Toxin yol tma Balaam
24
Tej otok tzꞌel tnicꞌ Balaam tiꞌj ka baꞌn otok tzꞌela tuj twitz Kman tuꞌn cycub cyꞌiwlet aj Israel, ya mintiꞌ oc ten kꞌijal ic tzaꞌn otok tbincha junjun maj, nok oꞌcx cyjaꞌ xi tqueꞌyin tumlal tzkij txꞌotxꞌ. 2 Tej ttil Balaam ke aj Israel tuj cꞌlojintok cyten ic tzaꞌnx cyiyjil, ul T-xew Dios tucꞌil, 3 ex xi tmaꞌn Balaam ke yol lu:Atzun tkanil jlu tuꞌn Balaam aju tcyꞌajal Beor, aju xinak nneꞌl tnicꞌ tiꞌj tcyakil,
4 aju in tbiꞌn tkanil in tzaj tmaꞌn Dios te, in cub tzꞌak twitz txꞌotxꞌ ex in til aju in tzaj tyecꞌun Dios te, aju at tipumal tuꞌn tbant tcyakil tuꞌn, ex nneꞌl tnicꞌ tiꞌj.
5 Akeye tiyjil Jacob, tbanilxix che queꞌyin ke cyjaye, xbalun ja; tbanilxix che queꞌyin cynajbile, akeye aj Israel.
6 Ic che queꞌyin ic tzaꞌn ke chkꞌajlaj matij, ic tzaꞌn cykan awal ttzi nima, ic tzaꞌn cykan áloes awaꞌn tuꞌn Kman, ex ka ic tzaꞌn cykan wiꞌten ttzi aꞌ.
7 Ctel nim aꞌ te cycꞌa aj Israel ex te aꞌlbil cyawal, mas nim tipumal cyrey ctel ic tzaꞌn te Agag, ex cꞌoquel tcawbil te maꞌxix.
8 Ate Dios etz kꞌinte cye tuj Ejipt; at nim cyipun ic tzaꞌn wacẍ te tjakꞌ cꞌul. Che najel ke nasyon cyuꞌn akeju in che kꞌojin cyiꞌj. Che najel aj kꞌoj cyuꞌn aj Israel, cbajel cytokin cybakil ex che bajel cycꞌixbisaꞌn tuꞌn plech.
9 Ic cyten aj Israel ic tzaꞌn jun balun ex ic tzaꞌn jun ttxu balun oc tcub tan, mi aꞌl jun baꞌn tjaw cꞌasunte te. Akeye aj Israel, cyꞌiwlaꞌnxwit aju cbel cyꞌiwlante cyeye, ex tzajxwit mya baꞌn cyibaj keju in che kanin mya baꞌn cyibaje, chi Balaam.
10 Tejtzun tbinte Balac jlu, tzaj nim tkꞌoj tiꞌj Balaam, oc ten tzꞌajil tkꞌab tuꞌn tkꞌoj ex tma:
—Ma tzaj ntxcoꞌna tuꞌn t-xi tkanina mya baꞌn cyibaj wajkꞌoje, atzun jaꞌlo ma bant-xi ox maj ma che cub tcyꞌiwlaꞌna. 11 Taja tjaya; nej otok txi ntziyane teya tuꞌn t-xi nkꞌoꞌne nimbil teya, pero mintiꞌ ma takꞌ Dios ambil tuꞌn t-xi nkꞌoꞌne nimbil teya, chi Balac.
12 Atzunte Balaam xi ttzakꞌweꞌn:
—Biꞌx xi nmaꞌne cye t-sanjela akeju e pon t-samaꞌna wucꞌile, nchiye cyjaꞌ: 13 masque tzaj tkꞌoꞌn Balac tcyakil kꞌan pwak ex sak pwak at tuj tja, mlay bant tuꞌn wicꞌe tibaj yol ctzajel tmaꞌn Kman weye, misicyer tuꞌn nbinchanteye jun baꞌn ex ka mya baꞌn wuꞌnx wibe; nok oꞌcx tuꞌn t-xi nmaꞌne aju tzul tmaꞌn Kman weye. 14 Weye chin ajele tuj ntanmiye, pero naꞌnxtok waje, cxel nmaꞌne teya aju cbantel cyuꞌn tnam xjal lu cyiꞌj ke ttanmila tuj tkꞌijlalil tzul.
Tcyajin yol tma Balaam
15 Octzun ten Balaam kꞌmalte ju yol tzaj kꞌmaꞌn te tuꞌn Dios, chi cyjaꞌ:
Atzun tkanil jlu tuꞌn Balaam aju tcyꞌajal Beor, aju xinak nneꞌl tnicꞌ tiꞌj tcyakil,
16 aju in tbiꞌn tkanil in tzaj tmaꞌn Dios te, ex ojtzkiꞌn tuꞌn aju baꞌn tuꞌn Dios maꞌ t-xilen; in cub tzꞌak twitz txꞌotxꞌ ex in til aju in tzaj tyecꞌun Dios te, aju Tajaw Tcyakil, ex nneꞌl tnicꞌ tiꞌj.
17 Nneꞌl chꞌin nnicꞌe tiꞌj aju cbajel tuj tkꞌijlalil tzul, at jun in xi nqueꞌyine, pero najchak taꞌ.
At jun cheꞌw cjawil jlet cyxol tiyjil Jacob, jun rey cjawil jlet cyxol aj Israel. Cbel tpachꞌuꞌn cywiꞌ aj Moab ex che najel cycyakil tiyjil Set tuꞌn.
18 Cbel tiꞌj Edom tuꞌn, ex cꞌelel cytxꞌotxꞌ aj Seir tuꞌn, aju aj kꞌoj tiꞌj. Atzun tnam Israel cꞌoquel nimxix tipun.
19 Cjawil jlet jun nejenel cyxol tiyjil Jacob ex che najel tuꞌn akeju otok che cyaj ten tuj tnam, chi Balaam.
20 Ex o til Balaam aju tnam Amalec, ex xi tmaꞌn aju yol tzaj kꞌmaꞌn te tuꞌn Dios, chi cyjaꞌ:
Ate Amalec jun tnam mas maꞌ toclen cywitz cycyakil mastl tnam, pero aju bajsbil te, cbel xitj te jumajx.
21 Ax icx o til ke aj Ceney, ex xi tmaꞌn aju yol tzaj kꞌmaꞌn te tuꞌn Dios, chi cyjaꞌ:
Akeye aj Ceney, masque cyuwxix tten cyjaye, masque tocx cyjaye tuj pic,
22 pero il tiꞌj che bajel xitj, ex che xel kꞌiꞌne pres cyuꞌn aj Asiria.
23 Ax icx xi tmaꞌn juntl yol tzaj kꞌmaꞌn te tuꞌn Dios:
Ay ¿alcye jun cyjel ankꞌin oc tbant jlu tuꞌn Dios?
24 Che tzajel ke barc ttzi mar te Chipre, ex cbajel xitj cytanmi aj Asiria ex cytanmi aj Heber cyuꞌn, pero ax icx cye che najel te jumajx, chi Balaam.
25 Tbajlenxi jlu, cubtzun be tuꞌn Balaam ex aj tja. Ax icx te Balac xi tiꞌn tbe.