—Maswitlo baꞌn nokwit o ko cyime tuꞌn Kman tuj txꞌotxꞌ Ejipt, tej in ko cub keꞌtoke waꞌl cyxol kcꞌile nojnitok ke tuꞌn chibj, tej in ko nojxixtoke wen tuꞌn wabj. Atzun cyeye, ma ko tzaj cyiꞌne tuj tzkij txꞌotxꞌ lu tuꞌn kcyime kcyakile tuꞌn weꞌyaj, che chi.

4 Tzajtzun tmaꞌn Kman te Moisés cyjaꞌ:

—Ctzajel nchitune wabj twitz cyaꞌj, atzun cye xjal che eletz chmolte te cycyakil kꞌij, pero oꞌcx cywa aju in baj te jun kꞌij cjawil cychmoꞌn, tuꞌntzun cyoc tuj malbil wuꞌne, ka cxel cyniman nyole ex ka miꞌn. 5 Atzun tuj tkakin kꞌij biꞌx cjawil cychmoꞌn cywa te cab kꞌij, chi Kman.

6 Xitzun cymaꞌn Moisés ex Aarón cye cycyakil aj Israel: Te kale jaꞌlo cꞌelel cynicꞌe tiꞌj, ate Kman etz kꞌinte cyeye tuj txꞌotxꞌ Ejipt; 7 atzun te prim nchiꞌj oc cyilaꞌye tajwalil Kman, tuꞌnju ma tbi in che yoline mya baꞌn tiꞌj. Atzun keye, ¿ti kxilene tuꞌnju in che yoline mya baꞌn kiꞌje? Che chi.

8 Ax icx tmatl Moisés: Ctzajel tkꞌoꞌn Kman chibj te cychiꞌye kale jaꞌlo; atzun te prim nchiꞌj ctzajel tkꞌoꞌn cywaye nimxix, tuꞌnju ma tbi in che yoline mya baꞌn tiꞌj. Atzun keye, ¿ti kxilene? Mya kiꞌje in che yoline mya baꞌn, nok oꞌcx tiꞌj Kman, chi Moisés.

9 Xi tmaꞌn Moisés te Aarón cyjaꞌ:

—Kꞌmanxa cye cycyakil aj Israel tuꞌn cytzaj lakꞌeꞌ twitz Kman, porque ma tbi Kman in che yolin xjal mya baꞌn tiꞌj, chi Moisés.

10 Matok in yolin Aarón cyucꞌil cycyakil aj Israel, xi cyqueꞌyin tuj tzkij txꞌotxꞌ, lu tajwalil Kman tzaj tyecꞌun tib tuj muj, 11 ex tzaj tmaꞌn Kman te Moisés cyjaꞌ:

12 —Ma nbiye in che yolin aj Israel mya baꞌn. Kꞌmanxa cye cyjaꞌ: Te kale jaꞌlo che chyoꞌle chibj, atzun prim che waꞌle ocxi cynoje, ex cꞌeleltzun cynicꞌe tiꞌj, akine Cymane aju Cydiose, chi Kman.

13 Tejtzun toc kax e ul tzꞌuchin ex baj noj tiꞌjele cycampament xjal cyuꞌn; atzunte prim tzaj tkꞌab cheꞌw ex cub tiꞌjele campament. 14 Tej tcub naj tkꞌab cheꞌw, at jun cyaj ten twitz txꞌotxꞌ, tal chꞌintok ex tal seꞌwtok, ic tzaꞌn ttxa cheꞌw. 15 Tejtzun tcyil aj Israel cyma cyxolx: ¿Titzun jlu? Che chi, tuꞌnju mintiꞌ ojtzkiꞌntok cyuꞌn. Xi ttzakꞌweꞌn Moisés cye:

—Atzun wabj jlu aju ma tzaj tkꞌoꞌn Kman cyeye tuꞌn t-xi cywaꞌne. 16 Atzun jlu ma tzaj tmaꞌn Kman: Cjawil cychmoꞌne oꞌcx aju in baj cyuꞌne tuj jun kꞌij, jun cꞌoẍ te teyle junjun xjal tuj tja.

17 Banttzun cyuꞌn aj Israel icju. At junjun jaw tchmoꞌn nim, ex at junjun nok chꞌin. 18 Cub cymaloꞌn tuj cꞌoẍ. Akeju jaw cychmoꞌn nim, mintiꞌ sobryin cye, ex akeju jaw cychmoꞌn nok chꞌin, acux o canun cye. Teyle junjun jaw tchmoꞌn ic tzaꞌnx twa in baj.

