Cub cyiꞌj aj Canaán
21
Tej tbinte jun rey aj Canaán, aju najltok tuj Néguev ex rey te tnam Arad, ka cyjaꞌ cyxiꞌ aj Israel tuj be te Atarim, etz kꞌojlel cyiꞌj ex e jaw ttzyuꞌn junjun xjal tuj kꞌoj tuꞌn cyxi tiꞌn pres. 2 Xitzun cytziyan aj Israel jun yol te Kman cyjaꞌ: Ka ma tzꞌonina kiꞌje tuꞌn tcub tiꞌj nintz tnam lu, cbeltzun kxitune cycyakil tnam ateꞌ tjakꞌ cycawbil. 3 Tbinchatzun Kman cye aj Israel ic tzaꞌnx otok txi cykanin, ex onin Kman cyiꞌj tuꞌn tcub cyiꞌj aj Canaán. Cubtzun cyiꞌj aj Canaán cyuꞌn aj Israel, ax icx e tenba ke mastl tnam ateꞌ tjakꞌ cycawbil; tiltzun oc kꞌoꞌn tbi lugar lu Horma.Aju tilbilal lobaj kꞌan cꞌuxbil ttxꞌotxꞌil
4 E icꞌtzun aj Israel twi witz Hor, e bet tumlal mar Cyak Queꞌyin, tuꞌn cycuman tiꞌj cytxꞌotxꞌ aj Edom. Bajtzun cypasens xjal tuj be, 5 ex e oc ten yolil mya baꞌn tiꞌj Dios ex tiꞌj Moisés, in cymaꞌntok:
—¿Tikuꞌn xko etz cyiꞌne tuj Ejipt nok tuꞌn kbaj cyime tuj tzkij txꞌotxꞌ? Mintiꞌ kcꞌa aꞌ ex mintiꞌ kwa. Ma baj kgane tuꞌn kwaꞌne tiꞌj wabj lu mya tbanil.
6 E jawtzun jlet ke lobaj tuꞌn Kman, akeju in che cyim xjal cyuꞌn, tuꞌntzun cyoc txꞌaꞌn aj Israel, ex nim aj Israel e baj cyim cyuꞌn lobaj. 7 E pontzun aj Israel tucꞌil Moisés ex xi cymaꞌn te:
—Ma ko binchane il tuꞌnju ma ko yoline mya baꞌn tiꞌj Dios ex tiꞌja. Cubsana twitz Kman tuꞌn cyel tlakꞌbaꞌn ke lobaj kiꞌje.
—Binchan cuba jun tilbilal lobaj kꞌan cꞌuxbil ttxꞌotxꞌil, ex kꞌoꞌn jaxa tiꞌj jun tzeꞌ. Octzun toc txꞌaꞌn jun xjal tuꞌn lobaj, ka ma txi tqueꞌyin tiꞌj tilbilal lobaj toc tiꞌj tzeꞌ, cꞌankꞌil, mlay cyim.
9 Cubtzun tbinchaꞌn Moisés jun tilbilal lobaj kꞌan cꞌuxbil ttxꞌotxꞌil, ex jax tkꞌoꞌn twiꞌ jun tzeꞌ. Octzun toc txꞌaꞌn jun xjal tuꞌn lobaj, oꞌcx oc t-xi tqueꞌyin tiꞌj tilbilal lobaj kꞌan cꞌuxbil ttxꞌotxꞌil, mintiꞌtzun in cyim.
E el cumin aj Israel tiꞌj cytxꞌotxꞌ aj Moab
10 Cub be cyuꞌn aj Israel ex atzun e cub ten tuj lugar Obot. 11 Cyexlenxi tuj Obot, xi cyiꞌntl cybe ex atzun e cub tentl tuj lugar Ije-abarim tuj tzkij txꞌotxꞌ, tumlal tjawitz kꞌij te cytxꞌotxꞌ aj Moab. 12 Cyexlenxi tuj lugar lu, xi cyiꞌntl cybe ex atzun e cub tentl ttzi tkꞌab xak Zered. 13 Cyexlenxi tuj lugar lu, xi cyiꞌntl cybe ex atzun e cub tentl jlajxi nima Arnón. Aju nima lu, atzun taꞌ tuj tzkij txꞌotxꞌ, tzajnix max tuj cytxꞌotxꞌ aj Amorrey, ex atzun nima lu toc te tmojonil cytxꞌotxꞌ aj Moab cyucꞌil aj Amorrey. 14 Atzun t-xilen aju in tmaꞌn tuj uꞌj jatum in yolin cyiꞌj ke kꞌoj e oc tuꞌn Kman, chi cyjaꞌ:
O icꞌe tuj Vaheb tuj txꞌotxꞌ Sufá, cyuj ke tkꞌab xak ex tuj nima Arnón,
15 cytziꞌyile ke tkꞌab xak, akeju tzajnix keꞌ max tuj txꞌotxꞌ te Ar ex ponin baj max tmojonil Moab.
16 Cyicꞌlenxi jatum taꞌ nima Arnón, xi cyiꞌn cybe tuꞌn cypon max Beer. Atzun taꞌ xoch jatum xi tmaꞌn Kman te Moisés cyjaꞌ: Chmon oca tnam xjal ex cxel nkꞌoꞌne aꞌ cye. 17 Atzun kꞌij xi cybitzan aj Israel jun bitz cyjaꞌ:
Aya aꞌ tjatz tilja tuj xoch. Cybitzanxe bitz tiꞌj xoch.
