23
Xitzun tmaꞌn Balaam te Balac:—Binchan baja wuk altar te patbil chojbil, ex byoncuya wuk tal tor ex wuk tman ẍneꞌl.
2 Banttzun tuꞌn Balac ic tzaꞌnx otok tma Balaam, ex cub cypatun jun tal tor ex jun tman ẍneꞌl tibaj teyle junjun altar.
3 Xi tmaꞌn Balaam te Balac:
—Tencja cytxlaj chojbil, atzun weye chin xeꞌle queꞌyilte ka ma tzaj Kman canul wiꞌje, ex jacutzun txi nmaꞌne teya aju tzul tyecꞌun weye.
—Ma jaw nbinchaꞌne wuk altar ex ma cub npatune jun tal tor ex jun tman ẍneꞌl tibaj teyle junjun altar.
5 Tzajtzun tmaꞌn Kman te Balaam alcye tuꞌn t-xi tmaꞌn ex tma:
—Txiꞌya jatum taꞌ Balac ex kꞌmanxa te aju cxel nmaꞌne teya.
Tnejel yol tma Balaam
6 Ul meltzꞌaj Balaam jatum taꞌtok Balac, ex lu Balac waꞌltok cytxlaj ke chojbil, cyucꞌix cycyakil nejenel cye aj Moab. 7 Xitzun tmaꞌn Balaam aju yol lu:
Max cywi witz tuj tjawitz kꞌij ex max tuj Aram ma chin tzaj tiꞌn Balac aju rey cye aj Moab. Chitzun weye: Tzaja, kaninxa mya baꞌn cyibaj aj Israel. Tzaj naja tuꞌn t-xi tkanina tuꞌn cynaj ke xjal tiyjil Jacob.
8 Pero ¿tzaꞌn tten tuꞌn t-xi nkanine mya baꞌn cyibaj keju mintiꞌ in tzaj tkꞌoꞌn Dios mya baꞌn cyibaj? ¿Tzaꞌn tten tuꞌn t-xi nkanine tuꞌn cynaj keju mintiꞌ ma tzaj tmaꞌn Dios tuꞌn cynaj?
9 Max twi pic lu ma che wile, max cywiꞌ ke tzꞌlaꞌj witz lu ma che wile: Jun tnam xjal paꞌmaj, junxitl tmod ic tzaꞌn txkantl xjal.
10 Ic cyajlal ic tzaꞌn tkukil txꞌotxꞌ; ¿alcye jun jacu bant tajlante tcyajin part cybet? Nokwit baꞌn ncyime ic tzaꞌn ke xjal tzꞌaklxix, ex icwit bajsbil weye ic tzaꞌn cye aj Israel, chi Balaam baj tmaꞌn.
11 Xitzun tmaꞌn Balac te Balaam:
—¿Ti ma tbinchaya wiꞌje? Ma tzaj wiꞌne tuꞌn t-xi tkanina mya baꞌn cyibaj wajkꞌoje, atzun teya ma tzꞌoc tena cyꞌiwlalte cye.
12 Atzunte Balaam xi ttzakꞌweꞌn:
—¿Myapetzun biꞌx xi nmaꞌne teya ka oꞌcx tuꞌn t-xi nmaꞌne aju ctzajel tmaꞌn Kman weye?
13 Xi tmaꞌn juntl maj Balac:
—Koꞌ wucꞌile tuj juntl lugar jatum oꞌcx ttxaꞌn tnam ctilaꞌya, ex mya tcyakil tnam ctilaꞌya. Kaninxa mya baꞌn cyibaj max ma chixin.
14 Xitzun kꞌiꞌn Balaam tuꞌn Balac tuj chkꞌajlaj Zofim tuj tiwitz txꞌotxꞌ twi witz Pisga; atzun jaw tbinchaꞌn wuktl altar, ex cub tpatun jun tal tor ex jun tman ẍneꞌl tibaj teyle junjun altar. 15 Xi tmaꞌn Balaam te Balac:
—Tencja cytxlaj chojbil, atzun weye ma chinxe canul tiꞌj Dios ma chixin.
