Tej cyicꞌx aj Israel tuj Mar Cyak Queꞌyin
14
Tzaj tmaꞌn Kman te Moisés cyjaꞌ:2 —Kꞌmanxa cye aj Israel tuꞌn cykꞌon welt ex e cycub ten twitz Pi-hahirot, t-xol tnam Migdol tucꞌix mar, tumlal Baal-zefón. Atzun che bel ten twitz lugar lu ttzi mar, 3 porque jacu cub t-ximan Faraón cyjaꞌ: Ma che el tzpet aj Israel tuj tzkij txꞌotxꞌ ma chixin ex mintiꞌ jatum baꞌn cyxiꞌ, chilo. 4 Cbel ncyuwsaꞌne tanmi Faraón tuꞌn toc lpeꞌ cyiꞌje, ex chin jawil nimsaꞌne oc tcub tiꞌj Faraón wuꞌne, cyucꞌix cycyakil ke t-soldad, ex cꞌelel cynicꞌ aj Ejipt wiꞌje, akine Cymane, chi Dios.
O cybincha aj Israel ic tzaꞌn otok tzaj kꞌmaꞌn cye. 5 Tej tpon tkanil tucꞌil rey te Ejipt ka otok che ex ok aj Israel, baj tchꞌexpuꞌn t-ximbetz, ax icx keju attok cyoclen ttxlaj, ex cyma cyjaꞌ: ¿Tzaꞌn tten ma txi kkꞌoꞌn ambil cye aj Israel tuꞌn cyex, ex ya miꞌntl che ajben ke? Che chi.
6 Bant tten tcarwaj Faraón, ex e jeꞌx tiꞌn ke t-soldad tucꞌil. 7 E jeꞌtz t-scꞌoꞌn kak syent carwaj tbanilxix, ax icx e jeꞌx tiꞌn cycyakil ke carwaj tuj Ejipt, ex e jeꞌx junjun nejenel cyujile. 8 Cub tcyuwsaꞌn Kman tanmi Faraón aju rey te Ejipt, ex oc lpeꞌ cyiꞌj aj Israel, akeju otok che etz cyuw cycꞌuꞌj wen.
9 E jeꞌtztzun ke aj Ejipt cyucꞌix cycyakil ke soldad, cyucꞌix ke carwaj ex keju cyjaxtok cyibaj chej, e oc lpeꞌ cyiꞌj aj Israel tuꞌn cytzyet, ex e pon cnet aj Israel cyuꞌn, lu ke otok che cub ten ttzi mar, ttxlaj Pi-hahirot, tumlal Baal-zefón. 10 Tejtzun cylonte aj Israel otok tzul lakꞌeꞌ Faraón cyucꞌix ke aj Ejipt, tzaj nimxix cyxobil ex jaw tkꞌajkꞌajel cywiꞌ in che kanin onbil te Kman, 11 ex xi cymaꞌn te Moisés cyjaꞌ:
—Baka mintiꞌ lugar tuꞌn kcuꞌx makuꞌne tuj Ejipt, tuꞌnju ma ko etz tiꞌna tuꞌn kcyime tuj tzkij txꞌotxꞌ. ¿Tikuꞌn ma tbinchaya kiꞌje icju? ¿Tikuꞌn ma ko etz tiꞌna tuj Ejipt? 12 ¿Myapetzun o txi kmaꞌne jlu teya tuj Ejipt? Ko chiye cyjaꞌ: Ko tkꞌoncja tuj txubtxaj. Ko ajbele cye aj Ejipt, porque mas baꞌn te keye tuꞌn kajbene cye twitzju tuꞌn kcyime tuj tzkij txꞌotxꞌ, ko chiye, che chi.
13 Xitzun tmaꞌn Moisés cye:
—Miꞌn che xobe. Che weꞌcuye ex cyqueꞌyinxe aju colbil oc tbinchaꞌ Kman cyeye jaꞌlo. Ke aj Ejipt in cyile jaꞌlo, te jumajx mlay cyiltle. 14 Ate Kman ckꞌojel te cyxele. Miꞌn baj cycꞌuꞌje, chi Moisés.
