2 Kꞌmanxa cye aj Israel tuꞌn miꞌn t-xi cycolin tuꞌn ttzaj cykꞌoꞌn cyoyaj weye, akeju patun in che cub cyuj ke ninkꞌij banimaj tiꞌj, te jun oyaj at tcꞌocꞌjal in chin tzalaje tiꞌj.

3 Ax icx kꞌmanxa cye: Akeju oyaj tuꞌn tcub cypatun te weye, atzun ke jlu: Tcyakil kꞌij cbel cypatun cabe tal tman ẍneꞌl te jun abkꞌi ke ex mintiꞌ cypaltil; 4 jun cbel patit te prim ex juntl te kale, 5 tucꞌix cabe libr arin tbanilxix xyokꞌimaj tucꞌil jun litr aseyt nneꞌl tiꞌj twitz olivo. 6 Atzunju chojbil lu tuꞌn tcub patit tcyakil kꞌij, ic tzaꞌn xi nmaꞌne cye t-xe witz Sinaí, te jun oyaj at tcꞌocꞌjal in chin tzalaje tiꞌj, 7 tucꞌix jun litr oyaj vin, tuꞌn t-xi cykꞌoꞌn tiꞌj junjun tal ẍneꞌl. Cbel ket vin lu nwitze twitz njaye. 8 Aju tcabin tal tman ẍneꞌl cbel patit te chojbil te kale, tucꞌix oyaj tiꞌj twitz awal ex ju oyaj tiꞌj taꞌl twitz uva, ic tzaꞌnx ju oyaj cxel cykꞌoꞌn te prim. Jun oyaj lu patun in cub at tcꞌocꞌjal in chin tzalaje tiꞌj.

9 Cyuj ke kꞌij te ojlabl ctzajel cykꞌoꞌn cabe tal tman ẍneꞌl te jun abkꞌi ke ex mintiꞌ cypaltil, tucꞌix cyaje libr arin tbanilxix xyokꞌimaj tucꞌil aseyt te jun oyaj tiꞌj twitz awal, tucꞌix oyaj tiꞌj taꞌl twitz uva. 10 Atzun oyaj jlu tuꞌn tcub patit cyuj ke kꞌij te ojlabl, ex part aju oyaj in cub patit tcyakil kꞌij tucꞌix oyaj tiꞌj taꞌl twitz uva.

11 Tuj tnejel kꞌij te teyle junjun xjaw ctzajel cykꞌoꞌn ke chojbil patun in che cub te weye, ex atzun ke jlu: Cabe tal tor, jun tman ẍneꞌl ex wuk tal tman ẍneꞌl ma te jun abkꞌi ke, ex cycyakil ke jlu mintiꞌ cypaltil. 12 Tiꞌj teyle junjun tal tor ctzajel cykꞌoꞌn kak libr arin tbanilxix xyokꞌimaj tucꞌil aseyt, atzun tiꞌj tman ẍneꞌl ctzajel cykꞌoꞌn cyaje libr arin xyokꞌimaj tucꞌil aseyt, 13 ex tiꞌj teyle junjun tal tman ẍneꞌl ctzajel cykꞌoꞌn cabe libr arin xyokꞌimaj tucꞌil aseyt. Atzun jun oyaj jlu patun in cub at tcꞌocꞌjal in chin tzalaje tiꞌj. 14 Tiꞌj teyle junjun tal tor, ctzajel cykꞌoꞌn cabe litr oyaj taꞌl twitz uva, ex jun litr tucꞌ mey tiꞌj tman ẍneꞌl, ex jun litr tiꞌj teyle junjun tal tman ẍneꞌl. Atzun ke chojbil lu patun tuꞌn cycub oc cytzaj queꞌyin xjaw tcyakil maj tuj abkꞌi. 15 Ax icx ctzajel cykꞌoꞌn jun tman chip weye te chojbil cyil oc cytzaj queꞌyin xjaw, ex part ke chojbil patun in che cub tcyakil kꞌij, tucꞌix oyaj taꞌl twitz uva in cheꞌx kꞌot cyiꞌj.

16 Tuj cyajlaj tajlal tnejel xjaw te abkꞌi cbel cyicꞌsaꞌn Xjan Kꞌij te weye, 17 ex tuj olaj tajlal ax xjaw lu cbel cyicꞌsaꞌn jun ninkꞌij. Wuk kꞌij che waꞌl pan mintiꞌ t-samel tuj tuꞌn tjaw mal tcꞌuꞌj. 18 Tuj tnejel kꞌij ninkꞌij lu, cꞌoquel jun buyj tibil xjan cyuꞌn, ex mi jun baꞌn tuꞌn takꞌnan tuj kꞌij lu. 19 Tujx kꞌij lu cbel cypatun te chojbil weye, cabe tal tor, jun tman ẍneꞌl, ex wuk tal tman ẍneꞌl ma te jun abkꞌi ke, ex cycyakil ke jlu mintiꞌ cypaltil. 20 Cyiꞌj ke chojbil lu ctzajel cykꞌoꞌn arin xyokꞌimaj tucꞌil aseyt: Tiꞌj junjun tal tor, kak libr arin, tiꞌj tman ẍneꞌl, cyaje libr 21 ex tiꞌj junjun tal tman ẍneꞌl cabe libr. 22 Ax icx cxel cykꞌoꞌn jun tman chip te chojbil cyil. 23 Atzun jlu cxel cykꞌoꞌn, ex part aju chojbil patun in cub tcyakil prim. 24 Ictzun ctembil cyuꞌn teyle junjun kꞌij tuj wuk kꞌij ninkꞌij lu, te jun oyaj patun in cub at tcꞌocꞌjal in chin tzalaje tiꞌj. A jlu cxel cykꞌoꞌn, ex part aju chojbil cbel patit tcyakil kꞌij junx tucꞌil oyaj taꞌl twitz uva. 25 Ax icx tuj twukin kꞌij te ninkꞌij lu cꞌoquel jun buyj tibil xjan cyuꞌn, ex mi jun baꞌn tuꞌn takꞌnan tuj kꞌij lu.

26 Tuj ninkꞌij cyiꞌj tnejel cywitz awal, oc t-xi cykꞌoꞌn aju tnejel acꞌaj twitz awal weye, ex ka aju ninkꞌij oc tjapun baj wuk seman tbajlenxi Xjan Kꞌij, ax icx cꞌoquel jun buyj tibil xjan cyuꞌn, ex mi jun baꞌn tuꞌn takꞌnan tuj kꞌij lu. 27 Cbel cypatun cabe tal tor, jun tman ẍneꞌl ex wuk tal tman ẍneꞌl ma te jun abkꞌi ke, te chojbil weye at tcꞌocꞌjal in chin tzalaje tiꞌj. 28 Cyiꞌj ke chojbil lu ctzajel cykꞌoꞌn arin xyokꞌimaj tucꞌil aseyt: Tiꞌj junjun tal tor kak libr arin, ex tiꞌj tman ẍneꞌl cyaje libr, 29 ex cabe libr tiꞌj junjun tal tman ẍneꞌl. 30 Ax icx ctzajel cykꞌoꞌn jun tman chip te chojbil cyil. 31 Cbel cypatun ke chojbil lu, tucꞌix twitz awal ex taꞌl twitz uva in xi kꞌot cyiꞌj, ex part ke chojbil patun in che cub tcyakil kꞌij. Ke alumaj cxel cykꞌoꞌn te chojbil, il tiꞌj mintiꞌ cypaltil.