2 Kꞌon aja t-xel cyiꞌj aj Madián tiꞌj ju ma cybincha cyiꞌj aj Israel, ex te tibajxi jlu cymela.

3 Xitzun tmaꞌn Moisés cye tnam xjal cyjaꞌ:

Cyiꞌntz cymacbile junjun cyeye, akeju in che ajben tuj kꞌoj, cyxiꞌye ex e cyoc tzokpaje cyiꞌj aj Madián, tuꞌntzun t-xelin cyiꞌj tuꞌn Kman. 4 Teyle junjun cꞌloj cyiyjil aj Israel baꞌn tuꞌn t-xi t-samaꞌn jun mil xinak tuj kꞌoj, chi Moisés.

5 Cyjaꞌtzun e jaw scꞌet jun mil soldad cyxol teyle junjun cꞌloj cyiyjil aj Israel; japun cablaj mil cybet, ex kꞌiꞌmlex cymacbil tuꞌn cyxiꞌ tuj kꞌoj. 6 E jeꞌxtzun samaꞌn tuꞌn Moisés tuꞌn cyxiꞌ tuj kꞌoj junx tucꞌil Finees aju tcyꞌajal pal Eleazar, ex atzun te xi kꞌinte ke macbil xjan, cyucꞌix ke chun, tuꞌntzun cyoc kꞌajtzet oc ttzyet kꞌoj. 7 E octzun ten kꞌojlel cyiꞌj aj Madián ic tzaꞌn otok tma Kman te Moisés, ex e cub cybyoꞌn cycyakil xinak aj Madián. 8 Ax icx cub cybyoꞌn aj Israel jweꞌ rey cye aj Madián, ex atzun ke jlu: Evi, Requem, Zur, Hur ex Reba. Ax icx cub byoꞌn Balaam cyuꞌn, aju tcyꞌajal Beor. 9 E tzajtzun kꞌiꞌn ke xuꞌj aj Madián cyuꞌn aj Israel, cyucꞌix ke tal cꞌwaꞌl, ex ke cyẍneꞌl, ke cywacẍ ex tcyakil cykꞌinumabl. 10 Ax icx cub cypatun cycyakil cytanmi aj Madián ex cycyakil aldey. 11 Ex tcyakilju otok tzꞌel cyiꞌn, tzaꞌnx ke xjal ex ke alumaj, 12 xi cyiꞌn tucꞌil Moisés, tucꞌil pal Eleazar ex cyucꞌil tnam xjal aj Israel, tuj campament tuj tchkꞌajlajil txꞌotxꞌ Moab ttzi nima Jordán, tumlal twitz tnam Jericó.

13 Atzunte Moisés tucꞌix pal Eleazar ex cycyakil nejenel cye tnam xjal, e jeꞌtz canul cyiꞌj tiꞌjxi campament. 14 Pero tzaj tkꞌoj Moisés cyiꞌj ke nejenel cye jun milchak ex jun syentchak soldad otok cheꞌx aj tuj kꞌoj, 15 ex xi tmaꞌn cye cyjaꞌ:

—¿Tikuꞌn mintiꞌ ma che cub cybyoꞌne ke xuꞌj? 16 Cyuꞌnlpe ke xuꞌj lu jaw cyiꞌn cyib aj Israel tiꞌj Kman ex e cꞌulun twitz tilbilal Baal-peor, nok tuꞌn tconsej Balaam. Cyjaꞌtzun tzaj t-samaꞌn Kman txꞌuꞌj yabil tibaj tnam etzan tuꞌn. 17 Jaꞌlo cybyon cube cycyakil tal kꞌa ex cycyakil xuꞌj o cyilxi xinak. 18 Atzun ke txin naꞌnx cylonte xinak, baꞌn tuꞌn cycyaj ankꞌin ex tuꞌn cycyaj ten cyucꞌile. 19 Ex cycyakil keju ma che cub byonte jun xjal ex ka ma tzꞌoc tmacoꞌn t-ximlal jun cyimni, il tiꞌj tuꞌn cycyaj ten wuk kꞌij tiꞌjxi campament. Tuj toxin kꞌij ex tuj twukin, cysaksan baj cyibe, tzaꞌnxix akeye ax icx keju ma che tzaj cyiꞌne pres. 20 Ax icx cysaksan baje cycyakil xbalun, cycyakil macbil tzꞌuꞌm, cycyakil xbalun ttzmal chip ex ke macbil tzeꞌ, chi Moisés cye.

21 Atzunte pal Eleazar xi tmaꞌn cye cycyakil soldad otok cheꞌx aj tuj kꞌoj:

—Atzun ley lu tzaj tmaꞌn Kman te Moisés: 22 Ke macbil kꞌan pwak, sak pwak, kꞌan cꞌuxbil, cꞌuxbil, cꞌuxbil estaño ex plom, 23 cycyakil keju mlay che naj tuꞌn kꞌakꞌ, il tiꞌj tuꞌn cysakset tuꞌn kꞌakꞌ, ex te tibajxi tuꞌn cybaj txꞌjet tuꞌn aꞌ te saksabl; atzun keju in che naj tuꞌn kꞌakꞌ, baꞌn tuꞌn cysakset oꞌcx tuꞌn aꞌ. 24 Tujtzun twukin kꞌij il tiꞌj tuꞌn tbaj cytxꞌjoꞌne cyxbalune, ex che sakseteltzune. Te tibajxi, baꞌntzun tuꞌn cyocxe tuj campament.

