Números 29

Aju ninkꞌij tuꞌn cykꞌajt chun

Tuj tnejel kꞌij te twukin xjaw cꞌoquel jun buyj tibil xjan cyuꞌne. Mi jun baꞌn tuꞌn takꞌnan tuj kꞌij lu. Atzun kꞌij tuꞌn cyoc kꞌajtzet ke chun. 2 Tujx kꞌij lu cbel cypatune jun tal tor, jun tman ẍneꞌl ex wuk tal tman ẍneꞌl ma te jun abkꞌi ke, te jun oyaj at tcꞌocꞌjal in chin tzalaje tiꞌj, ex cycyakil ke jlu mintiꞌ cypaltil. 3 Cyiꞌj ke chojbil lu ctzajel cykꞌoꞌne arin xyokꞌimaj tucꞌil aseyt: Tiꞌj tal tor kak libr, tiꞌj tman ẍneꞌl cyaje libr, 4 ex tiꞌj junjun tal tman ẍneꞌl cabe libr. 5 Ax icx ctzajel cykꞌoꞌne jun tman chip te chojbil cyile, 6 ex part ke oyaj in che cub patit teyle junjun xjaw, ex part ke chojbil in che cub patit tcyakil kꞌij, tucꞌix oyaj tiꞌj twitz awal ex taꞌl twitz uva in xi kꞌot cyiꞌj ic tzaꞌnx in tmaꞌn ley. Tcyakil jlu jun oyaj te weye patun in cub at tcꞌocꞌjal in chin tzalaje tiꞌj.

Ke oyaj tuꞌn cyxi kꞌot tuj kꞌij oc tnajset cyil xjal

Levítico 23.26-32

7 Tuj laj tajlal tex twukin xjaw ax icx cꞌoquel jun buyj tibil xjan cyuꞌne. Tuj kꞌij lu cbel cyyoꞌne weꞌyaj, ex mi jun baꞌn tuꞌn takꞌnan. 8 Cbel cypatune jun tal tor, jun tman ẍneꞌl, ex wuk tal tman ẍneꞌl ma te jun abkꞌi ke, te jun oyaj at tcꞌocꞌjal in chin tzalaje tiꞌj, ex cycyakil ke jlu mintiꞌ cypaltil. 9 Cyiꞌj ke chojbil lu ctzajel cykꞌoꞌne arin xyokꞌimaj tucꞌil aseyt: Tiꞌj tal tor kak libr, tiꞌj tman ẍneꞌl cyaje libr, 10 ex tiꞌj junjun tal tman ẍneꞌl cabe libr. 11 Ax icx ctzajel cykꞌoꞌne jun tman chip te chojbil cyile, ex part ke chojbil ctzajel cykꞌoꞌne tuꞌn tnajset cyile tuj kꞌij te najsbil il, ex part ke chojbil patun in che cub tcyakil kꞌij tucꞌix oyaj tiꞌj twitz awal ex taꞌl twitz uva in xi kꞌot cyiꞌj.

Ke oyaj tuꞌn cyxi kꞌot tuj ninkꞌij oc cyjaw binchet tal ja t-xak tzeꞌyin cywiꞌ

Levítico 23.33-44

12 Tuj olaj tajlal twukin xjaw cꞌoquel jun buyj tibil xjan cyuꞌne. Mi jun baꞌn tuꞌn takꞌnan tuj kꞌij lu. Wuk kꞌij cbel cyicꞌsaꞌne ninkꞌij te nimbil weye. 13 Tuj tnejel kꞌij ctzajel cykꞌoꞌne weye oxlaj tal tor, cabe tman ẍneꞌl, ex cyajlaj tal tman ẍneꞌl ma te jun abkꞌi ke, te chojbil patun in cub at tcꞌocꞌjal in chin tzalaje tiꞌj. Cycyakil ke jlu mintiꞌ cypaltil. 14 Cyiꞌj ke chojbil lu ctzajel cykꞌoꞌne arin xyokꞌimaj tucꞌil aseyt: Tiꞌj junjun tal tor kak libr, tiꞌj junjun tman ẍneꞌl cyaje libr, 15 ex tiꞌj junjun tal tman ẍneꞌl cabe libr. 16 Ax icx ctzajel cykꞌoꞌne jun tman chip te chojbil cyile, ex part ke chojbil patun in che cub tcyakil kꞌij tucꞌix oyaj tiꞌj twitz awal ex taꞌl twitz uva in xi kꞌot cyiꞌj.

