3 —Akeju txꞌotxꞌ Atarot, Dibón, Jazer, Nimra, Hesbón, Eleale, Sebam, Nebo ex Beón, 4 akeju ma cub cyiꞌj tuꞌn Kman tuꞌn cyoc te cye aj Israel, baꞌn ke txꞌotxꞌ lu te cywabl alumaj. Ic tzaꞌn keye, akoꞌye ajbel teya, at kalune. 5 Ka baꞌn tuj twitza, kꞌontza txꞌotxꞌ lu te keye, ex miꞌn ko icꞌx tiꞌna jlajxi nima Jordán.

6 Atzunte Moisés xi ttzakꞌweꞌn:

—¿Maj cyajtzun cyeye tuꞌn cycyaj tene tzalu ex atzun cye mastl cyermaniye che xeꞌl tuj kꞌoj? 7 ¿Tikuꞌn cyajbile tuꞌn ttzaj baj cycꞌuꞌj aj Israel tuꞌn miꞌn cyicꞌx tuj txꞌotxꞌ o tzaj tkꞌoꞌn Kman cye? 8 Axtzun jlu cybincha cymane tej cytzaj nsamaꞌne queꞌyilte txꞌotxꞌ max tuj Cades-barnea. 9 E pon max ttzi tkꞌab xak Escol ex baj cyqueꞌyin txꞌotxꞌ, ex te tibajxi e oc ten xobtzal cycꞌuꞌj aj Israel tuꞌntzun miꞌn cyocx tuj txꞌotxꞌ otok tzaj tkꞌoꞌn Kman cye. 10 Cyjaꞌtzun tzaj tkꞌoj Kman cyiꞌj tuꞌn jlu ex tzaj tmaꞌn jun yol axix toc cyjaꞌ: 11 Cycyakil xinak otok japun winkin abkꞌi cyuꞌn tej cyetz tuj Ejipt, mlay cyil aju txꞌotxꞌ xi ntziyane te Abraham, te Isaac ex te Jacob, porque mintiꞌ e oc lpeꞌ wiꞌje tuꞌn tcyakil cyanmi. 12 Oꞌcx te Caleb aju tcyꞌajal Jefone aju aj Cenesey, tucꞌix Josué aju tcyꞌajal Nun, e oc lpeꞌ tiꞌj Kman tuꞌn tcyakil cyanmi. 13 Cyjaꞌtzun tzaj tkꞌoj Kman cyiꞌj aj Israel ex tbincha nok tuꞌn cybetjeꞌ 40 abkꞌi tuj lugar tzkij txꞌotxꞌ, tejxi cybaj cyim cycyakil keju otok cybincha mya baꞌn twitz. 14 Atzun jaꞌlo akeye cycyꞌajal ke mambaj aj il ke, akeye ma che cyaj tene te t-xel cymane cyajbile tuꞌn ttzaj juntl maj tkꞌoj Kman cyiꞌj aj Israel. 15 Katzun miꞌn cyajbile tuꞌn cyoc lpeꞌye tiꞌj Kman, che cyjel coline juntl maj tuꞌn tuj tzkij txꞌotxꞌ, ex akeye at cyile cyiꞌj oc cynaj, chi Moisés xi tmaꞌn.

16 E pon lakꞌeꞌtl twitz Moisés ex xi cymaꞌn te:

—Aju keye kajbil, tuꞌn tjaw kbinchaꞌne cypeꞌn kẍneꞌle ex cypeꞌn kwacẍe ex ke tnam te cye kxuꞌjile ex kcꞌwaꞌle. 17 Te tibajxi jlu ko xeꞌle tucꞌil kmacbile in che ajben tuj kꞌoj, tuꞌn kcub neje cywitz mastl aj Israel, max ocxi cyocx kkꞌoꞌne tuj cytxꞌotxꞌ. Atzun ke kxuꞌjile ex kcꞌwaꞌle che cyjel ten cyuj ke tnam tocsaꞌn muro cyiꞌj, ex jacu che clet cywitz keju najl tuj txꞌotxꞌ lu. 18 Mlay ko ajtz meltzꞌaje kjaye ka naꞌnxtok cycꞌmonte cycyakil aj Israel cytxꞌotxꞌ. 19 Porque aju txꞌotxꞌ cꞌoquel te keye, atzun aju taꞌ jlajtzi tumlal tjawitz kꞌij te nima Jordán, ex mlay txi kkanintle mastl txꞌotxꞌ taj jlajxi nima, che chi.