19 Ax icx xi tmaꞌn Moisés cye: Mi jun cyeye cyaj tcloꞌn twa te juntl kꞌij, chi.

20 At junjun mintiꞌ xi cyniman tyol Moisés, cyaj cycloꞌn cywa te juntl kꞌij, biꞌx e tzaj pokꞌl ẍukꞌ tuj, ex o tzuwix. Tzaj tkꞌoj Moisés cyiꞌj.

21 Cycyakil prim jaw tchmoꞌn teyle te junjun aju in baj tuꞌn tuj jun kꞌij, ex octzun tmekꞌt kꞌij in cub uljtok aju mintiꞌ otok jaw chmet. 22 Tujtzun tkakin kꞌij jaw cychmoꞌn cywa te cab kꞌij, cabe cꞌoẍ te teyle junjun xjal. Cycyakil ke nejenel cyxol xjal e ul ex xi cytxꞌolbaꞌn jlu te Moisés. 23 Xitzun tmaꞌn Moisés cye cyjaꞌ:

—Atzun jlu ma tzaj tmaꞌn Kman: Nchiꞌj, kꞌij xjan te ojlabl, aju ojlabl paꞌmaj te Kman. Aju wabj at tuꞌn ttzkꞌajset cyuꞌne tuj jorni, cytzkꞌajsame jaꞌlo; ex aju at tuꞌn tjax taꞌl cyuꞌne, cytxcon jaxe jaꞌlo, ex tcyakilju cyjel sobryin, cycꞌuꞌnxe te nchiꞌj chi Moisés.

24 Atzun cye xi cycꞌuꞌn te juntl kꞌij aju cyaj sobryin, ic tzaꞌn otok tma Moisés. Mintiꞌ o naj tuꞌn ẍukꞌ ex mintiꞌ o tzuwix. 25 Xi tmaꞌn Moisés cye: Che waꞌne tiꞌj jaꞌlo, porque jaꞌlo kꞌij te ojlabl te nimbil te Kman. Jaꞌlo mlay cnet wabj cyuꞌne twitz txꞌotxꞌ. 26 Kak kꞌij che elexe chmolte te, atzun tuj twukin kꞌij, kꞌij te ojlabl, ex mlay cnet cywaye twitz txꞌotxꞌ, chi Moisés.

27 At junjun xjal e jeꞌx chmolte cywa tuj twukin kꞌij ex mintiꞌ cnet cyuꞌn. 28 Tzajtzun tmaꞌn Kman te Moisés cyjaꞌ:

—¿Maj cucx cxeꞌl cyuꞌne tuꞌn miꞌn cyxi cynimane ke nmandamyente ex ke nxnakꞌtzbile? 29 Cybintze, akine Cymane o txi nkꞌoꞌne jun kꞌij te ojlabl. Tuꞌntzun jlu, tuj tkakin kꞌij in xi nkꞌoꞌne cywaye te cab kꞌij. Teyle te junjun, ax e tcyaj ten tuj tja, ex mi jun tuꞌn tex betel tuj twukin kꞌij, chi Dios.

30 Cyjaꞌtzun e ojlan ke xjal tuj twukin kꞌij.

31 Aju wabj jaw cychmoꞌn aj Israel, maná tbi oc cykꞌoꞌn. Ic tten ic tzaꞌn tiyjil culantr, saktok queꞌyin ex ictok tcꞌocꞌjal ic tzaꞌn pan tucꞌil taꞌl cab.

32 Tmatl Moisés:

—Atzun jlu ma tzaj tmaꞌn Kman: Cynojsame jun cꞌoẍ tuꞌn maná ex cycꞌuꞌnxe tuꞌn toc cyqueꞌyin ke cyiyjile che ul itzꞌj te tibajxi aju wabj xi nkꞌoꞌne te cywaye tuj tzkij txꞌotxꞌ, tej cyetz wiꞌne tuj txꞌotxꞌ Ejipt, chi Kman, chi Moisés.

33 Xi tmaꞌn Moisés te Aarón cyjaꞌ: Kꞌintza jun xar ex kꞌon cuꞌxa jun cꞌoẍ maná tuj. Kꞌon cuba twitz Kman ex e t-xi cꞌuꞌt, tuꞌntzun toc cyqueꞌyin kiyjil che ul itzꞌj te tibajxi, chi Moisés.

34 Cubtzun tkꞌoꞌn Aarón ju xar lu twitz cax cꞌubl tley Dios, tuꞌn t-xi cꞌuꞌt ic tzaꞌn otok tma Kman te Moisés.

35 Ake aj Israel e waꞌn 40 abkꞌi tiꞌj maná, tejxi cypon tuj txꞌotxꞌ attok xjal tuj, tejxi cypon ttzi tmojonil txꞌotxꞌ Canaán.

36 Jun efa, in xi baj laj cꞌoẍ tuj.