2 —Cypaꞌmile te weye cycyakil nej cꞌwaꞌlbaj xinak cyxol aj Israel, tzaꞌnx cyxol ke xjal, ax icx cyxol alumaj, porque weye cycyakil jlu.

3 Xi tmaꞌn Moisés cye xjal cyjaꞌ: Cynaꞌntze aju kꞌij lu, tej cyetze tuj Ejipt tjakꞌ tcawbil majnal cyeye. Tuꞌn te Kman ma che etz kꞌiꞌne tuꞌn nimxix tipumal. Tuꞌntzun jlu, miꞌn che waꞌne pan at t-samel tuj tuꞌn tjaw mal tcꞌuꞌj. 4 Che elexe jaꞌlo, tuj xjaw Abib. 5 Tujxtzun xjaw lu cbel cyicꞌsaꞌne aju ninkꞌij lu oc cyocxe tuꞌn Kman tuj cytxꞌotxꞌ aj Canaán, aj Hetey, aj Amorrey, aj Hevey ex aj Jebusey, aju o tzaj ttziyan Kman cye kxeꞌchel tuꞌn jun yol axix toc. Aju txꞌotxꞌ lu kꞌinun ex tbanilxix. 6 Wuk kꞌij che waꞌle pan mintiꞌ t-samel tuj, ex tuj twukin kꞌij cbel cyicꞌsaꞌne ninkꞌij tuꞌn tnimset tbi Kman. 7 Cyuj ke wuk kꞌij lu cxel waꞌt pan mintiꞌ t-samel tuj tuꞌn tjaw mal tcꞌuꞌj; mi jun at t-samel tuj ctel cyucꞌile, ex miꞌn ten t-samel pan tuj tcyakil cytanmiye. 8 Tuj tkꞌijlalil tzul cxel cytxꞌolbaꞌne cye cycꞌwaꞌle cyjaꞌ: In binchet jlu tuꞌnju o etz kꞌiꞌne tuꞌn Kman tuj Ejipt, che chicuye. 9 Cꞌoquel ninkꞌij lu te jun techal te cyeye, mer ic tzaꞌn tzꞌibamaj tibaj cykꞌabe ex tibaj cywitze, tuꞌntzun ttzaj cynaꞌne ex cucx tuꞌn cyyoline tiꞌj tley Kman, tuꞌnju e jeꞌtz kꞌiꞌne tuj Ejipt tuꞌn nimxix tipumal. 10 Aju ninkꞌij lu cbel cyicꞌsaꞌne teyle junjun abkꞌi tuj tkꞌijlalil banimaj tiꞌj.

11 Octzun cyocx kꞌoꞌne tuj cytxꞌotxꞌ aj Canaán tuꞌn Kman, ic tzaꞌn tzaj ttziyan cyeye ex cye cyxeꞌchele, ex oc ttzaj tkꞌoꞌn txꞌotxꞌ cyeye, 12 che xel cykꞌoꞌne te Kman cycyakil tnejel cycyꞌajale, ax icx ke nej cyal cyalune, akeju tal tman, porque te Kman cycyakil ke jlu. 13 Atzun teyle te junjun tnejel tal bur, cbajel cychꞌexpuꞌne tucꞌil jun tal ẍneꞌl ex ka jun tal chip, tuꞌntzun tcolpet. Katzun miꞌn ma baj cychꞌexpuꞌne, cjawiltzun cytokine tiꞌj tkul. Ax icx ke tnejel cycyꞌajale che bajel cychꞌexpuꞌne tuꞌn pwak. 14 Oc ttzaj cykanin cycꞌwaꞌle cyeye tuj tkꞌijlalil tzul: ¿Ti t-xilen jlu? ka che chi, cxeltzun cymaꞌne cye: Tuꞌnju o etz kꞌiꞌne tuj Ejipt tuꞌn Kman tuꞌn tipumal nimxix, jatum o tene te majen. 15 Cub tcyuwsaꞌn tanmi Faraón ex mintiꞌ o etz tzokpiꞌne tuꞌn. Tuꞌn jlu e cyim cycyakil ke nej cycyꞌajal aj Ejipt tuꞌn Kman, ax icx ke nej cyal cyalun. Cyjaꞌtzun in xi kkꞌoꞌne teyle te junjun nej tal alumaj, aju tal tman, te chojbil te Kman, ex in xi kkꞌoꞌne pwak te Kman te t-xel tnejel kcyꞌajale, che chicuye cye cycꞌwaꞌle. 16 Cyjaꞌtzun cꞌoquel jlu te jun techal te cyeye, mer ic tzaꞌn tzꞌibamaj tibaj cykꞌabe ex tibaj cywitze, ex cꞌajbel te cyeye tuꞌn ttzaj cynaꞌne, ate Kman etz kꞌinte ke tuj Ejipt tuꞌn nimxix tipumal, chi Moisés cye.

17 Tej cyetz ttzokpiꞌn Faraón ke aj Israel, mintiꞌ e icꞌx tiꞌn Dios tuj be nneꞌx tuj cytxꞌotxꞌ aj Filistey, aju mas nikayintok, porque tma Dios cyjaꞌ: Oc cytzaj aj Filistey kꞌojlel cyiꞌj, mya yajcu tzaj baj cycꞌuꞌj ex jaculo cub cyximan tuꞌn cyajtz meltzꞌaj tuj Ejipt. 18 E jeꞌx tiꞌn Dios tuꞌn cykꞌon welt tuj tbeyil tzkij txꞌotxꞌ, tumlal Mar Cyak Queꞌyin.

Tej cyetz aj Israel tuj Ejipt, kꞌiꞌmlex cyubl te cykꞌojbil. 19 Ax icx e etz tiꞌn Moisés tbakil José, porque otok cyaj tmaꞌn José cye aj Israel cyjaꞌ: Ax toc tzul Dios onil cyeye. Bix tzꞌex cyiꞌne ke nbakile cyucꞌile oc cyicꞌe tzalu, chi José.

20 E icꞌtzun aj Israel tuj Sucot, e pon tuj Etam aju tcub ttxaꞌn tzkij txꞌotxꞌ. 21 Te kꞌijl in cub nejtok Kman cywitz tuj muj te yecꞌulte cybe; atzun te konicꞌan in cub nejtok cywitz tuj tkan kꞌakꞌ tuꞌn t-spicꞌbante tuj cybe. Cyjaꞌtzun e bet kꞌijl ex konicꞌan. 22 Kꞌijl mintiꞌ el tpaꞌn tib muj cywitz xjal, ax icx konicꞌan mintiꞌ el tpaꞌn tib tkan kꞌakꞌ cywitz.