2 Atzunte Kman tzaj tmaꞌn weye cyjaꞌ: Miꞌn xoba twitz, porque ma txi nkꞌoꞌne tuj tkꞌaba cyucꞌix ke t-soldad ex tcyakil ttxꞌotxꞌ. Binchama tiꞌj ic tzaꞌnx o tbinchaya tiꞌj Sehón aju rey cye aj Amorrey, aju najltok tuj tnam Hesbón, chi.

3 Cyjaꞌtzun tzaj tkꞌoꞌn Kman Dios aju rey Og tuj kkꞌab, ex cycyakil ke t-soldad. Cub kbyoꞌn cycyakil ex mi jun cyaj ankꞌin kuꞌn. 4 Ax icx e tzyet cycyakil tnam kuꞌn; mi jun o tzokpaj. Tzyet 60 tnam kuꞌn tuj tcyakil txꞌotxꞌ Argob, akeju ateꞌtok tjakꞌ tcawbil Og tuj txꞌotxꞌ Basán. 5 Cycyakil tnam lu maꞌ twaꞌl muro toc cyiꞌj; at cylamel ex toc cꞌuxbil tzyulte cye; mintiꞌ e oc te tajlal ke tnam mintiꞌ muro cyiꞌj. 6 Cycyakil ke jlu biꞌx e naj kuꞌn, ic tzaꞌnx otok kbincha tiꞌj Sehón aju rey te tnam Hesbón, ex cub kbyoꞌn ke xinak, ke xuꞌj ex ke cꞌwaꞌl; 7 oꞌcx ke alumaj ex cycyakil tiꞌxti wiꞌyilxix at cye aj kꞌoj kiꞌj, e cyaj kcloꞌn tuꞌn tajben te ke.

8 Cyjaꞌtzun, tuj tkꞌijlalil lu o joꞌc te cyajwil ke txꞌotxꞌ tzyuꞌntok cyuꞌn cabe rey aj Amorrey, akeju najltok tuj tumlal tjawitz kꞌij te nima Jordán, tzajnix keꞌ ttzi tkꞌab xak Arnón ex ponin baj max twi witz Hermón. 9 (Aju witz lu, Sirión tbi cyuꞌn aj Sidón, ex Senir tbi cyuꞌn aj Amorrey.) 10 E tzyet kuꞌn cycyakil tnam cycubsaꞌn tuj chkꞌajlaj tuj tiwitz txꞌotxꞌ, tucꞌix tcyakil txꞌotxꞌ Galaad ex Basán, aju ponin baj max cyuj tnam Salca ex Edrei, akeju ateꞌtok tjakꞌ tcawbil Og tuj Basán. 11 (Oꞌcx te rey Og otok cyaj ankꞌin cyxol cyiyjil xjal maꞌ cywaꞌl. Aju twatbil puro cꞌuxbil te cyaje var tnukbil ex var tucꞌ mey twitz. Ax taꞌ watbil jaꞌlo tuj tnam Rabá tuj cytxꞌotxꞌ aj Amón.)

12 Tejtzun ttzyet txꞌotxꞌ lu kuꞌn, xi nkꞌoꞌne cye tiyjil Rubén ex cye tiyjil Gad aju txꞌotxꞌ xiꞌynix tuj tnam Aroer, aju tcub ttzi tkꞌab xak Arnón ex ponin baj max tuj tmijil txꞌotxꞌ Galaad, cyucꞌix cycyakil tnam ateꞌ tuj. 13 Atzun juntl piẍ txꞌotxꞌ Galaad, ex tcyakil txꞌotxꞌ Basán aju tcyajsaꞌntok tjakꞌ tcawbil rey Og, tucꞌix tcyakil txꞌotxꞌ Argob aju toctok tbi cytxꞌotxꞌ aj Refait, xi nkꞌoꞌne cye mij tiyjil Manasés. 14 (Ate Jair tiyjil Manasés oc te tajwil txꞌotxꞌ Argob, aju ponin baj max tuj tmojonil txꞌotxꞌ Gesur ex Maaca, ex tex tbi oc tkꞌoꞌn tiꞌj txꞌotxꞌ Basán, atzun jlu: Havot-jair, ex axtzun tbi tocsaꞌn jaꞌlo.) 15 Aju txꞌotxꞌ Galaad xi nkꞌoꞌne te Maquir; 16 atzun cye tiyjil Rubén ex cye tiyjil Gad xi nkꞌoꞌne aju txꞌotxꞌ tcubsaꞌn t-xol Galaad tucꞌil tkꞌab xak Arnón, ex atzun nneꞌx tmojonil tuj tmijil tkꞌab xak, ex ponin baj max ttzi tkꞌab xak Jaboc, aju tmojonil cytxꞌotxꞌ aj Amón. 17 Atzun ponin tmojonil cytxꞌotxꞌ ttzi nima Jordán, tzajnix keꞌ ttzi lagun Cineret ex ponin baj max ttzi mar at tuj chkꞌajlaj Arabá, ex nnicꞌ ttziꞌyile mar t-xeꞌyile witz Pisga tuj tumlal tjawitz kꞌij.