15 Tzajtzun tmaꞌn Kman te Moisés cyjaꞌ:
—¿Tikuꞌn in tzaj tkanina onbil weye? Kꞌmanxa cye aj Israel tuꞌn cybet-x. 16 Kꞌin jaw tcyꞌakoꞌcha, nukpinx tkꞌaba tibaj mar, ex paꞌn ela. E cyicꞌx aj Israel tuj tmij mar tuj tzkij. 17 Cbel ncyuwsaꞌne cyanmi aj Ejipt tuꞌn cyoc lpeꞌ cyiꞌje, ex chin jawil nimsaꞌne oc tcub tiꞌj Faraón wuꞌne, cyucꞌix ke t-soldad, ke tcarwaj ex keju cyjax cyibaj chej. 18 Cꞌeleltzun cynicꞌ aj Ejipt wiꞌje ka akine Cymane, oc tcub tiꞌj Faraón wuꞌne, cyucꞌix ke tcarwaj ex ke t-soldad cyjax cyibaj chej, chi Kman.
19 Aju t-anjel Dios nejnitok cywitz aj Israel nej, aj ttzal cyiꞌj, ax icx aju muj nejnitok cywitz, cyaj ten cyiꞌjxi. 20 Cyjaꞌtzun tten, cub ten muj cyxol aj Ejipt cyucꞌil aj Israel. Mujtok ex kloljtok cywitz aj Ejipt; atzun cywitz aj Israel, spicꞌuntok konicꞌan. Mintiꞌ e pon cnet aj Israel cyuꞌn aj Ejipt tuj enter konicꞌan lu.
21 Xi tnukpiꞌn Moisés tkꞌab tibaj mar. Tcyakil konicꞌan lu el tpaꞌn tib mar tuꞌn Kman tuꞌn jun nintz cykꞌikꞌ tzaj tuj tjawitz kꞌij. Cyjaꞌtzun tten cub tpaꞌn tib aꞌ, ex tzkij cyaj tmij mar. 22 E icꞌtztzun aj Israel tuj tmij mar jatum otok cyaj tzkij; cyaj ten mar tuj cybankꞌab mer ic tzaꞌn muro, ax icx tuj cynayaj.
23 E oc lpeꞌ aj Ejipt cyiꞌj, cyucꞌix cycyakil ke tchej Faraón, ke tcarwaj ex ke t-soldad cyjaxtok cyibaj chej, ex e joꞌcul max tuj tmij mar. 24 Tej chꞌixtok kskix, max tuj tkan kꞌakꞌ ex tuj muj e tzaj tqueꞌyin Kman ke soldad aj Ejipt, ex baj ttzpet-saꞌn cynabl. 25 E baj coꞌpj ke cyrwed carwaj, ex pen bant cybet. Cymatzun aj Ejipt cyjaꞌ: Ko el ok cywitz aj Israel, porque a Cyman in kꞌojl kiꞌj te cyxel tuꞌn cyclet, che chi.
26 Tzajtzun tmaꞌn Kman te Moisés cyjaꞌ:
—Nukpinx tkꞌaba tibaj mar, tuꞌntzun toctl tmojban tib aꞌ cyibaj aj Ejipt, cyibaj ke cycarwaj ex cyibaj ke soldad cyjax cyibaj chej, chi Kman.
27 Xitzun tnukpiꞌn Moisés tkꞌab tibaj mar. Tej tcub kꞌij ajtz mulkꞌaj mar ex pon tuj tlugar ic tzaꞌn tten nej. Tej cyel ok aj Ejipt, ax e pon tacl tiꞌj mar. Cyjaꞌtzun tten e baj t-xitun Kman tuj mar. 28 Oc tmojban tib aꞌ ic tzaꞌn tten nej, ex biꞌx e cyaj mulkꞌaj ke carwaj tuj mar, cyucꞌix ke soldad cyjaxtok cyibaj chej ex cycyakil ke t-soldad Faraón, akeju otok che oc lpeꞌ cyiꞌj aj Israel. Mi jun soldad o cyaj ankꞌin. 29 Atzun cye aj Israel e icꞌtz tuj tmij mar tuj tzkij. Toctok aꞌ ic tzaꞌn jun muro tuj cybankꞌab ex tuj cynayaj.