Éxodo 29

Xjansabl cye pal

Atzun jlu binchama tiꞌj Aarón ex cyiꞌj ke tcyꞌajal tuꞌn cyxjanset tuꞌn cyoc te pal te weye: Kꞌintza jun tal tor ex cabe tman ẍneꞌl mintiꞌ cypaltil, 2 cyucꞌix pan, tucꞌix tal pan xyokꞌin tucꞌil aseyt ex tal pan xaxj suꞌn aseyt tiꞌj, binchamaj ke tiꞌj arin tbanilxix nneꞌl tiꞌj triw ex mintiꞌ t-samel cyuj tuꞌn tjaw mal cycꞌuꞌj. 3 Che belextzun tkꞌoꞌna tuj jun tal chiꞌl, ex che tzajel toyina junx tucꞌil tal tor ex ke cabe tman ẍneꞌl. 4 Cxeltzun tiꞌna Aarón ex ke tcyꞌajal ttzi ja xbalun te mojbabl tibil ex che bajel tchiꞌna tuꞌn aꞌ. 5 Che tzajeltzun tiꞌna ke xbalun otok che bant tuꞌna, ex cꞌoquel tkꞌoꞌna aju ẍjoꞌw tiꞌj Aarón, aju xbalun cꞌoquel tujxi capiẍay, aju capiẍay ex aju tal xbalun cꞌoquel ten ttzi t-xuꞌc. Cꞌoquel tcꞌaloꞌna tcꞌuꞌj tuꞌn cꞌalbil tcꞌuꞌj capiẍay, 6 cꞌoquel tkꞌoꞌna aju tal xbalun te cꞌalbil twiꞌ, ex tiꞌj jlu cꞌoquel tkꞌoꞌna aju tal tzꞌlom xjan. 7 Ctzajeltzun tiꞌna aju aseyt te xjansabl, ex cbel tkoꞌna tibaj twi Aarón tuꞌn t-xjanset tuꞌn toc te pal. 8 Ax icx lakꞌbantza ke tcyꞌajal twitza, ex cꞌoquel tkꞌoꞌna cyẍjoꞌw. 9 Cꞌoquel tcꞌaloꞌna tcꞌuꞌj Aarón ex cycꞌuꞌj ke tcyꞌajal tuꞌnju cꞌalbil cycꞌuꞌj, ex cꞌoquel tkꞌoꞌna ke tal xbalun te cꞌalbil cywiꞌ. Cyjaꞌtzun tten cꞌoquel tkꞌoꞌna toclen Aarón ex cyoclen ke tcyꞌajal tuꞌn cyoc te pal te jumajx.

10 Te tibajxi cxel tiꞌna tal tor max twitz ja xbalun te mojbabl tibil. Atzunte Aarón ex ke tcyꞌajal cbel cykꞌoꞌn cykꞌab tibaj twiꞌ. 11 Cbeltzun tbyoꞌna tal tor lu nwitze ttzi ja xbalun te mojbabl tibil, 12 ctzajel tiꞌna chꞌin tchcꞌel tuꞌn twiꞌ tal tkꞌaba, ex cꞌoquel t-suꞌna cyiꞌj ke tcach altar, atzun mastl chicꞌ cyjel ten, cbelex tkoꞌna t-xe altar. 13 Cꞌelel tiꞌna tcyakil ju sebo toc tiꞌj tuj tcꞌuꞌj ex tiꞌj ttxꞌotxꞌ, cyucꞌix cyiꞌj tchenakꞌ, ex che bel tpatuna tibaj altar. 14 Atzunju tchibjal tucꞌix ttzꞌumal ex ttxaꞌ, che bel tpatuna tiꞌjxi campament, porque atzun chojbil te il jlu.

