2 —Aju xjaw lu cꞌoquel te cyeye te tnejel xjaw. Cꞌoquel te tnejel xjaw te abkꞌi. 3 Cykꞌmanxe cye cycyakil aj Israel cyjaꞌ: Tuj laj tajlal xjaw lu, teyle te junjun ja xjal ctzajel tiꞌn jun tal ẍneꞌl ex ka jun tal chip. 4 Katzun nicꞌxi cybaj xjal tuj ja, ex ka mlay che xcyeꞌ tiꞌj tuꞌn tbaj tcyakil tchibjal tal alumaj cyuꞌn, ctzajeltzun cytxcoꞌn cyvesin aju mas nikayin taꞌ, ex junx che chyoꞌl tiꞌj; cbel cysipan cyxol ic tzaꞌn cyajlal xjal ex nicꞌpun che chyoꞌn. 5 Aju tal alumaj cꞌajbel, tal tman te jun abkꞌi ex misicyer chꞌin tpaltil, ka tal ẍneꞌl ex ka tal chip. 6 Cꞌoquel cycꞌaloꞌne ocxi tjapun cyajlaj tajlal ax xjaw. Tujtzun kꞌij lu teyle te junjun ja xjal aj Israel cbel tbyoꞌn tal alumaj oc tex kꞌij. 7 Ctzajel cyiꞌn tchcꞌel tal alumaj, ex cꞌoquel cysuꞌn tiꞌj tcyakil tmarquil tlamel ja jatum che chyoꞌl tiꞌj tchibjal tal alumaj. 8 Ax konicꞌan lu che chyoꞌl tiꞌj chibj txoꞌn twitz kꞌakꞌ, junx tucꞌil itzaj cꞌa tchyoꞌnjtz, tucꞌix pan mintiꞌ t-samel tuj tuꞌn tjaw mal tcꞌuꞌj. 9 Misicyer jun piẍ chibj chaꞌx cxel cychyoꞌne, mi tuꞌn tjax taꞌl, nok oꞌcx txoꞌn twitz kꞌakꞌ; enter tucꞌix twiꞌ, ke tkan ex tuj tcꞌuꞌj. 10 Misicyer chꞌin cyjel cykꞌoꞌne te juntl kꞌij. Ka at chꞌin ma sobryin, biꞌx cbel cypatune tuꞌn kꞌakꞌ. 11 Cxel cychyoꞌne ic cytene cyjaꞌ: Cꞌaloꞌn cycꞌuꞌje wen, ex toc cyxajbiye, tucꞌix cycyꞌakoꞌche tuj cykꞌabe, ex jurat naj cxel cychyoꞌne, porque atzun kꞌij tkanx chin icꞌel bete, akine Cymane. 12 Tujxtzun konicꞌan lu chin icꞌele tuj tcyakil txꞌotxꞌ Ejipt, che bel nbyoꞌne ke nej cꞌwaꞌlbaj xinak tuj cyja teyle junjun aj Ejipt, ax icx ke tnejel cyal alumaj; ex cbel nkꞌoꞌne cysentens cycyakil cydios aj Ejipt, akine Cymane.

13 Aju chicꞌ otok tzꞌoc cysuꞌne tiꞌj tmarquil tlamel cyjaye cꞌajbel te jun techal cyiꞌj ke ja jatum ateꞌye. Octzun toc nqueꞌyine chicꞌ, tkanx chin icꞌel bete, ex mi aꞌl jun cyeye cymel tuꞌn cꞌixbisabl oc cycyim ke tnejel cycyꞌajal aj Ejipt wuꞌne. 14 Ctzajel cynaꞌne kꞌij lu ex cbel cyicꞌsaꞌne te ninkꞌij te nimbil weye, akine Cymane. Cucx cbel cyicꞌsaꞌne te jumajx, ex wikinwik cyjel cymaꞌne cye cycꞌwaꞌle. 15 Wuk kꞌij che waꞌle pan mintiꞌ t-samel tuj tuꞌn tjaw mal tcꞌuꞌj; ex biꞌx tuj tnejel kꞌij miꞌn tentl t-samel pan tuj cyjaye. Alcye jun ma waꞌnte pan at t-samel tuj cyuj kꞌij lu, cꞌelex lajet cyxol aj Israel. 16 Tzaꞌnx tuj tnejel kꞌij, ax icx tuj twukin kꞌij, cbel cychmon cyibe tuj jun buyj xjan. Mi aꞌl jun cꞌakꞌnal cyuj cabe kꞌij lu, oꞌcx cywaye baꞌn tuꞌn tbant cyuꞌne. 17 Cbel cyicꞌsaꞌne aju ninkꞌij te wabl pan mintiꞌ t-samel tuj tuꞌn tjaw mal tcꞌuꞌj, porque tujtzun ju kꞌij lu e jeꞌtz wiꞌne tuj Ejipt tuj cꞌlojin cytene; cbel cyicꞌsaꞌne cycyakil abkꞌi te jumajx, ex wikinwik cyjel cymaꞌne cye cycꞌwaꞌle. 18 Te kale tuj cyajlaj tajlal tnejel xjaw ctzyetel tuꞌn cywaꞌne pan mintiꞌ t-samel tuj, ex cpol baj te kale tuj 21 tajlal ax xjaw. 19 Misicyer t-samel pan ctel tuj cyjaye cyuj wuk kꞌij lu, ex alcye jun ma waꞌn pan at t-samel tuj tuꞌn tjaw mal tcꞌuꞌj, cꞌelex lajet cyxol aj Israel, ka stranjer xjal ex ka ax aj Israel. 20 Cyjaꞌtzun, miꞌn che wane pan at t-samel tuj tuꞌn tjaw mal tcꞌuꞌj. Nok jatum che najale che waꞌle tiꞌj pan mintiꞌ t-samel tuj, chi Kman te Moisés ex Aarón.

