Tkanil tuꞌn cycyim ke nej cꞌwaꞌlbaj xinak
11
Tzaj tmaꞌntl Kman te Moisés: Atx juntl cꞌixbisabl tuꞌn ttzaj wuꞌne tibaj Faraón ex cyibaj aj Ejipt. Te tibajxi jlu che elex tzokpiꞌne tuꞌn, ex lajoꞌn che elexe cycyakile tuꞌn. 2 Jaꞌlotzun kꞌmanxa cye aj Israel, tuꞌn t-xi cykanin ke xinak ex ke xuꞌj ke tiꞌxti sak pwak ex kꞌan pwak cytxꞌotxꞌil cye aj Ejipt akeju cyvesin, chi Kman te Moisés.3 Tuꞌn Kman baꞌn e eꞌla ke aj Israel tuj cywitz aj Ejipt. Ax icx te Moisés maꞌxix toclen eꞌla tuj cywitz keju attok cyoclen ttxlaj Faraón ex tuj cywitz cycyakil aj Ejipt.
4 Xi tmaꞌn Moisés te Faraón: Chi Kmane cyjaꞌ: Chin icꞌele tmij akꞌbil jaꞌlo tuj tcyakil txꞌotxꞌ Ejipt, 5 ex che cymel cycyakil ke nej cꞌwaꞌlbaj xinak tuj tcyakil txꞌotxꞌ Ejipt; cymel tnejel tcyꞌajal Faraón in cub keꞌ tuj tkꞌukbil, ex cpol baj tiꞌj tnejel tal majen xuꞌj in cheꞌn tiꞌj cyaꞌ. Ax icx che cymel cycyakil ke tnejel cyal alumaj. 6 Cjawil nimxix tkꞌajkꞌajel cywi xjal tuj tcyakil txꞌotxꞌ Ejipt. Aju tkꞌajkꞌajel lu bajx binjtz jun maj icju ex mlay binjtztl. 7 Atzun cyxol cycyakil aj Israel mi jun txꞌyan ckawil cyiꞌj xjal ex mi cyiꞌj alumaj, tuꞌntzun tel cynicꞌe wiꞌje, akine Cyman, ex wuꞌne paꞌmaj ke aj Ejipt cyiꞌj ke aj Israel, chi Kmane, chi Moisés. 8 Cycyakil keju at cyoclen ttxlaja, che pol wucꞌile, che bel mocꞌeꞌ nwitze ex oc cymaꞌ: Texa tzalu cyucꞌix cycyakil xjal ateꞌ tuj tcwenta. Tbajlenxitzun cymaꞌn weye icju, chin elexe, chi Moisés te Faraón.
In kꞌojltok Moisés wen, ex etz twitz Faraón.
9 Otok tzaj tmaꞌn Kman te Moisés: Mlayx che ocx biꞌne tuꞌn Faraón, tuꞌntzun cybant nimcu techal wuꞌne tuj txꞌotxꞌ Ejipt, chi Kman.
10 Banttzun cycyakil techal lu tuꞌn Moisés ex Aarón twitz Faraón, pero tuꞌnju otok cub tcyuwsaꞌn Kman tanmi Faraón, mintiꞌ e jeꞌtz ttzokpiꞌn ke aj Israel tuꞌn cyetz tuj ttxꞌotxꞌ.