18 Cuꞌx cylacuꞌn ke nejenel aju xoch lu cyuꞌn cyvar te cycawbil; ke xjal maꞌ cyoclen tuj tnam cuꞌx cylacuꞌn cyuꞌn cycyꞌakoꞌch.
Cyexlenxi aj Israel tuj tzkij txꞌotxꞌ, xi cyiꞌntl cybe ex e pon max tuj lugar Matana; 19 cyexlenxi tuj Matana e pon tuj Nahaliel, cyexlenxi tuj Nahaliel, e pon tuj Bamot, 20 ex cyexlenxi tuj Bamot, e pon tuj chkꞌajlaj tcub tuj cytxꞌotxꞌ aj Moab, tumlal twi witz Pisga, jatum kꞌanchaꞌlin lugar tzkij txꞌotxꞌ.
Cub tiꞌj rey Sehón cyuꞌn aj Israel
21 Xi cysamaꞌn aj Israel junjun xjal tuꞌn cypon tucꞌil Sehón aju rey cye aj Amorrey, kꞌmalte te cyjaꞌ: 22 Kajbile tuꞌn kicꞌx bete tuj ttxꞌotxꞌa. Mlay ko ocxe cyuj ke cojbil at awal cyuj, mi cyxol ke tkan uva, ex miꞌn ko cꞌane tiꞌj aꞌ at cyuj ke t-xocha. Ko elexe tuj ttxꞌotxꞌa, pero cyjaꞌ ko xeꞌle tuj ninbe, che chi.
23 Atzunte Sehón mintiꞌ xi tkꞌoꞌn ambil tuꞌn cyicꞌx bet aj Israel tuj ttxꞌotxꞌ, nok oꞌcx oc tchmoꞌn cycyakil t-xjalil, xiꞌtzun tuj tzkij txꞌotxꞌ tuj lugar Jahaza tbi, ex atzun oc tzokpaj tuꞌn tkꞌojin cyiꞌj aj Israel. 24 O cub tiꞌj rey Sehón cyuꞌn aj Israel, o tzyet ttxꞌotxꞌ cyuꞌn, tzajx keꞌ ttzi nima Arnón ex pon baj ttzi nima Jaboc, ex ka tucꞌil tmojonil cytxꞌotxꞌ aj Amón, aju xkꞌukin wen cyuꞌn soldad. 25 Cyjaꞌtzun tten e tzyet cycyakil tnam cye aj Amorrey cyuꞌn aj Israel, tucꞌix nintz tnam Hesbón, cyucꞌix mastl tnam, ex axtzun e cyaj ten najal cyuj. 26 Tuj tnam Hesbón atzun najltok Sehón aju rey cye aj Amorrey. Ate Sehón otok kꞌojin tucꞌil rey aju toctok nej te rey cye aj Moab, ex otok tzꞌel tiꞌn tcyakil ttxꞌotxꞌ aju ponin baj max ttzi nima Arnón. 27 Cyjaꞌtzun, akeju baꞌn che bitzan in cymaꞌn cyjaꞌ:
Cytzaje tuj Hesbón aju nintz tnam te rey Sehón. Cybinchan jawe juntl maj, cykꞌonque muro tiꞌj juntl maj.
28 O tzꞌetz kꞌakꞌ tuj tnam Hesbón ex o jaw tkan kꞌakꞌ tuj nintz tnam te rey Sehón. O naj nintz tnam Ar aju te Moab, cyucꞌix ke cyajaw witz ateꞌ ttzi nima Arnón.
29 Becꞌbil cywitze akeye aj Moab. Ma che naje akeye in che cꞌulune twitz dios Quemós, aju ma txi kꞌonte ambil tuꞌn cyel ok ke xinak ateꞌ tuj tcwent, ex ke xuꞌj ateꞌ tuj tcwent tuꞌn cycub tzꞌak tuj tkꞌab Sehón aju cyrey aj Amorrey.
30 Ma naj tipumal tnam Hesbón, tzajnix keꞌ tuj tnam Dibón ex ma pon baj tuj tnam Nofa; tcyakil ma baj naj ex max pon canun kꞌakꞌ tuj tnam Medeba.
Cub tiꞌj Og aju rey te Basán cyuꞌn aj Israel
31 Cyjaꞌtzun e cub ten aj Israel tuj cytxꞌotxꞌ aj Amorrey. 32 Ax icx e jeꞌx t-samaꞌn Moisés junjun xinak queꞌyilte tnam Jazer, ex o cub cyiꞌj tnam cyvesin cyib tucꞌil cyuꞌn aj Israel, ex e jeꞌx cylajoꞌn ke aj Amorrey najl cyuj. 33 Te tibajxi tzyet cybet tumlal txꞌotxꞌ Basán, atzunte Og aju rey te Basán etz cyucꞌix cycyakil ke t-soldad, kꞌojlel cyiꞌj aj Israel tuj tnam Edrei. 34 Tzajtzun tmaꞌn Kman te Moisés cyjaꞌ: Miꞌn tzaj t-xobila twitz, cxel nkꞌoꞌne tuj tkꞌaba junx cyucꞌil cycyakil t-soldad ex tucꞌix ttanmi. Icx cbantel tuꞌna tiꞌj, ic tzaꞌn o tbinchaya tiꞌj Sehón aju rey cye aj Amorrey, aju najltok tuj tnam Hesbón, chi Kman.
35 Cyjaꞌtzun tten cub cybyoꞌn aj Israel aju rey Og, cyucꞌix ke tcyꞌajal ex cycyakil t-soldad. Mi jun cyaj ankꞌin cyuꞌn, ex tzyet ttxꞌotxꞌ cyuꞌn.