20 Xitzun ttzakꞌweꞌn Moisés:

—Ka ax toc ma japun cyyole, ex ka ma txi cyiꞌne cymacbile tuꞌn cyxiꞌye tuj kꞌoj ic tzaꞌnx tajbil Kman, 21 ex ka cycyakile che icꞌxe tuj nima Jordán banin cytene tuꞌn cykꞌojine ic tzaꞌnx tajbil Kman, ex ax tuꞌn cycyaj tene ma chixin ocxi cyex tlajoꞌn Kman ke aj kꞌoje cyiꞌje, 22 ocxi tcambet txꞌotxꞌ tuꞌn Kman, baꞌn tuꞌn cyajtz meltzꞌaje, ex tzokpiꞌntltzun keye tiꞌj ju ma cymaye twitz Kman ex cywitz aj Israel; ex aju txꞌotxꞌ lu cꞌoquel te cyeye nok tuꞌn Kman. 23 Katzun miꞌn ma cybinchaye icju, tuꞌn jlu che binchale il twitz Kman, ex axix toc cpol jun kꞌij ctzajel cycastiwoye tiꞌj il lu. 24 Cybinchan jawe tnam tuꞌn cycyaj ten cyxuꞌjile ex cycꞌwaꞌle cyuj, ex cybinchan jawe cypeꞌn cyẍneꞌle, pero japunx cyuꞌne aju ma txi cytziyane, chi Moisés.

25 Atzun cye tiyjil Gad ex tiyjil Rubén xi cytzakꞌweꞌn:

—Cbantel kuꞌne aju ma tmaya keye, akoꞌye ajbel teya. 26 Ke kxuꞌjile ex ke kcꞌwaꞌle, cyucꞌix kwacẍe ex cycyakil kalune, ax che cyjel ten tzalu cyuj ke tnam te Galaad, 27 atzun keye, akoꞌye ajbel teya, cbantel ktene tuꞌn kxiꞌye tuj kꞌoj ic tzaꞌnx tajbil Kman, ex ic tzaꞌnx ma tzaj tmaꞌna keye, che chi te Moisés.

28 Atzunte Moisés cyaj tmaꞌn te pal Eleazar, te Josué aju tcyꞌajal Nun, ex cye ke nejenel cye cycyakil cꞌloj cyiyjil aj Israel, alcye tuꞌn cybinchante cyiꞌj tiyjil Gad ex cyiꞌj tiyjil Rubén, 29 ex tma cyjaꞌ:

—Ka cycyakil xinak tiyjil Gad ex tiyjil Rubén che icꞌx cyucꞌile tuj nima Jordán, banin cyten tuꞌn cykꞌojin ic tzaꞌnx tajbil Kman, ocxi ttzyet txꞌotxꞌ cyuꞌne, baꞌntzun tuꞌn t-xi cykꞌoꞌne txꞌotxꞌ Galaad tuꞌn toc te cyetzbil. 30 Katzun miꞌn ma che icꞌx banin cyten tuꞌn cykꞌojin, axtzun cꞌelel cytxꞌotxꞌ tiꞌj cyeye tuj txꞌotxꞌ Canaán, chi Moisés.

31 Atzun cye tiyjil Gad ex tiyjil Rubén xi cytzakꞌweꞌn:

—Cbantel kuꞌne aju ma tma Kman keye, akoꞌye ajbel teya. 32 Ko icꞌxe banin ktene tuꞌn kkꞌojine tuj txꞌotxꞌ Canaán ic tzaꞌnx tajbil Kman, pero aju txꞌotxꞌ tcubsaꞌn tuj tjawitz kꞌij te nima Jordán cꞌoquel te ketzbile, che chi.

33 Cyjaꞌtzun tten xi tkꞌoꞌn Moisés aju ttxꞌotxꞌ Sehón, aju otok ten te rey cye aj Amorrey, te cye tiyjil Gad ex cye tiyjil Rubén, tucꞌix cye mij tiyjil Manasés aju tcyꞌajal José. Ax icx xi tkꞌoꞌn ttxꞌotxꞌ Og cye, aju otok ten te rey cye aj Basán, cyucꞌix ke tnam ateꞌtok cyuj ex ke cojbil ateꞌtok cyiꞌjele. 34 Jawtzun cybinchaꞌn juntl maj tiyjil Gad ke tnam lu: Dibón, Atarot, Aroer, 35 Atarot-sofán, Jazer, Jogbeha, 36 Bet-nimra ex Bet-arán, ex oc cykꞌoꞌn muro cyiꞌjele; ax icx baj cybinchaꞌn cypeꞌn cyẍneꞌl. 37 Atzun ke tiyjil Rubén jaw cybinchaꞌn juntl maj ke tnam Hesbón, Eleale, Quiriataim, 38 Nebo ex Baal-meón; baj cychꞌexpuꞌn cybi tnam lu ex oc cykꞌoꞌn cybi acꞌaj; ax icx jaw cybinchaꞌn juntl maj tnam Sibma.

39 Ke tiyjil Maquir aju tcyꞌajal Manasés, e jeꞌx tuj txꞌotxꞌ Galaad, tzyet cyuꞌn ex e jeꞌx cylajoꞌn ke aj Amorrey ateꞌtok tuj. 40 Xitzun tkꞌoꞌn Moisés txꞌotxꞌ Galaad cye ke tiyjil Maquir aju tcyꞌajal Manasés, ex axtzun e cub ten najal tuj. 41 Ax icx te Jair aju tiyjil Manasés, tzyet elaꞌ aldey cye aj Amorrey tuꞌn, ex oc tkꞌoꞌn cybi Havot-jair. 42 Atzunte Noba, tzyet tnam Kenat tuꞌn cyucꞌix ke aldey ateꞌ tiꞌjele, ex oc tkꞌoꞌn tbi tnam lu Noba ic tzaꞌnx te tbi.