Aju tbitz Moisés
15
Octzun ten Moisés bitzal cyucꞌix aj Israel, te nimsabl te Kman ex cyma:Chin bitzale te Kman tuꞌnju maꞌxix toclen o tzaj tyecꞌun. O che cyaj tmulkꞌiꞌn ke chej tuj mar cyucꞌix keju cyjaxtok cyibaj.
2 Ate Kman kꞌolte wipumale ex o tzꞌoc te clol weye, chin bitzale te. Atzun we Ndiosju, ex chin bitzale tbi; atzun Tdios nmane, ex cjawil nnimsaꞌne.
3 At tipumal Kman tuꞌn tcub cyiꞌj aj kꞌoj tuꞌn, ex Kman tbi.
4 Ke tcarwaj Faraón cyucꞌix ke t-soldad o che cyaj tmulkꞌiꞌn tuj mar. Ke nejenel cye t-soldad scꞌoꞌmaj ke tuꞌn, o che cyaj mulkꞌaj tuj Mar Cyak Queꞌyin.
5 O che cuꞌx makuꞌn tuj aꞌ maꞌ t-xeꞌ, ex o che cuꞌpun max t-xe mar, mer ic tzaꞌn abj ke.
6 Nman, tuꞌn tbankꞌaba o tzaj tyecꞌuna tipumala maꞌxix. Tuꞌn tbankꞌaba Nman o che baj naj ke aj kꞌoj.
7 Tuꞌn tipumala maꞌxix o che cub t-xituna keju o jaw cyiꞌn cyib tiꞌja; tzaj ttxꞌuꞌjila ex o che cub tzꞌeꞌy tuꞌna, mer ic tzaꞌn chꞌim.
8 Tuꞌn t-xewa oc tchmon tib aꞌ, jaw chꞌiy ic tzaꞌn muro ex baj cyuwix aꞌ tmij mar.
9 Chi aj kꞌoj cyjaꞌ: Chin xel lpeꞌye cyiꞌj, che pol cnet wuꞌne, cbajel nsipane aju cꞌelel wiꞌne cye, ex chin tzalajele oc tcub cyiꞌj wuꞌne. Cjawitz wiꞌne nspadiye ex che cymel wuꞌne, chi.
10 Atzun teya Nman, xi t-xupina ex o che cyaj mulkꞌaj tuj mar. O che cuꞌx tzꞌak t-xe aꞌ nim tipun, ic tzaꞌn in cuꞌx tzꞌak plom.
11 Nman, ¿Alcye jun cyxol cydios xjal jacu pon ic tzaꞌn teya? ¿Alcye jun jacu pon ic tzaꞌn teya? Xjanxixa wen, xobajilxix ke tbinchbena, ex in tbinchaꞌna ke binchben nim cyipumal.
12 Ma tzaj tyecꞌuna tipumala ex ma cheꞌx balkꞌuꞌn ke aj kꞌoj tuꞌn txꞌotxꞌ.
13 Pero akeju ma che clet tuꞌna che xel t-ẍakluꞌna tuꞌn tkꞌakꞌbil tcꞌuꞌja, ex che xel tiꞌna tucꞌil tipumala tuj tnajbila xjan.
14 Oc tbinjtz jlu cyuꞌn txkantl nasyon, che tzajel luꞌlun, ex cbel cyxkutzꞌin cyib aj Filistey tuꞌn taꞌw.
15 Biꞌx cnajel cynabl ke nejenel te Edom, che tzajel luꞌlun keju at cyipun tuj Moab, ex biꞌx cbajel cyipun keju najl tuj Canaán.
16 Nman, ctzajel cyxobil ex che tzajel luꞌlun tuꞌn tipumala; che oquel ic tzaꞌn abj miban yucch ocxi cyicꞌx baj ke xjal etzan tuꞌna, akeju e colpet tuꞌna.
17 Nman, tuꞌna che oquex tiꞌna tuꞌn cynajan twi witz etzan tuꞌna, tuj lugar scꞌoꞌmaj tuꞌna tuꞌn ttena tuj, ex tuj ja xjanxix aju o baj tbinchaꞌna.
18 Ccawil Kman tuj tcyakil tabkꞌiyil te jumajx, che chi tuj cybitz.
Aju tbitz María
19 Tej toctz Faraón tuj mar cyucꞌix ke tcarwaj ex ke t-soldad cyjaxtok cyibaj chej, ajtz mulkꞌaj mar cyibaj tuꞌn Kman; atzun cye aj Israel e icꞌtz tuj tzkij tmij mar. 20 Atzunte María aju xuꞌj t-sanjel Dios ex tanb Aarón, tzaj tiꞌn jun tal chnab tuj tkꞌab, ic tzaꞌn tal tampor, ex cycyakil xuꞌj e jeꞌtz lpeꞌ tiꞌj kꞌiꞌmlex tal chnab lu cyuꞌn, ex in che bixuntok. 21 Atzunte María in bitzantok cyxol cyjaꞌ:
Che bitzane te Kman tuꞌnju maꞌxix toclen o tzaj tyecꞌun. O che cyaj tmulkꞌiꞌn ke chej tuj mar cyucꞌix keju cyjaxtok cyibaj, chi María.
Aju aꞌ cꞌa tuj lugar Mara
22 E icꞌtzun tiꞌn Moisés ke aj Israel ttzi Mar Cyak Queꞌyin, ex e canun tuj tzkij txꞌotxꞌ Shur. E bet ox kꞌij tuj txꞌotxꞌ lu ex mintiꞌ cnet aꞌ cyuꞌn. 23 E pontzun tuj lugar Mara, cnet chꞌin aꞌ cyuꞌn, pero mintiꞌ xi cycꞌaꞌn tiꞌj tuꞌnju cꞌatok. Tuꞌntzun jlu, Mara tbi lugar lu oc cykꞌoꞌn.
24 E octzun ten xjal yolil mya baꞌn tiꞌj Moisés ex cyma: ¿Titzun cxel kcꞌane? Che chi. 25 Entons o cubsan Moisés twitz Kman, ex tzaj tyecꞌun Kman jun wiꞌ tal tzeꞌ te. Cuꞌxtzun tkꞌoꞌn Moisés tal tzeꞌ lu tuj aꞌ; atzun te aꞌ o bant tcꞌanjtz.
Atzun tzaj tkꞌoꞌn Kman ju ley ex ju mandamyent cye, atzun e joꞌc ke xjal tuj malbil tuꞌn, 26 ex tzaj tmaꞌn cye cyjaꞌ: Akine Cymane aju Cydiose: Ka ma txi cybiꞌnxixe nyole, ka ma che bete baꞌn nwitze, ka ma tzaj cykꞌoꞌne cyẍcyine cyiꞌj ke nmandamyente ex ka ma che japun ke nleye cyuꞌne, mi jun yabil ctzajel cyiꞌje ic tzaꞌn tzaj nsamaꞌne cyiꞌj aj Ejipt, porque akine Cymane aju kꞌanal cyeye, chi Kman.
27 E pon tuj Elim jatum attok cablaj twi aꞌ ex 70 tkan palm, ex atzun e cub ten cytzi aꞌ.