2 Cyiꞌn jawe cyajlal cycyakil aj Israel ic tzaꞌnx cyajlal junjun cꞌloj; ctzajelx keꞌ cyuꞌne cyiꞌj keju ma japun winkin abkꞌi cyuꞌn ex ma bant tuꞌn cyxiꞌ tuj kꞌoj.

3 Tujtzun tchkꞌajlajil txꞌotxꞌ Moab aju tcub ttzi nima Jordán, tumlal twitz Jericó, xi tmaꞌn Moisés ex ju pal Eleazar cye aj Israel 4 tuꞌn tjaw cyiꞌn cyajlal ke xinak otok japun winkin abkꞌi cyuꞌn, ic tzaꞌnx otok tzaj tmaꞌn Kman te Moisés.

Atzun ke aj Israel e jeꞌtz tuj Ejipt jlu:

5 Ke cꞌloj tiyjil Rubén aju nej tcyꞌajal Israel, atzun ke jlu: ke tiyjil Enoc, ke tiyjil Falú, 6 ke tiyjil Hezrón ex ke tiyjil Carmi; 7 tzaꞌnx tajlal jaw, japun 43,730 xinak tiyjil Rubén. 8 Aju tcyꞌajal Falú, atzun Eliab, 9 ex ke tcyꞌajal Eliab atzun ke jlu: Nemuel, Datán ex Abiram. Ate Datán tucꞌix Abiram akeju attok cyoclen cyxol ke xjal kꞌol nabl, jaw cyiꞌn cyib tiꞌj Kman ex tiꞌj Moisés ex Aarón junx tucꞌil Coré; 10 pero el cꞌabchaj txꞌotxꞌ ex e jeꞌx tzꞌak cycabil tuj, tucꞌix Coré xi tzꞌak tej cybaj cyim keju mojl cyyol cyucꞌil, ex tej cybaj cyim 250 xinak tuꞌn kꞌakꞌ. Ajben jlu te jun yecꞌbil cye mastl. 11 Masque icju pero mintiꞌ e cyim tcꞌwaꞌl Coré.

12 Ke cꞌloj tiyjil Simeón, atzun ke jlu: Ke tiyjil Nemuel, ke tiyjil Jamín, ke tiyjil Jaquín, 13 ke tiyjil Zera ex ke tiyjil Saúl. 14 Tzaꞌnx tajlal jaw, japun 22,200 xinak tiyjil Simeón.

15 Ke cꞌloj tiyjil Gad, atzun ke jlu: Ke tiyjil Zefón, ke tiyjil Hagui, ke tiyjil Suni, 16 ke tiyjil Ozni, ke tiyjil Eri, 17 ke tiyjil Arod ex ke tiyjil Areli. 18 Tzaꞌnx tajlal jaw, japun 40,500 xinak tiyjil Gad.

19 Ke tcyꞌajal Judá e cyim tuj txꞌotxꞌ Canaán, atzun ke jlu, Er tucꞌix Onán. 20 Ke cꞌloj tiyjil Judá, atzun ke jlu: Ke tiyjil Sela, ke tiyjil Fares ex ke tiyjil Zera. 21 Ke cꞌloj tiyjil Fares, atzun ke jlu: Ke tiyjil Hezrón ex ke tiyjil Hamul. 22 Tzaꞌnx tajlal jaw, japun 76,500 xinak tiyjil Judá.

23 Ke cꞌloj tiyjil Isacar, atzun ke jlu: Ke tiyjil Tola, ke tiyjil Púa 24 ke tiyjil Jasub ex ke tiyjil Simrón. 25 Tzaꞌnx tajlal jaw, japun 64,300 xinak tiyjil Isacar.

26 Ke cꞌloj tiyjil Zabulón, atzun ke jlu: Ke tiyjil Sered, ke tiyjil Elón ex ke tiyjil Jahleel. 27 Tzaꞌnx tajlal jaw, japun 60,500 xinak tiyjil Zabulón.

28 Ke cꞌloj tiyjil José, atzun ke jlu: Manasés ex Efraín. 29 Tiꞌj Manasés, jun cꞌloj tiyjil Maquir; tiꞌj Maquir, jun cꞌloj tiyjil Galaad. 30 Ke cꞌloj cyiyjil Galaad, atzun ke tiyjil Jezer, ke tiyjil Helec, 31 Ke tiyjil Asriel, ke tiyjil Siquem, 32 ke tiyjil Semida ex ke tiyjil Hefer. 33 Ate Zelofehad aju tcyꞌajal Hefer mintiꞌ tcyꞌajal e tzaj, nok oꞌcx tmeꞌjel, ex atzun cybi lu: Maala, Noa, Hogla, Milca ex Tirsa. 34 Tzaꞌnx tajlal jaw, japun 52,700 xinak tiyjil Manasés. 35 Ke cꞌloj tiyjil Efraín, atzun ke jlu: Ke tiyjil Sutela, ke tiyjil Bequer ex ke tiyjil Tahán. 36 Tiꞌj Sutela at jun cꞌloj tiyjil Erán. 37 Tzaꞌnx tajlal jaw, japun 32,500 xinak tiyjil Efraín. Atzun ke tiyjil José jlu, tuj cꞌlojin cyten ic tzaꞌnx cyiyjil.