25 Tzaj tmaꞌn Kman te Moisés:

26 Aya tucꞌix pal Eleazar ex ke nejenel cye junjun cꞌloj cyiyjil aj Israel, cyajlan cube jteꞌ xjal ex jteꞌ alumaj ma tzꞌel cyiꞌn soldad tuj kꞌoj; 27 te cabe tzꞌel tuꞌna, ex sipanxa mij cye soldad ma cheꞌx aj tuj kꞌoj, ex atzun mijtl sipanxa cyxol tnam xjal mintiꞌ ma cheꞌx aj tuj kꞌoj. 28 Tiꞌj mij cbel t-sipana cyxol soldad, kꞌiꞌn ela chꞌin weye, tzaꞌnx cyiꞌj xjal ax icx cyiꞌj wacẍ, bur ex ẍneꞌl. Jun cꞌelel tiꞌna tiꞌj jweꞌ syentchak, 29 ex cxel tkꞌoꞌna te pal Eleazar ic tzaꞌn jun oyaj te weye. 30 Ax icx cyiꞌj mijtl cbel t-sipana cyxol mastl aj Israel, tzaꞌnx cyiꞌj xjal ax icx cyiꞌj wacẍ, bur ex ẍneꞌl, ex ka cyiꞌj cycyakil alumaj, kꞌiꞌn ela chꞌin cyiꞌj, jun cyiꞌj sincwentchak, ex cxel tkꞌoꞌna cye aj Leví, akeju in che cwentin tiꞌj njaye, chi Kman.

31 Atzunte Moisés ex Eleazar o cybincha ic tzaꞌnx otok tma Kman te Moisés. 32 Tcyakilju otok tzꞌel kꞌiꞌn cye aj kꞌoj ex mintiꞌ e oc te tajlal aju cye soldad otok baj cyuꞌn, japun tajlal te 675,000 ẍneꞌl, 33 ex 72,000 wacẍ, 34 ex 61,000 bur, 35 ex 32,000 kꞌapoj naꞌnxtok tcyil xinak. 36 Aju mij xi kꞌoꞌn cye soldad, japun jun tajlal te 337,500 ẍneꞌl, 37 ex aju xi kꞌot te Kman, japun jun tajlal te 675 ẍneꞌl, 38 ex tiꞌj 36,000 wacẍ, xi kꞌot 72 te Kman, 39 ex tiꞌj 30,500 bur, xi kꞌot 61 te Kman, 40 ex tiꞌj 16,000 kꞌapoj, xi kꞌot 32 te Kman. 41 Aju xi kꞌot te Kman, xi tkꞌoꞌn Moisés te pal Eleazar ic tzaꞌnx otok tma Kman te Moisés.

42 Atzun mijtl el tpaꞌn Moisés tiꞌj ju xi tkꞌoꞌn cye soldad otok cheꞌx aj tuj kꞌoj, xi tkꞌoꞌn cye mastl aj Israel, 43 ex ax tajlal o japun cyjaꞌ: 337,500 ẍneꞌl, 44 ex 36,000 wacẍ, 45 ex 30,500 bur, 46 ex 16,000 kꞌapoj naꞌnxtok tcyil xinak. 47 Tiꞌjtzun mij lu el tiꞌn Moisés jun tiꞌj sincwentchak, tzaꞌnx cyiꞌj xjal ax icx ke alumaj, ex xi tkꞌoꞌn cye aj Leví, akeju in che ajbentok tuj tja Kman, ic tzaꞌnx otok tma Kman te.

48 Atzun cye nejenel cye jun milchak ex jun syentchak soldad e pon tucꞌil Moisés, 49 ex xi cymaꞌn te: Ma jaw jun tajlal kuꞌne, akoꞌye ajbel teya, cyiꞌj ke soldad e ten tuj kcwente, ex mintiꞌ jun atx taj. 50 Cyjaꞌtzun ma tzaj kiꞌne ke tiꞌxti kꞌan pwak ma che cnet kuꞌne: Lu ke tkul kꞌabaj, ke caden in che cub ten tkul kꞌabaj, ke xmulkꞌabaj, ke tuj ẍcyinbaj, ex txkantl adorn, ma tzaj kiꞌne te oyaj te Kman, tuꞌntzun tcub tnajsaꞌn kpaltile, che chi ke nejenel cye soldad.

51 Atzunte Moisés tucꞌix pal Eleazar xi cycꞌmoꞌn tcyakil tiꞌxti kꞌan pwak lu toc tilbilal cyiꞌj. 52 Aju kꞌan pwak xi kꞌoꞌn te oyaj te Kman cyuꞌn ke nejenel cye jun milchak ex jun syentchak soldad, mas te cyaje quintal el talil. 53 Teyle junjun soldad otok tzaj tiꞌn chꞌin tiꞌxti cyiꞌj aj kꞌoj tuꞌn tajben te cye. 54 Xitzun cycꞌmoꞌn Moisés ex pal Eleazar aju kꞌan pwak pon cyiꞌn ke nejenel cye soldad, ex xi cyiꞌn tuj ja xbalun te mojbabl tibil tuꞌntzun cytzaj naꞌn aj Israel tuꞌn Kman.