Aju aꞌ etz tuj pic
17
E jeꞌtz cycyakil aj Israel tuj tzkij txꞌotxꞌ Sin, e icꞌ bet ic tzaꞌn tzaj tmaꞌn Kman cye, ex e cub ten tuj Refidim, pero mintiꞌ cnet aꞌ te cycꞌa. 2 E jawtzun ilin xjal tiꞌj Moisés ex xi cymaꞌn te:—Kꞌontza aꞌ te kcꞌaye, che chi.
Xi tmaꞌn Moisés cye:
—¿Tikuꞌn in che oc tene ilil wiꞌje? ¿Tikuꞌn nnoꞌc Kman tuj malbil cyuꞌne? Chi Moisés.
3 Tzaj txketleꞌn cyiꞌj xjal ex e oc ten yolil mya baꞌn tiꞌj Moisés, xi cymaꞌn te:
—¿Ti til o ko etz tiꞌna tuj Ejipt tuꞌn kcyime tuꞌn txketleꞌn, cyucꞌix ke kcꞌwaꞌle ex ke kalune? Che chi.
4 Octzun ten Moisés cubsal twitz Kman ex xi tmaꞌn te cyjaꞌ:
—¿Ti che oquel xjal lu wuꞌne? Nok chꞌixmi in chin oc xoꞌne tuꞌn abj cyuꞌn, chi Moisés.
5 Tzajtzun tmaꞌn Kman te cyjaꞌ:
—Nejcuya cywitz ex kꞌinxa junjun tij xjal aj Israel tucꞌila. Ax icx kꞌinxa tcyꞌakoꞌcha tucꞌila, aju ajben tuꞌna tej tcub tpekꞌuna tibaj nima tuj Ejipt, ex bet-xa. 6 Lu kine chin bel tene twitza tibaj pic t-xe witz Horeb. Cꞌoquel tpekꞌuna twitz pic ex cꞌeletz aꞌ tuj. Che cꞌaltzun ke xjal tiꞌj, chi Dios.
Tbinchatzun Moisés icju cywitz tij xjal cyxol aj Israel. 7 Meriba tbi lugar lu oc tkꞌoꞌn, tuꞌnju cyuw jaw cyyol aj Israel tiꞌj Kman, ex Masah juntl tbi oc tkꞌoꞌn, tuꞌnju oc Kman tuj malbil cyuꞌn, ex che chi cyjaꞌ: ¿Atpelo Kman kxol, ex ka mi aꞌl?
Oc kꞌoj cyiꞌj aj Amalec
8 E tzajtzun aj Amalec kꞌojlel cyiꞌj aj Israel tuj Refidim, 9 ex xi tmaꞌn Moisés te Josué cyjaꞌ: Scꞌoꞌn jawa txkan xinak, ex cyxiꞌye kꞌojlel cyiꞌj aj Amalec. Atzun weye chin bel tene twi witz nchiꞌj tucꞌil tcyꞌakoꞌch Dios tuj nkꞌabe.
10 Tbinchatzun Josué ic tzaꞌn otok tma Moisés te. Oc ten kꞌojlel cyiꞌj aj Amalec; atzunte Moisés tucꞌix Aarón ex Hur e jax twi witz. 11 Oc cyjaw tkꞌoꞌn tkꞌab Moisés twitz cyaꞌj, in che cambantok aj Israel, ex oc cycub tiꞌn tkꞌab, atzun ke aj Amalec in che cambantok. 12 E sicttzun tkꞌab Moisés. Tuꞌntzun jlu tzaj kꞌiꞌn jun abj tuꞌn tcub keꞌ tibaj. Cubtzun keꞌ tibaj. Atzunte Aarón ex Hur tzyuꞌn ke tkꞌab Moisés cyuꞌn, jun tiꞌj jun tkꞌab ex jun tiꞌj juntl. Cyjaꞌtzun o cyipa tkꞌab tejxi tex kꞌij. 13 Cub cyiꞌj cycyakil soldad aj Amalec tuꞌn spad tuꞌn Josué.
14 Tzaj tmaꞌn Kman te Moisés cyjaꞌ:
—Tzꞌiban cuꞌxa jlu tuj jun uꞌj tuꞌn ttzaj naꞌt, ex kꞌmanxa te Josué cyjaꞌ: Te jumajx che bel nnajsaꞌne ke aj Amalec. Mi jun ctzajel naꞌnte cye twitz txꞌotxꞌ, chi Kman.