21 E tzajtzun ttxcoꞌn Moisés cycyakil tij xjal cyxol aj Israel ex xi tmaꞌn cye cyjaꞌ: Cyxiꞌye ex cyiꞌntze jun tal tman ẍneꞌl ex ka jun tal chip te teyle junjun ja xjal, ex cybyoncuye tuꞌn ticꞌset Xjan Kꞌij, tej tkanx ticꞌ bet Kman. 22 Cbelex cykꞌoꞌne tchcꞌel tuj jun palangán. Cyiꞌntze jun cheꞌl tkꞌab tal tzeꞌ hisopo tbi, cymuꞌn cuꞌxe tuj chicꞌ ex cysuꞌnque tiꞌj tcyakil tmarquil tlamel ja. Mi jun cyeye cꞌeletz tuj tja ka naꞌnxtok tcub kꞌij. 23 Oc ticꞌ Kman cꞌixbisal cye aj Ejipt tuꞌn camic, cꞌoquel tqueꞌyin aju chicꞌ tiꞌj tmarquil tlamel cyjaye, ex tkanx cꞌicꞌel ttzi ja lu. Tuꞌntzun jlu mlay takꞌ Kman ambil te kꞌol camic tuꞌn tocx tuj cyjaye. 24 Cxel cynimane aju mandamyent lu, ax icx il tiꞌj tuꞌn cyniman ke cyiyjile che ul itzꞌj te tibajxi, ex cꞌoquel te jun ley te jumajx. 25 Oc cyocxe tuj txꞌotxꞌ ctzajel tkꞌoꞌn Kman cyeye ic tzaꞌn o tzaj ttziyan, cucx cbel cyicꞌsaꞌne jlu. 26 Oc ttzaj cykanin cycꞌwaꞌle cyeye: ¿Ti t-xilen aju in cybinchaꞌne lu?, ka che chi, 27 cxeltzun cytzakꞌweꞌne cyjaꞌ: Aju tal alumaj lu in cub byet tuꞌn ttzaj naꞌt Xjan Kꞌij te Kman. Tej cycꞌixbiset aj Ejipt tuꞌn camic, tkanx icꞌ bet Kman ttzi kjaye tuj Ejipt, akoꞌ aj Israel, ex cyjaꞌtzun o ko clete, che chicuye cye cycꞌwaꞌle, chi Moisés cye.

Cubtzun mocꞌeꞌ cywiꞌ aj Israel, ex e cꞌulun te Kman. 28 E jeꞌxtzun ex cybincha tcyakil ic tzaꞌnx otok tzaj tmaꞌn Kman te Moisés ex Aarón.

29 Tmij akꞌbil tcꞌixbisa Kman tuꞌn camic ke nej cꞌwaꞌlbaj xinak tuj tja teyle junjun aj Ejipt, tzajx keꞌ tiꞌj tnejel tcyꞌajal Faraón in cub keꞌtok tuj tkꞌukbil, pon baj tiꞌj tnejel tcyꞌajal xjal tocxtok tuj pres, ax icx cycyakil ke nej cyal alumaj e cyim. 30 Jawtzun weꞌ Faraón te konicꞌan lu cyucꞌix keju attok cyoclen ttxlaj, ex cycyakil aj Ejipt e jaw okꞌ wen tuꞌn taꞌw cybis, porque tuj tcyakil txꞌotxꞌ Ejipt mintiꞌ jun ja mintiꞌwt jun xjal cyim tuj. 31 Ax konicꞌan lu e jeꞌx txocbaj Moisés ex Aarón tuꞌn Faraón, ex xi tmaꞌn cye cyjaꞌ:

—Cyexe cyucꞌix cycyakil aj Israel, ex cypaꞌmil cyibe cyiꞌj ke nxjalile. Cyxiꞌye cꞌulul te Cymane aju Cydiose, ic tzaꞌn o cymaye. 32 Cyiꞌnxe ke cyẍneꞌle ex ke cywacẍe ic tzaꞌn o cymaye, ex cyexe. Ax icx chin cycyꞌiwlancuye, chi Faraón.

