2 Atzunte Balac aju tcyꞌajal Zipor o til tcyakilju otok cybincha aj Israel cyiꞌj aj Amorrey. 3 Ax icx tzaj nimxix cyxobil ke xjal aj Moab tej cylonte nimxix cybet aj Israel, ex tzaj baj cycꞌuꞌj tuꞌn cylaj aj Israel. 4 Cymatzun ke aj Moab cye ke tij xjal te Madián:

—Cbajel naj ktxꞌotxꞌ cyuꞌn cycyakil xjal lu ic tzaꞌn in baj twaꞌn wacẍ cꞌul tuj cojbil, che chi.

Tuj tkꞌijlalil lu toctok Balac te rey tuj Moab. 5 E jeꞌx t-samaꞌn Balac ke t-sanjel txcolte Balaam aju tcyꞌajal Beor; atzun taꞌtok Balaam tuj Petor nikayin ttzi nima Éufrates tuj txꞌotxꞌ Amav. Xi tmaꞌn Balac tuꞌn t-xi cymaꞌn te Balaam cyjaꞌ: At jun tnam ma tzaj tuj Ejipt, ma txi t-sipan tib twitz txꞌotxꞌ, ex jaꞌlo ma che cub ten nikayin nwitze. 6 Binchama xtalbil, tzaja wucꞌile jaꞌlo, kaninxa mya baꞌn cyibaj ke xjal lu, porque mas at cyipun kwitze. Kapelo jacu cub cyiꞌj wuꞌne icju tuꞌn cyex nlajoꞌne tuj ntanmiye. Baꞌn wuꞌne akeju in che cub tcyꞌiwlaꞌna, in cycꞌmoꞌn cyꞌiwbil, ex akeju in xi tkanina mya baꞌn cyibaj, in tzaj mya baꞌn cyibaj, chi Balac, che chicuye.

7 E jeꞌxtzun ke tij xjal te Moab, ax icx ke tij xjal te Madián, tucꞌix pwak xi cyiꞌn tuꞌntzun tchjet Balaam tuꞌn t-xi tkanin mya baꞌn cyibaj aj Israel. Tejtzun cypon jatum taꞌtok Balaam, xi cymaꞌn aju yol otok tma Balac. 8 Atzunte Balaam xi tmaꞌn cye:

—Ax che tene tuj akꞌbil lu, nchiꞌjxitzun txi ntzakꞌweꞌne aju cykanbetze ic tzaꞌnx ctzajel tmaꞌn Kman weye, chi Balaam.

Axtzun e cyaj ten ke tij xjal tucꞌil Balaam, akeju nejenel cye aj Moab. 9 Cub tyecꞌun tib Dios twitz Balaam ex tzaj tkanin te:

—¿Alcye ke xinak lu ateꞌ tucꞌila?

10 Xi ttzakꞌweꞌn Balaam:

—Ke xinak lu samaꞌn ke tuꞌn Balac aju tcyꞌajal Zipor ex rey te Moab, ma che ul kꞌmalte weye: 11 At txkan xjal ma che etz tuj Ejipt ex ma baj cysipan cyib twitz txꞌotxꞌ. Ttzaj naja, chi Balac, tuꞌn t-xi tkanina mya baꞌn cyibaj ke xjal lu. Kapelo jacu cub cyiꞌj wuꞌne ex tuꞌn cyex nlajoꞌne, chi Balac, che chi ke xjal weye.

12 Xitzun tmaꞌn Dios te Balaam:

—Miꞌn txiꞌya cyucꞌil ex miꞌn txi tkanina mya baꞌn cyibaj xjal lu, porque cyꞌiwlaꞌn ke wuꞌne.

13 Tejtzun tjaw weꞌ Balaam tuj juntl kꞌij, xi tmaꞌn cye cytijil xjal akeju otok che tzaj t-samaꞌn Balac:

—Cyaj meltzꞌaje tuj cytanmiye. Miꞌn taj Dios tuꞌn nxiꞌye cyucꞌile.

14 E ajtzun ke nejenel te Moab, e pon tucꞌil Balac ex xi cymaꞌn te:

—Mintiꞌ ma tcuya Balaam tuꞌn ttzaj kucꞌile.

15 Atzunte Balac xi t-samaꞌn mastl nejenel, mas nim cybet ex mas maꞌ chꞌintl cyoclen cywitz keju e jeꞌx nej. 16 E jeꞌxtzun tucꞌil Balaam ex xi cymaꞌn te:

—At jun yol ma tzaj kꞌmaꞌn teya tuꞌn Balac aju tcyꞌajal Zipor, chi cyjaꞌ: Chin cubsale twitza, miꞌn cub t-xcꞌayin tiba tuꞌn ttzaja wucꞌile. 17 Jacu jaw nnimsaꞌna ex jacu bant wuꞌne tcyakilju ctzajel tkanina weye; tzaja ex binchama xtalbil weye tuꞌn t-xi tkanina mya baꞌn cyibaj xjal lu, chi Balac.

18 Xi ttzakꞌweꞌn Balaam:

—Masque tzaj tkꞌoꞌn Balac tcyakil kꞌan pwak ex sak pwak at tuj tja, mlay chin icꞌe tibaj ju yol ctzajel tmaꞌn Dios weye, tuꞌn tbant jun tiꞌxti wuꞌne ka matij ex ka chꞌin. 19 Jaꞌlotzun ax icx cyeye ax che tencje wucꞌile te ju akꞌbil lu, ex jacutzun wile ti ctzajel tmaꞌntl Dios weye, chi Balaam cye.