16 Etztzun Kman canul tiꞌj Balaam ex tzaj tmaꞌn te alcye yol tuꞌn t-xi tmaꞌn, ex chi cyjaꞌ:
—Txiꞌya jatum taꞌ Balac ex kꞌmanxa te aju cxel nmaꞌne teya.
17 Ul meltzꞌaj Balaam jatum taꞌtok Balac waꞌltok cytxlaj ke chojbil, cyucꞌix ke nejenel cye aj Moab. Xi tkanin Balac te Balaam:
—¿Alcye ma tma Kman teya?
Tcabin yol tma Balaam
18 Xitzun tmaꞌn Balaam cyjaꞌ:
Aya Balac tcyꞌajal Zipor, weꞌcuya ex chin tbintza.
19 Ate Dios mya ic tten ic tzaꞌn jun xjal; mintiꞌ nnicꞌan yol ex misicyer in baj tchꞌexpuꞌn t-ximbetz. Ka ma tma jun tiꞌxti tuꞌn tbant tuꞌn, in bant tuꞌn. Ka ma tzaj ttziyan jun yol, in japun tuꞌn.
20 Kꞌmaꞌmaj weye tuꞌn cycub ncyꞌiwlaꞌne aj Israel. Ma che cub tcyꞌiwlaꞌn Dios ex mlay bant tuꞌn tbaj nchꞌexpuꞌne.
21 Mintiꞌ jun sbubl o ilwaj tiꞌj tiyjil Jacob ex mi jun mya baꞌn o ilwaj cyiꞌj aj Israel. Ate Cyman aju Cydios at cyucꞌil, ex toc cyuꞌn te cyrey.
22 Ate Dios etz kꞌinte cye tuj Ejipt; at nim cyipun ic tzaꞌn wacẍ te tjakꞌ cꞌul.
23 Ka ma che oc cyꞌaꞌn tiyjil Jacob mlay che cꞌixbisanjtz; ka ma che oc cyꞌaꞌn aj Israel cyuꞌn chman mlay che naj cyuꞌn. Jaꞌlo cxel kꞌmet cyiꞌj aj Israel cyjaꞌ: Cyqueꞌyinxe nicꞌpun ma tbincha Dios cyiꞌj.
24 Aju tnam lu ic tten ic tzaꞌn jun balun in jaw weꞌ, mi jun jacu xcyeꞌ tiꞌj, mlay tzꞌojlan ka naꞌnxtok tbaj tcanb ex ka naꞌnxtok tbaj tchcꞌel ju otok tzyet tuꞌn, chi Balaam.
25 Xitzun tmaꞌn Balac te Balaam:
—Yaque mintiꞌx in tzaj tkanina mya baꞌn tibaj tnam lu, ax icx miꞌn cub tcyꞌiwlaꞌna.
26 Xitzun ttzakꞌweꞌn Balaam:
—¿Baka mintiꞌ xi nmaꞌne teya ka oꞌcx aju ctzajel tmaꞌn Kman weye atzunju cbantel wuꞌne?
27 Xitzun tmaꞌn Balac te Balaam:
—Binchama xtalbil koꞌ wucꞌile tuj juntl lugar, kapelo baꞌn jacu tzꞌela tuj twitz Dios tuꞌn t-xi tkanina mya baꞌn cyibaj aj Israel max ma chixin.
28 Cyjaꞌtzun tten xi ucꞌin Balaam tuꞌn Balac twi witz Peor, jatum kꞌanchaꞌlin tzkij txꞌotxꞌ. 29 Xi tmaꞌn Balaam te Balac:
—Binchan jawa wuk altar tzalu ex byoncuya wuk tal tor ex wuk tman ẍneꞌl.
30 Banttzun tuꞌn Balac ic tzaꞌnx otok tma Balaam te, ex cub tpatun jun tal tor ex jun tman ẍneꞌl tibaj teyle junjun altar.