33 E oc ten aj Ejipt lajwersil cye aj Israel tuꞌn cyetz naj tuj txꞌotxꞌ Ejipt, tuꞌnju o cyma: Ko cymel kcyakil, che chi. 34 Icꞌ cyiꞌn aj Israel tkꞌotjil cypan naꞌnxtok t-xiꞌ t-samel tuj, ocx cypotzin tal choc tuj xbalun, ex jax cykꞌoꞌn twi cysemil. 35 O cybincha ic tzaꞌn otok tma Moisés; xi cykanin cye aj Ejipt tuꞌn ttzaj cykꞌoꞌn cye ke tiꞌxti kꞌan pwak ex sak pwak cytxꞌotxꞌil, tucꞌix xbalun. 36 Tuꞌn Kman baꞌn e eꞌla aj Israel tuj cywitz aj Ejipt, ex tzaj cykꞌoꞌn aju xi cykanin cye. Cyjaꞌtzun tten etz cyiꞌn aj Israel nimcu tiꞌxti wiꞌyilxix cye aj Ejipt.

37 E jeꞌtz aj Israel tuj Ramesés tuꞌn cyul tuj Sucot, balo kak syent mil xinak akeju otok pon cyipun. Mintiꞌ e oc ke xuꞌj te tajlal, mi ke cꞌwaꞌl. 38 Ax icx e jeꞌtz nimcu txcaj xjal cyucꞌil, cyucꞌix nim ẍneꞌl ex nimxix wacẍ. 39 E oc ten txoꞌl cywa tiꞌj tkꞌotjil pan etz cyiꞌn tuj Ejipt, aju mintiꞌtok t-samel tuj, tuꞌnju nok elacyim e jeꞌtz lajoꞌn cyuꞌn aj Ejipt, ex mintiꞌtok ten ambil cyiꞌj tuꞌn tocx cykꞌoꞌn t-samel tuj.

40 Otok che ten aj Israel 430 abkꞌi tuj Ejipt. 41 Cybajlenxi ke 430 abkꞌi lu, ax kꞌij e jeꞌtz cycyakil xjal etzan tuꞌn Kman, tuj cꞌlojin cyten. 42 Tuj konicꞌan lu o cwentin Kman cyiꞌj tuꞌn cyetz tuj Ejipt. Atzun konicꞌan lu te Kman ex te nimbil te; cꞌajbel cye aj Israel te itzꞌlebl, ex cucx cbantel cyuꞌn te jumajx.

43 Tzaj tmaꞌn Kman te Moisés ex te Aarón cyjaꞌ:

—Atzun ke ley lu tuꞌn ticꞌset Xjan Kꞌij tej tkanx ticꞌ bet Kman: Mi jun stranjer xjal cchyoꞌl tiꞌj alumaj in chyoꞌnjtz tuj ninkꞌij lu. 44 Aju majen lakꞌomaj tuꞌn pwak, baꞌn tuꞌn tchyoꞌn tiꞌj, pero ka otok baj sircunsidarit; 45 atzunju majen nok nnuꞌl aj akꞌnal ex ke stranjer xjal, mlay che chyoꞌn tiꞌj. 46 Cxel chyoꞌt tuj junx ja. Misicyer jun piẍ tchibjal cꞌeletz tuj ja, ex miꞌn cub toket tbakil. 47 Iclex cbantel jlu cyuꞌn cycyakil aj Israel. 48 Katzun at jun stranjer xjal ma najan cyxole ex taj tuꞌn tcub ticꞌsaꞌn ninkꞌij lu te nimbil te Kman, il tiꞌj tuꞌn t-sircunsidarit nej cyucꞌix cycyakil xinak ateꞌ tuj tja; baꞌntzun tuꞌn ticꞌsan ninkꞌij lu tuꞌnju otok tzꞌoc mer ic tzaꞌn jun cyxjalile. Pero mi jun xjal mya sircunsidarimaj cchyoꞌl tiꞌj alumaj lu. 49 Axtzun ke ley lu che ajbel cye aj Israel ex cye stranjer xjal, akeju ax najl cyxole, chi Kman cye.

50 O cybincha cycyakil aj Israel ic tzaꞌn otok tma Kman te Moisés ex te Aarón. 51 Axtzun kꞌij lu e jeꞌtz tiꞌn Kman ke aj Israel tuj Ejipt tuj cꞌlojin cyten.