20 Tuj akꞌbil lu cub tyecꞌun tib Dios twitz Balaam ex tma:

—Ka txcol teya ma che ul ke xinak lu, weꞌctza ex txiꞌya cyucꞌil, pero oꞌcx cbantel tuꞌna aju cxel nmaꞌne teya.

21 Tej tjaw weꞌ Balaam tuj juntl kꞌij, oc tkꞌoꞌn t-siy tbur ex xiꞌ cyucꞌil ke nejenel cye aj Moab; 22 tjaxtok Balaam tibaj tbur, cyucꞌix cabe tmajen e jeꞌx tucꞌil.

Tzajtzun ttxꞌuꞌjil Dios tiꞌj Balaam tuꞌnju otok txiꞌ cyucꞌil nejenel, ex cub ten t-anjel Dios tuj be tuꞌn tmaket tbe. 23 Tejtzun tlonte bur aju t-anjel Dios tcubtok tuj tbe kꞌiꞌntok jun spad tuꞌn, icꞌx ttxlaj be; atzunte Balaam oc tjatoꞌn tbur tuꞌn asyal tuꞌntzun tmeltzꞌaj juntl maj tuj tbe. 24 Cub weꞌ juntl maj t-anjel Dios tuj be t-xol tkan uva, xiꞌynitok tapya xak ttxlaj cycabil pacꞌ be. 25 Tejtzun tilwaj t-anjel Dios tuꞌn bur, oc tbetzꞌan tib twitz tapya, tucꞌix tkan Balaam oc betzꞌaj. Atzunte Balaam oc ten juntl maj jatol asyal tiꞌj tbur. 26 Icꞌ nej t-anjel Dios cywitz, ex cub weꞌ juntl maj tuj be mas chꞌin tuj, ex mintiꞌ jatum tuꞌn kex ttxlaj be. 27 Tej tlonte bur t-anjel Dios, cub buneꞌ twitz txꞌotxꞌ. Tzajtzun tkꞌoj Balaam ex baj tpekꞌan tbur tuꞌn ttzeꞌ. 28 Bant tyolin bur tuꞌn Dios ex xi tmaꞌn te Balaam:

—¿Ti ma nbinchaye tiꞌja? Atzun toxmajiꞌn chin baj tasyalina.

29 Xitzun ttzakꞌweꞌn Balaam te tbur:

—In xmayina wiꞌje. Nokwit at jun spad tuj nkꞌabe, jaꞌlo cub nbyoꞌna.

30 Xi ttzakꞌweꞌn bur te:

—¿Myapetzun akine tburra? Akine in chin ikante teya tcyakil maj atxix tej npone tucꞌila. ¿Ope nbinchaye jun maj tiꞌja ic tzaꞌn jlu?

—Mintiꞌ, chi Balaam.

31 Jakettzun twitz Balaam tuꞌn Kman, ex o ilwaj t-anjel Kman tuꞌn, waꞌl tcubtok tuj be ex kꞌiꞌn jun spad tuj tkꞌab. Cubtzun ẍmejeꞌ Balaam ex pon tacl tibaj twitz max twitz txꞌotxꞌ. 32 Atzunte t-anjel Kman xi tmaꞌn te:

—¿Tikuꞌn ma baj tasyalina ox maj tburra? Akine ma chin ule makolte tbeya, porque aju tbeya kꞌiꞌn mya baꞌn tuj nwitze. 33 Ox maj ma chin ilwaje tuꞌn tburra ex ma tzꞌel tcumin tib wiꞌje. Nokwit mintiꞌ sel tcumin tib wiꞌje, mawtlo cyima wuꞌne atzunte tburra mintiꞌwtlo xcyim.

34 Xi ttzakꞌweꞌn Balaam te t-anjel Kman:

—Ma chin binchane il, mintiꞌtok baꞌn wuꞌne ka aya otok cub ten tuj be makolte weye. Ka mya baꞌn ma tzꞌela tuj twitza aju nbeye lu, jacu chin aj meltzꞌaje, chi Balaam.

35 Xi ttzakꞌweꞌn t-anjel Kman:

—Baꞌn tuꞌn t-xiꞌya cyucꞌil xjal lu, pero oꞌcx kꞌmanxa aju cxel nmaꞌne teya, chi t-anjel Kman. Xiꞌtzun Balaam cyucꞌil ke nejenel otok che tzaj t-samaꞌn Balac.

36 Tej tbinte Balac ka cyjaꞌtok ttzaj Balaam, etz canul tiꞌj tuj jun tnam tuj txꞌotxꞌ Moab ttxlaj nima Arnón, tujx tmojonil ttxꞌotxꞌ, 37 ex xi tmaꞌn te:

—Ma ntxoca cab maj. ¿Tikuꞌn pen ma tzaja? ¿Kapelo ma ximana tiꞌj ka mlay jaw nnimsaꞌna?

38 Xi ttzakꞌweꞌn Balaam:

—Lu kine lu ma chin ule tucꞌila. Mintiꞌ woclene tuꞌn nyoline tuj wexe nnable; nok oꞌcx chin yolile tiꞌj yol tzul tmaꞌn Dios weye.

39 Xiꞌtzun Balaam tucꞌil Balac tuj Quiriat-huzot, 40 atzun xi tmaꞌn Balac tuꞌn cycub byet wacẍ ex ẍneꞌl ex tuꞌn t-xi kꞌoꞌn chꞌin te Balaam ex cye nejenel ucꞌintok tuꞌn.

41 Te prim te juntl kꞌij icꞌ ucꞌin Balaam tuꞌn Balac tuꞌn cyjax twi witz Baamot-baal tbi, jatum kꞌanchaꞌltok ttxaꞌnile cycampament aj Israel.