15 Ax icx ctzajel tiꞌna jun cyxol cabe tman ẍneꞌl, atzunte Aarón ex ke tcyꞌajal cbel cykꞌoꞌn cykꞌab tibaj twiꞌ. 16 Te tibajxi cbel tbyoꞌna alumaj lu, ex cꞌoquel ttxꞌitoꞌna tchcꞌel tiꞌjele tcꞌuꞌj altar. 17 Cbajel tpaẍuꞌna, che bajel ttxꞌjoꞌna ke tuj tcꞌuꞌj ex ke tkan, ex che bel tkꞌoꞌna cyibaj ke piẍ t-ximlal ex tibaj twiꞌ. 18 Cbeltzun tpatuna tcyakil t-ximlal tman ẍneꞌl tibaj altar. Atzun oyaj lu patun in cub ex at tcꞌocꞌjal in chin tzalaje tiꞌj.

19 Ctzajeltzun tiꞌna juntl tman ẍneꞌl. Atzunte Aarón ex ke tcyꞌajal cbel cykꞌoꞌn cykꞌab tibaj twiꞌ. 20 Cbel tbyoꞌna alumaj lu, ctzajel tiꞌna chꞌin tchcꞌel ex cꞌoquel t-suꞌna tiꞌj tjeꞌ t-ẍcyin Aarón tuj tbankꞌab ex tiꞌj tjeꞌ cyẍcyin ke tcyꞌajal, ax icx tiꞌj tman cykꞌab tuj cybankꞌab ex tiꞌj tman cykan tuj cybankꞌab. Cꞌoquel ttxꞌitoꞌna chꞌin chicꞌ tiꞌjele tcꞌuꞌj altar, 21 atzunju chicꞌ cyjel ten tibaj altar junx tucꞌil aseyt te xjansabl, cxel ttxꞌitoꞌna tiꞌj Aarón ex tiꞌj t-xbalun, ax icx cyiꞌj ke tcyꞌajal ex tiꞌj cyxbalun. Cyjaꞌtzun tten cxjansetel Aarón cyucꞌix ke tcyꞌajal ex ke cyxbalun.

22 Ctzajeltzun tiꞌna t-sebyil tman ẍneꞌl lu tucꞌix tjeꞌ ex aju sebo toc tiꞌj tuj tcꞌuꞌj ex tiꞌj ttxꞌotxꞌ, cyucꞌix ke cycabil tchenakꞌ ex aju sebo toc cyiꞌj, tucꞌix tcux tuj tbankꞌab, porque atzun tman ẍneꞌl lu te xjansabl cye pal. 23 Ax icx jun pan matij, jun tal pan xyokꞌin tucꞌil aseyt ex jun tal pan xaxj, cjawitz tiꞌna tuj tal chiꞌl jatum cycuꞌx ke pan mintiꞌ t-samel cyuj tuꞌn tjaw mal cycꞌuꞌj, aju tcubsaꞌn nwitze. 24 Cbel tkꞌoꞌna tcyakil jlu cyuj tkꞌab Aarón ex cyuj cykꞌab ke tcyꞌajal, ex ctzajel cyyucun ic tzaꞌn jun oyaj yucun in jaw nwitze, akine Cymane. 25 Te tibajxi cꞌelel tiꞌna cyuj cykꞌab ex cbel tpatuna tibaj altar, tibaj oyaj patun in cub ex at tcꞌocꞌjal in chin tzalaje tiꞌj. Atzun oyaj lu patun in cub nwitze.

26 Ctzajel tiꞌna t-xuꞌc tman ẍneꞌl otok tzꞌajben te xjansabl te Aarón, ex cjawil tyucuna ic tzaꞌn jun oyaj yucun in jaw nwitze, ex aju chibj lu, aya cxel chyoꞌnte te. 27 Cꞌelel tpaꞌna ttzi t-xuꞌc tiꞌj oyaj yucun in jaw nwitze, ex aju tcux tiꞌj oyaj otok jax yecꞌut nwitze, aju xi yuquet ex aju jaw yecꞌut tiꞌj ẍneꞌl te xjansabl te Aarón ex cye tcyꞌajal. 28 Aju chibj lu cꞌajbel te tchiꞌ Aarón ex te cychiꞌ ke tcyꞌajal. Te jumajx cyjel ten ju ley lu cyxol aj Israel, porque a jlu jun oyaj te weye cyuꞌn cyiꞌj ke chojbil te mojbabl cyib wucꞌile.

