2 Tuj lugar lu mintiꞌ cnet cycꞌa xjal aꞌ, e oc cychmon cyib cycyakil tuꞌnju at cykꞌoj tiꞌj Moisés ex tiꞌj Aarón, 3 ex tzaj cyyol tiꞌj Moisés:

—Maswitlo baꞌn nokwit biꞌx o cyime junx cyucꞌil ke ktzan kermaniye e cyim tuꞌn Kman. 4 ¿Ti til e tzaj tiꞌna ke xjal etzan tuꞌn Kman tuꞌn cyul tuj tzkij txꞌotxꞌ lu? ¿Maj tajtzuna tuꞌn kcyime cyucꞌix ke kalune? 5 ¿Tikuꞌn o jetz tiꞌna tuj Ejipt tuꞌn kul tiꞌna tuj lugar lu puro xobajil? Mintiꞌ chꞌin kawal baꞌn tuꞌn tcuꞌx kawaꞌn tuj; mintiꞌ tkan higo, mintiꞌ tkan uva, mintiꞌ tkan carnad ẍokꞌ; mintiꞌlpe aꞌ te kcꞌa, che chi.

6 Atzunte Moisés tucꞌix Aarón el cypaꞌn cyib cyiꞌj xjal, e jeꞌx ttzi ja xbalun te mojbabl tibil, e cub mutzkꞌaj ex pon tacl tibaj cywitz twitz txꞌotxꞌ. Cub tyecꞌun tib t-spicꞌumal Kman cywitz, 7 ex tzaj tmaꞌn Kman te Moisés:

8 —Chmon oca tnam xjal, aya tucꞌix ttzica Aarón, tzyuma aju var ex kꞌmanxa te pic, cywitzx cycyakil tnam xjal, tuꞌn tetz aꞌ tuj, ex cꞌeletztzun aꞌ tuj pic tuꞌn cycꞌan tnam xjal cyucꞌix cyalun.

9 Jawtzun ttzyuꞌn Moisés aju var tcub twitz Kman ic tzaꞌnx otok tma Kman te. 10 Baj cychmoꞌn Moisés tucꞌix Aarón tnam xjal t-xe pic ex tma Moisés cye:

—Cybinxe, akeye xjal miban che bin: ¿Cꞌeletzpe aꞌ kuꞌne tuj pic lu te cycꞌaye?

11 Jaw tiꞌn Moisés tkꞌab ex oc tpekꞌan cab maj aju pic tuꞌnju var, ex etz nimxix aꞌ tuj pic. E octzun ten xjal cꞌal aꞌ cyucꞌix cyalun. 12 Atzunte Kman tma te Moisés ex te Aarón:

—Tuꞌnju mintiꞌ xkeꞌ cycꞌuꞌje wiꞌje ex mintiꞌ ẍin jaw cynimsaꞌne cywitz aj Israel, mlay che ocx cyiꞌne ke xjal tuj txꞌotxꞌ tziyimaj wuꞌne cye, chi Dios.

13 Atzun tbi twi aꞌ lu Meriba, jatum e jaw yolin aj Israel tiꞌj Kman, ex atzun tzaj tyecꞌun Kman cye ka xjan te.

14 Matok ateꞌ tuj Cades e jeꞌx t-samaꞌn Moisés junjun t-sanjel tuꞌn cypon tucꞌil rey te Edom ex tuꞌn t-xi cymaꞌn te: Ke termaniya aj Israel ma tzaj cymaꞌn teya cyjaꞌ: Baꞌn tuꞌna aju yajbil ma tzicꞌx kuꞌne. 15 Ke ktzan kxeꞌchele e jeꞌx tuj Ejipt ex nim tyemp o ko tene ma chixin, o ko yajlanjtze cyuꞌn aj Ejipt ic tzaꞌnx yajbil cye ktzan kxeꞌchele, 16 o cubsane twitz Kman, o tzaj tbiꞌn tkꞌajkꞌajel kwiꞌye, tzaj t-samaꞌn jun anjel, ex o etz kꞌiꞌne tuꞌn tuj Ejipt. Atzun jaꞌlo lu koꞌye atoꞌye tuj tnam Cades aju tmojonin tib tucꞌil ttanmiya. 17 In ko cubsane twitza tuꞌn ttzaj tkꞌoꞌna ambil keye tuꞌn kicꞌx bete tuj ttxꞌotxꞌa. Miꞌn ko icꞌx bete tuj txꞌotxꞌ at awal tuj, mi tuj tkan uva, ex miꞌn ko cꞌane tiꞌj aꞌ cyuj ke t-xocha. Tuj ninbe ko betele, ex miꞌn txi kiꞌne juntl be ocxi kexe tiꞌjxi ttxꞌotxꞌa, che chi.

18 Tzaj ttzakꞌweꞌn rey te Edom:

—Miꞌn che icꞌx bete tuj ntxꞌotxꞌe, porque katzun ma che icꞌx bete, chin elexe cyucꞌil ke nsoldadiye kꞌojlel cyiꞌje.

19 Xi cytxꞌolbaꞌn juntl maj ke aj Israel:

—Oꞌcx tuj ninbe ko icꞌx bete. Akoye ex ke kwacẍe, ka ma ko cꞌane tiꞌj aꞌ cyuj t-xocha jacu kchoje teya. Oꞌcx keye kajbile, tuꞌn kicꞌx bete tuj ttxꞌotxꞌa.

20 Tzaj ttzakꞌweꞌn rey te Edom:

—Mlay che icꞌx bete.

Etztzun rey te Edom kꞌojlel cyiꞌj aj Israel cyucꞌix nimcu t-soldad, kꞌiꞌmlex cymacbil te kꞌojbil, 21 ex mintiꞌ o takꞌ rey te Edom ambil cye aj Israel tuꞌn cyicꞌx bet tuj ttxꞌotxꞌ. Tuꞌn jlu xi cyiꞌn aj Israel juntl be.

22 Cub be cyuꞌn cycyakil aj Israel, e jeꞌtz tuj Cades ex e pon t-xe witz Hor. 23 Atzun tuj tmojonil txꞌotxꞌ Edom tucꞌix witz Hor o tma Kman te Moisés ex te Aarón:

24 Cymel Aarón ex mlay pon tuj txꞌotxꞌ o txi ntziyane cye aj Israel, porque e icꞌe tibaj nyole tuj Meriba jatum etz twi aꞌ. 25 Aya Moisés, kꞌinxa Aarón tucꞌix Eleazar aju tcyꞌajal, ex kꞌiꞌn jaxa ke twi witz Hor, 26 atzun cꞌelel tiꞌna t-xbalun Aarón, aju t-xbalun pal, ex cꞌoquel tkꞌoꞌna tiꞌj Eleazar, ex axtzun cymel Aarón ex cpol cyucꞌil ke ktzan t-xeꞌchel.

27 Tbinchatzun Moisés ic tzaꞌnx otok tma Kman te, ex o cyil cycyakil xjal tej cyjax twi witz. 28 Atzun el tiꞌn Moisés t-xbalun Aarón, aju t-xbalun pal, ex oc tkꞌoꞌn tiꞌj Eleazar aju tcyꞌajal Aarón. Axtzun cyim Aarón twi witz Hor; atzunte Moisés tucꞌix Eleazar e cuꞌtz twi witz. 29 Tejtzun cybinte cycyakil aj Israel ka otok cyim Aarón, e oc ten okꞌel 30 kꞌij tiꞌj.