E cꞌulun aj Israel twitz tilbilal Baal-peor
25
Tej cyten aj Israel tuj lugar Sitim, e oc ten ke xinak yaẍil cyucꞌil ke xuꞌj aj Moab, 2 atzun ke xuꞌj lu e jeꞌx txconte cye tuꞌn cyxiꞌ cyucꞌil oc t-xi cykꞌoꞌn chojbil cye cydios. Atzun cye aj Israel ajun ke e waꞌn tiꞌj ju wabj lu, ex e oc ten cꞌulul cywitz cydios aj Moab; 3 cyjaꞌtzun tten e oc ten aj Israel cꞌulul twitz tilbilal Baal-peor. Tzaj nimxix ttxꞌuꞌjil Kman cyiꞌj aj Israel, 4 ex xi tmaꞌn te Moisés cyjaꞌ:—Chmon oca cycyakil nejenel cye tnam xjal, ex che tyoban jawa ke cywitz cycyakil xjal, tuꞌntzun tchewix nkꞌoje cyiꞌj aj Israel, chi Kman.
5 Xitzun tmaꞌn Moisés cye keju cyoc te jwes cyxol aj Israel:
—Teyle junjun cyeye baꞌn tuꞌn tcub cybyoꞌne ke xinak ax cyiyjile, akeju ma che oc lpeꞌ tuꞌn cycꞌulun twitz tilbilal Baal-peor.
6 At jun aj Israel pon tiꞌn jun xuꞌj aj Madián max tja, ex twitz Moisés ex cywitz cycyakil aj Israel tbincha jlu, tej matok in che okꞌ aj Israel ttzi ja xbalun te mojbabl tibil. 7 Atzunte Finees aju tcyꞌajal Eleazar ex tal tchman pal Aarón, tej ttil jlu jaw weꞌ cyxol aj Israel, xi tiꞌn jun lans, 8 ex xi lpeꞌ tiꞌj xinak aj Israel tejxi tpon max tuj tja. Atzun xi t-xayuꞌn lans tuj cycꞌuꞌj, tzaꞌnx te xinak aj Israel, ax icx te xuꞌj aj Madián. Cyjaꞌtzun tten o weꞌ txꞌuꞌj yabil, aju in che naj aj Israel tuꞌn, 9 pero otok che cyimxe 24,000 aj Israel.
10 Tzajtzun yolin Kman tucꞌil Moisés ex tma:
11 —Tuꞌn Finees ma chewix nkꞌoje cyiꞌj aj Israel, porque icx te tmod ic tzaꞌn weye, mintiꞌ in cub tuj twitz tuꞌn cycꞌulun aj Israel twitz junxitl dios. Tuꞌntzun jlu ma weꞌ nkꞌoje cyiꞌj aj Israel. 12 Cyjaꞌtzun kꞌmanxa te Finees: Cyjel bant tiꞌj jun nyole te tzalajbil tucꞌil. 13 Te jumajx cxel nkꞌoꞌne te ex cye tiyjil aju oclenj te pal, porque ma tzaj taꞌw tuj tanmi tuꞌn tlaj mya baꞌn in cybinchaꞌn xjal nwitze; ex tuꞌnju baꞌn ma tbincha, ma cub nnajsaꞌne cyil aj Israel, chi Kman.
14 Zimri tbi aju xinak aj Israel xi xayuꞌn lans tuj tcꞌuꞌj junx tucꞌil xuꞌj aj Madián; tcyꞌajal Salu jlu ex atok toc te nejenel cye jun cꞌloj tiyjil Simeón. 15 Atzunju xuꞌj aj Madián Cozbi tbi ex tmeꞌjel Zur, aju nejenel cye jun cꞌloj cyiyjil aj Madián.
16 Tzaj yolin Kman tucꞌil Moisés ex tma:
17 —Cyoc tzokpaje cyiꞌj aj Madián ex cybyon cube ke, 18 tuꞌnju o cyajbe tuꞌn tcub cyiꞌje cyuꞌn tuꞌn sbubl, ex o cybincha tuꞌn cycꞌulune twitz tilbilal Baal-peor, ic tzaꞌn o tbincha Cozbi aju tmeꞌjel jun nejenel cye aj Madián, aju cyim tuꞌn lans tej ttzaj nsamaꞌne txꞌuꞌj yabil cyibaj aj Israel tuꞌn tlaj e cꞌulun twitz tilbilal Baal-peor, chi Kman.