29 Aju t-xbalun Aarón xjansamaj cꞌajbel te cye tiyjil oc cyxjanset ex oc cycꞌmonte cyoclen te pal. 30 Wuk kꞌij cꞌoquel ten xbalun lu tiꞌj tcꞌwaꞌl Aarón cyjel ten te t-xel, oc tocx tuj ja xbalun te mojbabl tibil tuꞌn tajben tuj lugar xjan.

31 Te tibajxi ctzajel tiꞌna tman ẍneꞌl te xjansabl, ex cjawix tkꞌoꞌna taꞌl tuj lugar paꞌmaj. 32 Atzunte Aarón ex ke tcyꞌajal cxel cychyoꞌn chibj lu ttzi ja xbalun te mojbabl tibil, ex cxel cywaꞌn aju pan tcuꞌxsaꞌn tuj tal chiꞌl. 33 Cxel cychyoꞌn ex cxel cywaꞌn aju otok txi oyit te chojbil cyil oc cyxjanset ex oc cycꞌmonte cyoclen te pal. Mi jun xjal mya pal cxel chyoꞌnte te, ex mi jun cxel waꞌnte te, porque xjansamaj ke. 34 Katzun atx chibj ex ka pan xjansamaj ma cyaj ten te juntl kꞌij, cbel patit. Mi jun cxel chyoꞌnte te, ex mi jun cxel waꞌnte te, porque xjansamaj ke.

35 Binchama tcyakil jlu tiꞌj Aarón ex cyiꞌj ke tcyꞌajal ic tzaꞌnx tcyakilju o txi nmaꞌne teya. Wuk kꞌij cxel tiꞌn tuꞌn cybaj t-xjansaꞌna. 36 Teyle junjun kꞌij cbel tbyoꞌna jun tal tor te chojbil il. Saksama altar tuꞌn jun chojbil il cbel tkꞌoꞌna tibaj, ex cbel tkoꞌna aseyt tibaj tuꞌntzun t-xjanset. 37 Wuk kꞌij cbel tkꞌoꞌna chojbil il tibaj altar, ex cbajel t-xjansaꞌna. Cꞌoqueltzun altar te xjanxix. Nok alcyexcu ma tzꞌoc tacl tiꞌj, biꞌx cxjansetel.

Ke oyaj tuꞌn cyxi kꞌot teyle junjun kꞌij

Números 28.1-8

38 Teyle junjun kꞌij cucx che bel tkꞌoꞌna tibaj altar cabe tal tman ẍneꞌl te jun abkꞌi ke te jun oyaj te Kman. 39 Jun tal tman ẍneꞌl cbel tkꞌoꞌna te prim, ex juntl te kale. 40 Tucꞌil tnejel tal tman ẍneꞌl cxel tkꞌoꞌna jun cꞌoẍ arin tbanilxix, smoꞌmaj tucꞌil jun litr aseyt nneꞌl tiꞌj twitz tzeꞌ olivo, ex cbel tkoꞌna jun litr taꞌl twitz uva tibaj. 41 Oc tex kꞌij cxel tkꞌoꞌna juntl tal tman ẍneꞌl. Cxel tkꞌoꞌna oyaj arin ex taꞌl twitz uva tiꞌj, ic tzaꞌnx otok tbinchaya te prim. Cꞌoquel te jun oyaj patun in cub at tcꞌocꞌjal in chin tzalaje tiꞌj. 42 Tuj tcyakil tabkꞌiyil te jumajx, cucx che bel patit ke oyaj lu nwitze ttzi ja xbalun te mojbabl tibil jatum chin yolile cyucꞌile. 43 Axtzun chin tembile cyucꞌil aj Israel, ex cxjansetel lugar lu tuꞌn wajwalile. 44 Cxjansetel aju ja xbalun te mojbabl tibil wuꞌne, tucꞌix altar; ax icx cxjansetel Aarón wuꞌne cyucꞌix ke tcyꞌajal, tuꞌntzun cyoc te pal te weye. 45 Chin najaltzune cyxol aj Israel ex chin oquele te Cydios. 46 Cꞌeleltzun cynicꞌ tiꞌj, akine Cyman ex Cydios aju etz kꞌinte cye tuj Ejipt tuꞌntzun nnajane cyxol. Akine Cyman ex Cydios.