-samaꞌn Faraón jun xjal bilte te, ex mi jun cyalun aj Israel otok cyim. Masque icju, pero cucx cub tcyuwsaꞌn tanmi, ex mintiꞌ e jeꞌtz ttzokpiꞌn ke aj Israel.

8 Xi tmaꞌn Kman te Moisés ex te Aarón cyjaꞌ: Cyjatoꞌn jawe nok jteꞌ yub tzaꞌj ttzi jorni, ex cjawix tchitun Moisés twitz cyaꞌj twitz Faraón. 9 Cꞌoquel tzaꞌj lu te puj tibaj tcyakil txꞌotxꞌ Ejipt; ex tuꞌnju puj lu, tzul jlet txꞌaꞌc cyiꞌj xjal ex cyiꞌj alumaj tuj tcyakil txꞌotxꞌ Ejipt, chi Kman.

10 Jawtzun cyjatoꞌn tzaꞌj ttzi jorni, ex e pon twitz Faraón. Jax tchitun Moisés tzaꞌj twitz cyaꞌj, ex jawil jlet txꞌaꞌc cyiꞌj xjal ex cyiꞌj alumaj. 11 Atzun cye chman mintiꞌ bant cyweꞌ twitz Moisés, tuꞌn tlaj txꞌaꞌc jaw jlet cyiꞌj ex cyiꞌj cycyakil aj Ejipt. 12 Pero cub tcyuwsaꞌn Kman tanmi Faraón, ex mintiꞌ xi tbiꞌn cyyol Moisés ex Aarón, ic tzaꞌn otok tma Kman te Moisés.

13 Tzajtzun tmaꞌn Kman te Moisés:

—Primx jaw weꞌya nchiꞌj, weꞌcuya twitz Faraón ex kꞌmanxa te cyjaꞌ: Chi Kmane aju Kdiose akoꞌye aj Hebrey: Che ttzokpiꞌmexa ke xjal etzan wuꞌne, tuꞌn cycꞌulun weye, 14 ex katzun miꞌn, ctzajel nsamaꞌne cycyakil ncꞌixbisable tiꞌja, cyiꞌj keju at cyoclen ttxlaja ex cyiꞌj ke t-xjalila, tuꞌntzun tel tnicꞌa tiꞌj mi aꞌl juntl ic tzaꞌn kine tuj tcyakil twitz txꞌotxꞌ. 15 Nokwit xi nyecꞌune wipumale tuꞌn tcꞌixbiseta tuꞌn yabil, owtlo cyima cyucꞌix ke t-xjalila, 16 pero ma cyaj ankꞌina wuꞌne tuꞌn tel tnicꞌa tiꞌj wipumale, ex tuꞌn tel tkanil nbiye tuj tcyakil twitz txꞌotxꞌ. 17 ¿Maj cucxtzun che bel ttzyuꞌna ke xjal etzan wuꞌne tuꞌn miꞌn cyex ttzokpiꞌna? 18 Bintza, tlokju nchiꞌj ctzajel nchitune sakbakun alxix wen, aju bajx tzaj jun maj icju atxix tuj kꞌij tcublen xeꞌt tnam lu, ex matzun jaꞌlo. 19 Samanxtzuna xjal tuꞌn cytzaj chmet ke taluna ex tcyakilju at teya tuj cojbil. Katzun miꞌn ma che baj tchmoꞌna tuꞌn cyul tjaya, che cymel tuꞌn sakbakun cbel tzꞌak cyibaj tuj cojbil, ka xjal ex ka alumaj, chi Kmane, chicuya te Faraón.

20 Akeju xi cyniman tyol Kman cyxol keju attok cyoclen ttxlaj Faraón, ocx cykꞌoꞌn ke cymajen ex ke cyalun cyuj cyja; 21 atzun keju mintiꞌ xi cyniman tyol Kman, ax e cyaj cykꞌoꞌn ke cymajen ex ke cyalun tuj cojbil. 22 Tzajtzun tmaꞌn Kman te Moisés cyjaꞌ:

—Nukpinx tkꞌaba twitz cyaꞌj tuꞌntzun ttzaj sakbakun tibaj tcyakil txꞌotxꞌ Ejipt, cyibaj ke xjal ex ke alumaj, ex tibaj tcyakil awal tuj cojbil tuj Ejipt.

23 Xitzun tnukpiꞌn Moisés tcyꞌakoꞌch twitz cyaꞌj. Tzaj julin kꞌancyok tuꞌn Kman, ex tzaj sakbakun. Tzaj koptzꞌaj tkan kꞌancyok, ex tzaj chitj sakbakun tuꞌn Kman tibaj txꞌotxꞌ Ejipt. 24 Cuꞌtz chitj sakbakun twitz cyaꞌj tucꞌix tkan kꞌancyok nimxix wen; bajx tzaj jun maj icju atxix tcublen xeꞌt tnam Ejipt. 25 Tcyakilju attok tuj cojbil tuj txꞌotxꞌ Ejipt o naj tuꞌn sakbakun, tzaꞌnx ke xjal ax icx ke alumaj. Ax icx o naj tcyakil awal, ex cycyakil tzeꞌ biꞌx e baj naj. 26 Oꞌcx tuj txꞌotxꞌ Gosén jatum najltok ke aj Israel, mintiꞌ cub sakbakun.

27 Xitzun txocbaj Moisés ex Aarón tuꞌn Faraón, ex xi tmaꞌn cye cyjaꞌ:

—Ma chin binchane il jaꞌlo. Ate Cymane tzꞌaklxix, atzun weye ex ke nxjalile aj il koꞌye. 28 Che cubsane twitz Cymane tuꞌn tweꞌ sakbakun ex kꞌancyok in julin tuꞌn. Jacu che ex ntzokpiꞌne ke xjal ex mlay che cub ntzyuꞌntle, chi Faraón.

29 Xitzun tmaꞌn Moisés te:

—Biꞌx oc wexe jaꞌlo tuj tnam lu, cxel nnukpiꞌne nkꞌabe, chin cubsale twitz Kmane, ex cwebel kꞌancyok ex sakbakun tuꞌntzun tel tnicꞌa tiꞌj, te te Kmane aju Kdiose tcyakil twitz txꞌotxꞌ. 30 Pero baꞌn wuꞌne, mlay txi cynimane Kmane aju Kdiose, mi aya ex mi keju at cyoclen ttxlaja, chi Moisés.

31 Aju awal lino tucꞌix sebad, biꞌx e baj naj tuꞌn sakbakun, porque matok in japun twitz sebad, ex matok in xmacalin lino. 32 Atzun te triw tucꞌix senteno, mintiꞌ e naj, porque naꞌnxtok tul cykꞌij.

33 Etztzun Moisés twitz Faraón, elpun tiꞌjxi tnam, e jeꞌx tnukpiꞌn ke tkꞌab ex cubsan twitz Kman. Weꞌtzun kꞌancyok ex sakbakun, ex weꞌ tuꞌn ttzaj jbal. 34 Tej tqueꞌyinte Faraón otok weꞌ jbal tucꞌix sakbakun ex kꞌancyok, o binchan il juntl maj ex cub tcyuwsaꞌntl tanmi, cyucꞌix keju attok cyoclen ttxlaj. 35 O cyuwix tanmi Faraón, ex mintiꞌ e jeꞌtz ttzokpiꞌn ke aj Israel, ic tzaꞌn otok tma Kman tuꞌn Moisés.