18 Xitzun nmaꞌne cyeye cyjaꞌ: Ate Kman Dios ctzajel kꞌonte txꞌotxꞌ lu cyeye tuꞌn toc te cyetzbile. Cycyakil keju o bant cykꞌojin, cyiꞌnx cymacbil in che ajben tuj kꞌoj, ex e cycub nej cywitz ke cyerman ax aj Israel; 19 oꞌcx ke xuꞌj cyucꞌix ke cꞌwaꞌl ex ke wacẍ che cyjel ten cyuj ke tnam o txi nkꞌoꞌne cyeye, porque baꞌn wuꞌne nimxix cywacẍe at. 20 Ocxi ttzaj tkꞌoꞌn Kman cye cyermaniye jun lugar jatum tuꞌn cyojlan, ic tzaꞌn o tzaj tkꞌoꞌn cyeye, icxtzun cye tuꞌn cyetzan tiꞌj txꞌotxꞌ aju ctzajel tkꞌoꞌn Kman cye jlajxi nima Jordán, maxitzun cꞌajel meltzꞌaj teyle junjun cyeye tuj cyetzbile o txi nkꞌoꞌne.

21 Ax icx xi nmaꞌne te Josué cyjaꞌ: O tila tcyakilju o tbincha Kman Dios cyiꞌj cabe rey; icxtzun cbantel tuꞌn Kman cyiꞌj cycyakil ke cawbil ateꞌ jatum cꞌicꞌel beta. 22 Miꞌn xoba cywitz, porque ate Kman Dios ctel cyucꞌile tuj kꞌoj.

23 Tujx tkꞌijlalil lu in cubsane twitz Kman ex xi nmaꞌne te cyjaꞌ: 24 Nman, tuꞌna tzaj xeꞌt tuꞌn ttzaj tyecꞌuna tajwalila ex tipumala weye, akine tmajena. Mintiꞌ juntl Dios at tuj cyaꞌj mi twitz txꞌotxꞌ jacu bant tuꞌn ic tzaꞌn ke teya takꞌunben ex ke techal maꞌxix cyxilen in che bant tuꞌna. 25 In chin cubsane twitza tuꞌn ttzaj tkꞌoꞌna ambil weye tuꞌn wicꞌxe jlajxi nima Jordán, porque wajbile tuꞌn twile aju tbanil txꞌotxꞌ at ma chixin, ex aju tiwitz txꞌotxꞌ tbanilxix, ax icx aju witz Líbano, nchiye te. 26 Pero otok jaw kꞌojl Kman wiꞌje nok tuꞌn cyeye cylaj, ex mintiꞌ tzaj tbiꞌn nyole, oꞌcx tzaj tmaꞌn weye cyjaꞌ: Miꞌn cucx tyolina. Miꞌn tzaj tmaꞌna mastl tyola weye tiꞌj jlu. 27 Tjaxa twi witz Pisga ex queꞌyinxa txꞌotxꞌ te jawni, te cubni, te elni ex te ocni, pero tuꞌn ticꞌxa tuj nima Jordán, miꞌn txi nkꞌoꞌne ambil teya. 28 Oꞌcx kꞌmanxa te Josué alcye tuꞌn tbant tuꞌn, cyuwsanxa tcꞌuꞌj ex kꞌonxa tipun, porque ate Josué cbel nej cywitz ke xjal, ex tuꞌn ctzyetel txꞌotxꞌ aju cxel tqueꞌyina, tuꞌn toc te cyetzbil.

29 Axtzun o ko cyaj ten tuj chkꞌajlaj tcubsaꞌn tumlal twitz lugar Bet-peor.