—Txiꞌya yolil tucꞌil Faraón, porque ma cub ncyuwsaꞌne tanmi ex cyanmi keju at cyoclen ttxlaj, tuꞌntzun cyxi nyecꞌune cye ke techal lu, nim cyipumal, 2 ex tuꞌn t-xi ttxꞌolbaꞌna cye tcꞌwaꞌla ex cye tal tchmana aju otok nbinchaye cyiꞌj aj Ejipt, ex ke techal nim cyipumal otok cheꞌx nyecꞌune cye, tuꞌntzun tel cynicꞌe tiꞌj akine Cymane, chi Kman.

3 E jeꞌxtzun Moisés ex Aarón yolil tucꞌil Faraón, ex xi cymaꞌn te cyjaꞌ:

—Chi Kmane, aju Kdiose akoꞌye aj Hebrey: ¿Jtojtzun cub tmansin tiba nwitze? Che ttzokpiꞌmexa ke xjal etzan wuꞌne tuꞌn cycꞌulun weye. 4 Katzun miꞌn ma che ex ttzokpiꞌna, nchiꞌj che tzaj nsamaꞌne ẍplon tuj tcyakil txꞌotxꞌ Ejipt jatum in cawina. 5 Cnojel twitz txꞌotxꞌ cyuꞌn ex ya miꞌn kꞌanchalintl twitz txꞌotxꞌ. Cbajel cywaꞌn tcyakilju mintiꞌ o naj tuꞌn sakbakun, ex cbajel cywaꞌn tcyakil tzeꞌ in chꞌiy tuj cojbil. 6 Cbajel noj cyuj tjaya cyuꞌn, cyucꞌix cyja keju at cyoclen ttxlaja ex cyja cycyakil aj Ejipt. A jlu mintiꞌ o cyil ke t-xeꞌchela atxix tej cyul-len itzꞌj twitz txꞌotxꞌ ex matzun ctzajel jaꞌlo, chi Kmane aju Kdiose, che chi.

E ajtztzun meltzꞌaj, ex e jeꞌtz twitz Faraón. 7 Xitzun cymaꞌn keju attok cyoclen ttxlaj Faraón:

—¿Jtoj txi tcolin Moisés tuꞌn tbinchante mya baꞌn kiꞌj? Che ttzokpiꞌmexa ke xjal lu tuꞌntzun cyxiꞌ cꞌulul te Cyman aju Cydios. ¿Naꞌnxpe tel tnicꞌa tiꞌj ma naj txꞌotxꞌ Ejipt? Che chi.

8 Ajtztzun txcoꞌn Moisés ex Aarón tuꞌn Faraón ex xi tmaꞌn cye cyjaꞌ:

—Cyxiꞌye tuꞌn cycꞌulune te Cymane aju Cydiose, pero waje tuꞌn nbinteye alcyetzun ke che xeꞌl, chi Faraón.

9 Xi ttzakꞌweꞌn Moisés:

—Il tiꞌj tuꞌn kexe cyucꞌix ke kcꞌwaꞌle ex ke tij xjal ateꞌ kxole, cyucꞌix ke kcyꞌajale ex ke kmeꞌjele, cyucꞌix kẍneꞌle ex kwacẍe, porque cbel kicꞌsaꞌne jun nintz ninkꞌij twitz Kmane, chi Moisés.

10 Xitzun tmaꞌn Faraón cye:

—¿Che chipetzune ka che elex ntzokpiꞌn keye cyucꞌix ke cycꞌwaꞌle, ax icx ka cxeꞌl Cymane cyucꞌile? Ma kꞌanchalin ex ma tzꞌel nnicꞌe cyiꞌje, mya baꞌn cyximbetze. 11 Mya ic ctelbaju. Cyexe jaꞌlo oꞌcx akeye xinak, ex che cꞌulune te Cymane, porque atzun jlu in che kanine tiꞌj, chi Faraón.

E jeꞌtztzun lajoꞌn twitz Faraón.

12 Tzajtzun tmaꞌn Kman te Moisés cyjaꞌ: Nukpinx tkꞌaba tibaj txꞌotxꞌ Ejipt tuꞌn cytzaj ẍplon, tuꞌntzun tbaj noj twitz txꞌotxꞌ Ejipt cyuꞌn ex tuꞌn tbaj cywaꞌn tcyakilju in chꞌiy tuj cojbil, tucꞌix tcyakilju mintiꞌ naj tuꞌn sakbakun, chi Kman.

