3 Ka at jun kꞌapoj ax taꞌ tuj tja tman ma tzaj ttziyan jun tyol weye, ka tuꞌn tbant jun tiꞌxti tuꞌn ex ka tuꞌn miꞌn tbant jun tiꞌxti tuꞌn, 4 ka ma tbi tman aju yol otok tzaj ttziyan weye ex ka juntl tiꞌxti otok txi ttziyan, ex ka mintiꞌ ma kꞌajt tman tuꞌn tlaj jlu, iltzun tiꞌj tuꞌn tjapun tuꞌn kꞌapoj aju yol otok tzaj ttziyan weye, ex ka juntl tiꞌxti otok txi ttziyan. 5 Katzun mintiꞌ ma txi kꞌoꞌn ambil te tuꞌn tman tuꞌn tjapun tuꞌn aju otok txi ttziyan, myatzun il tiꞌj tuꞌn tjapun tuꞌn aju yol otok tzaj ttziyan weye, ex ka juntl tiꞌxti otok txi ttziyan. Mlaytzun tzꞌoc nkꞌoꞌne il tiꞌj tuꞌn tjapun tuꞌn, tuꞌnju mintiꞌ otok txi kꞌoꞌn ambil te tuꞌn tman.

6 Ka at jun xuꞌj ma mojeꞌ tucꞌil tchmil ex naꞌnxtok tjapun tuꞌn aju yol otok tzaj ttziyan weye, ex ka juntl tiꞌxti otok txi ttziyan, 7 ka ma tbi tchmil aju yol tziyimaj tuꞌn ex ka mintiꞌ ma kꞌajt tuꞌn tlaj jlu, iltzun tiꞌj tuꞌn tjapun tuꞌn xuꞌj aju yol otok tzaj ttziyan weye, ex ka nok alcyexcu yol otok txi ttziyan. 8 Katzun mintiꞌ ma txi kꞌoꞌn ambil te tuꞌn tchmil tuꞌn tjapun tuꞌn aju yol otok txi ttziyan, myatzun il tiꞌj tuꞌn tjapun tuꞌn aju yol otok tzaj ttziyan weye, ex ka nok alcyexcu yol otok txi ttziyan. Ex mlaytzun tzꞌoc nkꞌoꞌne il tiꞌj tuꞌn tjapun tuꞌn.

9 Katzun otok cyim tchmil xuꞌj, ex ka nok otok cub tpaꞌn tib tucꞌil tchmil, aju ctzajel ttziyan jun yol weye, il tiꞌj tuꞌn tjapun tuꞌn tcyakilju otok tzaj ttziyan.

10 Katzun mejebni xuꞌj ctzajel tziyante jun yol tuꞌn tbant jun tiꞌxti tuꞌn, 11 katzun ma tbi tchmil ex mintiꞌ ma kꞌajt tuꞌn tlaj jlu, iltzun tiꞌj tuꞌn tjapun tuꞌn xuꞌj aju yol otok tzaj ttziyan weye, ex ka nok alcyexcu yol otok txi ttziyan. 12 Katzun ma tbi tchmil ex ka mintiꞌ ma tzaj tkꞌoꞌn ambil te tuꞌn tjapun tuꞌn aju yol otok txi ttziyan, myatzun il tiꞌj tuꞌn tjapun tuꞌn xuꞌj, tuꞌnju otok cub tkꞌuchin tchmil aju yol tziyimaj tuꞌn. Mlay tzꞌoc nkꞌoꞌne il tiꞌj tuꞌn tjapun tuꞌn.

13 Jacu txi tcyuwsaꞌn chmilbaj ex jacu cub tkꞌuchin nok alcyex jun yol otok txi ttziyan t-xuꞌjil tuꞌn tjapun tuꞌn ex ka tuꞌn miꞌn tjapun tuꞌn. 14 Katzun ma tbi chmilbaj ex mintiꞌ ma kꞌajt tuꞌn tlaj jlu tbajlenxi jun kꞌij ex ka cabe, che cyuwsetel ke yol otok cheꞌx ttziyan t-xuꞌjil, tuꞌnju mintiꞌ otok kꞌajt tchmil. 15 Katzun ma cub tkꞌuchin chmilbaj ex otok tzꞌel kꞌij tbintlen, atzunte chmilbaj at til tiꞌj ju mintiꞌ otok japun tuꞌn t-xuꞌjil.

16 Atzun ke ley lu tzaj tmaꞌn Kman te Moisés tuꞌn tajben te xinak tucꞌil t-xuꞌjil, ex tuꞌn tajben te mambaj tucꞌil tmeꞌjel oc matok kꞌapojx ex ka axtok taꞌ tja tman.