38 Ke cꞌloj tiyjil Benjamín, atzun ke jlu: Ke tiyjil Bela, ke tiyjil Asbel, ke tiyjil Ahiram, 39 ke tiyjil Sufam, ex ke tiyjil Hufam. 40 Ke cꞌloj tiyjil Bela, atzun ke jlu: Ke tiyjil Ard, ex ke tiyjil Naamán. 41 Tzaꞌnx tajlal jaw, japun 45,600 xinak tiyjil Benjamín.

42 Tiꞌj Dan jun cꞌloj tiyjil Súham. 43 Tzaꞌnx tajlal jaw, japun 64,400 xinak tiyjil Dan.

44 Ke cꞌloj tiyjil Aser, atzun ke jlu: Ke tiyjil Imna, ke tiyjil Isúi ex ke tiyjil Bería. 45 Ke cꞌloj tiyjil Bería, atzun ke jlu: Ke tiyjil Heber ex ke tiyjil Malquiel. 46 Ex attok jun tmeꞌjel Aser, Sera tbi. 47 Tzaꞌnx tajlal jaw, japun 53,400 xinak tiyjil Aser.

48 Ke cꞌloj tiyjil Neftalí, atzun ke jlu: Ke tiyjil Jahzeel, ke tiyjil Guni, 49 ke tiyjil Jezer ex ke tiyjil Silem. 50 Tzaꞌnx tajlal jaw, japun 45,400 xinak tiyjil Neftalí.

51 Aju cyajlal aj Israel jaw, japun 601,730 xinak tuꞌn tcyakilx.

52 Tzaj yolin Kman tucꞌil Moisés ex tma:

53 Cyxoltzun ke xinak lu, cbel sipet txꞌotxꞌ ic tzaꞌnx cyajlal ma jaw. 54 Te cye ke cꞌloj mas nim cybaj, cxel kꞌot jun piẍ cytxꞌotxꞌ mas matij, atzun cye ke cꞌloj nicꞌxi cybaj, cxel kꞌot jun piẍ cytxꞌotxꞌ mas nicꞌxi chꞌin. Teyle junjun cꞌloj cxel kꞌot jun piẍ cytxꞌotxꞌ ic tzaꞌn cyajlal ma jaw. 55 Tuj swert cbajel sipet txꞌotxꞌ. Teyle junjun cꞌloj cyiyjil tzꞌiban tuj list cxel tetzbil. 56 Cbajel sipet cyetzbil oc tjaw swert cyxol keju cꞌloj nim cybaj ax icx keju mya nim cybaj, chi Kman.

57 Ke cꞌloj tiyjil Leví e oc te tajlal tej tjaw cyajlal, atzun ke jlu: Ke tiyjil Gersón, ke tiyjil Coat ex ke tiyjil Merari. 58 At txkantl cꞌloj tiyjil Leví, atzun ke jlu: Ke tiyjil Libni, ke tiyjil Hebrón, ke tiyjil Mahli, ke tiyjil Musi ex ke tiyjil Coré.

Ate Coat tman Amram. 59 Jaw mojeꞌ Amram tucꞌil Jocabed aju tmeꞌjel Leví, ex atzun itzꞌj Jocabed tej tten Leví tuj Ejipt. Ate Amram cyman Aarón, Moisés ex María, ex Jocabed tbi cytxuꞌ. 60 Ke tcyꞌajal Aarón, atzun ke jlu: Nadab, Abiú, Eleazar ex Itamar. 61 Pero otok cyim Nadab ex Abiú tuꞌnju cub cykꞌoꞌn jun kꞌakꞌ twitz Kman, aju mintiꞌ otok txi kꞌmaꞌn cye tuꞌn tcub cykꞌoꞌn.

62 Aju cyajlal ke xinak tiyjil Leví tzaj keꞌ cyiꞌj keju matok jun xjaw cyul-len itzꞌj, japun 23,000 tuꞌn tcyakilx. Ake jlu mintiꞌ otok che oc te tajlal cyucꞌil mastl aj Israel, porque mintiꞌ jun cyetzbil tuꞌn t-xi kꞌoꞌn.

63 Atzun jun tajlal lu jaw cyiꞌj aj Israel tuꞌn Moisés ex tuꞌn pal Eleazar tuj tchkꞌajlajil txꞌotxꞌ Moab, tcub ttzi nima Jordán tumlal twitz tnam Jericó. 64 Cyxol cycyakil jlu mi jun itzꞌxtok cyxol keju cuꞌx tzꞌiban cybi tej tjaw tnejel maj cyajlal cyuꞌn Moisés ex Aarón tuj tzkij txꞌotxꞌ t-xe witz Sinaí, 65 porque otok tma Kman tuꞌn cycyim tuj tzkij txꞌotxꞌ. Cyjaꞌtzun misicyer jun cye cyaj ankꞌin, nok oꞌcx te Caleb aju tcyꞌajal Jefone, tucꞌix Josué aju tcyꞌajal Nun.