13 Xi tnukpiꞌn Moisés tcyꞌakoꞌch tibaj txꞌotxꞌ Ejipt. Tzajtzun jun nintz cykꞌikꞌ tuj tjawitz kꞌij tuꞌn Kman. Jun kꞌij ex jun akꞌbil o ten cykꞌikꞌ lu tuj Ejipt, ex tej tcub kꞌij otok che ul ẍplon tuꞌn cykꞌikꞌ. 14 Bajtzun noj tcyakil twitz txꞌotxꞌ Ejipt cyuꞌn ẍplon, ex nimxix cyajlal. Mintiꞌ o tzaj jun maj icju ojtxi ex miꞌn tzajtl. 15 Baj noj tcyakil twitz txꞌotxꞌ Ejipt cyuꞌn, ex kꞌek oc queꞌyin twitz txꞌotxꞌ cyuꞌn. Baj cywaꞌn tcyakil awal tuj Ejipt ex tcyakil twitz tzeꞌ mintiꞌ otok naj tuꞌn sakbakun. Misicyer chꞌin chaꞌx cyaj ten tiꞌj tzeꞌ, mi tiꞌj awal tuj tcyakil txꞌotxꞌ Ejipt.

16 Xitzun txocbaj naj Moisés ex Aarón tuꞌn Faraón, ex xi tmaꞌn cye cyjaꞌ:

—Ma chin binchane il twitz Cymane aju Cydiose, ex cywitze. 17 Jaꞌlo chin cubsale cywitze tuꞌn tcub cynajsaꞌne wile, oꞌcxtzun jaꞌlo. Che cubsane twitz Cymane aju Cydiose tuꞌn tel tiꞌn cꞌixbisabl lu wiꞌje, aju biꞌx ma naj tcyakil tuꞌn, chi Faraón.

18 Tej tetz Moisés twitz Faraón, oc ten cubsal twitz te Kman. 19 Chꞌexpettzun tbe cykꞌikꞌ tuꞌn Kman, tzaj jun nintz cykꞌikꞌ tuj telex kꞌij, ex e jeꞌx ikan cycyakil ẍplon tuꞌn cykꞌikꞌ lu tuj Mar Cyak Queꞌyin. Mi jun ẍplon cyaj ten tuj tcyakil txꞌotxꞌ Ejipt. 20 Pero cub tcyuwsaꞌn Kman tanmi Faraón, ex mintiꞌ e jeꞌtz ttzokpiꞌn Faraón ke aj Israel.

21 Xi tmaꞌn Kman te Moisés cyjaꞌ: Nukpinx tkꞌaba twitz cyaꞌj tuꞌn ttzaj klolj tibaj tcyakil txꞌotxꞌ Ejipt, jun klolj nimxix wen.

22 Xi tnukpiꞌn Moisés tkꞌab twitz cyaꞌj ex tzajtzun nim klolj tuj ox kꞌij tibaj tcyakil txꞌotxꞌ Ejipt. 23 Mi jun xjal o til tucꞌil ex mi jun o yucch tuj tlugar cyuj ox kꞌij, atzun cye aj Israel attok spicꞌun jatum najl ke.

24 Tzajtzun txcoꞌn Moisés tuꞌn Faraón ex xi tmaꞌn te cyjaꞌ:

—Cyxiꞌye cꞌulul te Cymane, ax icx cyiꞌnxe ke cyxuꞌjile cyucꞌile cyucꞌix cycꞌwaꞌle; atzun ke cyẍneꞌle ex ke cywacẍe, ax cykꞌon cyaje tzalu, chi Faraón.

25 Xitzun ttzakꞌweꞌn Moisés:

—Mlay bant icju. Ax icx ctzajel tkꞌoꞌna ambil tuꞌn cyxi kiꞌne ke kalune. Atzun ke che ajbel te chojbil tuꞌn cycub kpatune te jun oyaj te Kmane aju Kdiose. 26 Il tiꞌj che xel kiꞌne ke kalune kucꞌile, mi jun cyjel ten, porque cyxoltzun ke che jawil kscꞌoꞌne ke oyaj tuꞌn kcꞌulune te Kmane aju Kdiose. Mintiꞌ baꞌn kuꞌne alcye cꞌajbel keye tuꞌn cyxi kkꞌoꞌne te Kmane max oc kpone ma chixin, chi Moisés.

27 Pero cub tcyuwsaꞌn Kman tanmi Faraón, ex mintiꞌ e jeꞌtz ttzokpiꞌn ke aj Israel. 28 Nok oꞌcx xi tmaꞌntl Faraón te Moisés:

—Texa nwitze. Miꞌn tzaja juntl maj queꞌyilte weye. Katzun ma tzaja juntl maj queꞌyilte weye, cymela, chi Faraón.

29 Xitzun tmaꞌn Moisés te:

—Baꞌn ma tmaya, ax toc mlay tzꞌoc nqueꞌyintle twitza, chi Moisés.