17 Tuj tcabin kꞌij ctzajel cykꞌoꞌne cablaj tal tor, cabe tman ẍneꞌl, ex cyajlaj tal tman ẍneꞌl ma te jun abkꞌi ke, ex cycyakil ke jlu mintiꞌ cypaltil. 18 Ax icx ctzajel cykꞌoꞌne ke oyaj tiꞌj twitz awal ex taꞌl twitz uva cyiꞌj, ic tzaꞌnx cyajlal tal tor, ke tman ẍneꞌl, ex ke tal tman ẍneꞌl, ic tzaꞌnx in tmaꞌn ley. 19 Ax icx ctzajel cykꞌoꞌne jun tman chip te chojbil cyile, ex part ke chojbil patun in che cub tcyakil kꞌij tucꞌix oyaj tiꞌj twitz awal ex taꞌl twitz uva in xi kꞌot cyiꞌj.

20 Tuj toxin kꞌij ctzajel cykꞌone junlaj tal tor, cabe tman ẍneꞌl, ex cyajlaj tal tman ẍneꞌl ma te jun abkꞌi ke, ex cycyakil ke jlu mintiꞌ cypaltil. 21 Ax icx ctzajel cykꞌoꞌne ke oyaj tiꞌj twitz awal ex taꞌl twitz uva cyiꞌj, ic tzaꞌnx cyajlal tal tor, ke tman ẍneꞌl, ex ke tal tman ẍneꞌl, ic tzaꞌnx in tmaꞌn ley. 22 Ax icx ctzajel cykꞌoꞌne jun tman chip te chojbil cyile, ex part ke chojbil patun in che cub tcyakil kꞌij tucꞌix oyaj tiꞌj twitz awal ex taꞌl twitz uva in xi kꞌot cyiꞌj.

23 Tuj tcyajin kꞌij ctzajel cykꞌoꞌne laj tal tor, cabe tman ẍneꞌl, ex cyajlaj tal tman ẍneꞌl ma te jun abkꞌi ke, ex cycyakil ke jlu mintiꞌ cypaltil. 24 Ax icx ctzajel cykꞌoꞌne ke oyaj twitz awal ex taꞌl twitz uva cyiꞌj, ic tzaꞌnx cyajlal tal tor, ke tman ẍneꞌl, ex ke tal tman ẍneꞌl, ic tzaꞌn in tmaꞌn ley. 25 Ax icx ctzajel cykꞌoꞌne jun tman chip te chojbil cyile, ex part ke chojbil patun in che cub tcyakil kꞌij tucꞌix oyaj tiꞌj twitz awal ex taꞌl twitz uva in xi kꞌot cyiꞌj.

26 Tuj tjweꞌyin kꞌij ctzajel cykꞌoꞌne belaj tal tor, cabe tman ẍneꞌl, ex cyajlaj tal tman ẍneꞌl ma te jun abkꞌi ke, ex cycyakil ke jlu mintiꞌ cypaltil. 27 Ax icx ctzajel cykꞌoꞌne ke oyaj tiꞌj twitz awal ex taꞌl twitz uva cyiꞌj, ic tzaꞌnx cyajlal tal tor, ke tman ẍneꞌl, ex ke tal tman ẍneꞌl, ic tzaꞌnx in tmaꞌn ley. 28 Ax icx ctzajel cykꞌoꞌne jun tman chip te chojbil cyile, ex part ke chojbil patun in che cub tcyakil kꞌij tucꞌix oyaj tiꞌj twitz awal ex taꞌl twitz uva in xi kꞌot cyiꞌj.

29 Tuj tkakin kꞌij ctzajel cykꞌoꞌne wajxak tal tor, cabe tman ẍneꞌl, ex cyajlaj tal tman ẍneꞌl ma te jun abkꞌi ke, ex cycyakil ke jlu mintiꞌ cypaltil. 30 Ax icx ctzajel cykꞌoꞌne ke oyaj tiꞌj twitz awal ex taꞌl twitz uva cyiꞌj, ic tzaꞌnx cyajlal tal tor, ke tman ẍneꞌl, ex ke tal tman ẍneꞌl, ic tzaꞌnx in tmaꞌn ley. 31 Ax icx ctzajel cykꞌoꞌne jun tman chip te chojbil cyile, ex part ke chojbil patun in che cub tcyakil kꞌij tucꞌix oyaj tiꞌj twitz awal ex taꞌl twitz uva in xi kꞌot cyiꞌj.

32 Tuj twukin kꞌij ctzajel cykꞌoꞌne wuk tal tor, cabe tman ẍneꞌl, ex cyajlaj tal tman ẍneꞌl ma te jun abkꞌi ke, ex cycyakil ke jlu mintiꞌ cypaltil. 33 Ax icx ctzajel cykꞌoꞌne ke oyaj tiꞌj twitz awal ex taꞌl twitz uva cyiꞌj, ic tzaꞌnx cyajlal tal tor, ke tman ẍneꞌl, ex ke tal tman ẍneꞌl, ic tzaꞌnx in tmaꞌn ley. 34 Ax icx ctzajel cykꞌoꞌne jun tman chip te chojbil cyile, ex part ke chojbil patun in che cub tcyakil kꞌij tucꞌix oyaj tiꞌj twitz awal ex taꞌl twitz uva in xi kꞌot cyiꞌj.

35 Tuj twajxakin kꞌij cꞌoquel jun buyj tibil xjan cyuꞌne. Mi jun baꞌn takꞌnan tuj kꞌij lu. 36 Ctzajel cykꞌoꞌne weye jun tal tor, jun tman ẍneꞌl, ex wuk tal tman ẍneꞌl ma te jun abkꞌi ke, te jun chojbil patun in cub at tcꞌocꞌjal in chin tzalaje tiꞌj, ex cycyakil ke jlu mintiꞌ cypaltil. 37 Ax icx ctzajel cykꞌoꞌne ke oyaj tiꞌj twitz awal ex taꞌl twitz uva cyiꞌj, ic tzaꞌnx cyajlal tal tor, ke tman ẍneꞌl, ex ke tal tman ẍneꞌl, ic tzaꞌnx in tmaꞌn ley. 38 Ax icx ctzajel cykꞌoꞌne jun tman chip te chojbil cyile, ex part ke chojbil patun in che cub tcyakil kꞌij tucꞌix oyaj tiꞌj twitz awal ex taꞌl twitz uva in xi kꞌot cyiꞌj.

39 Atzun ke chojbil lu ctzajel cykꞌoꞌne weye cyuj ke ninkꞌij banimaj cyiꞌj, ex part cyoyaje ctzajel cykꞌoꞌne oc tjapun jun cyyole otok tzaj cytziyane weye, ex ke cyoyaje tuꞌn cyexe cygan ctzajel cykꞌoꞌne; ka jun chojbil patun in cub, ka jun oyaj tiꞌj twitz awal, ka jun oyaj tiꞌj taꞌl twitz uva, ex ka jun oyaj te mojbabl tibil, chi Kman te Moisés.

40 Atzunte Moisés xi tmaꞌn cye aj Israel tcyakil aju otok tma Kman te.