6 Aju cꞌajbel oc tbant capiẍay, atzun jlu: Kꞌan pwak, nokꞌ ẍkꞌilun queꞌyin, nokꞌ ẍjulin queꞌyin, nokꞌ cyak queꞌyin, ex nokꞌ lino chubemaj ttzeꞌyil; tbanilxix binchben te, 7 ex cabe takꞌal twi t-semil, akeju che ajbel tuꞌn cyoc mojbet cycabil pacꞌ ttxaꞌn capiẍay. 8 Aju cꞌalbil cꞌuꞌjbaj xiꞌyni tiꞌjxi capiẍay, tiklix tib tucꞌil ex ax tbanil binchben te. Cꞌajbel kꞌan pwak tiꞌj, tucꞌix nokꞌ ẍkꞌilun queꞌyin, nokꞌ ẍjulin queꞌyin, nokꞌ cyak queꞌyin, ex nokꞌ lino chubemaj ttzeꞌyil.

9 Kꞌintza cabe abj ónice, ex tzꞌiban oca cybi ke tcyꞌajal Israel cywitz, 10 kak biybaj twitz jun abj, ex kaktl biybaj twitz juntl, txolin tuꞌn cyten ic tzaꞌn cyul-len itzꞌj. 11 Tuꞌn jun xjal at tnabl tiꞌj, cꞌoquel cꞌochin tuꞌn cycyaj ten cybi tcyꞌajal Israel cywitz, ic tzaꞌn twitz jun sey. Che belextzun tkꞌoꞌna cyuj cykꞌukbil kꞌan pwak cytxꞌotxꞌil, 12 ex che oqueltzun tkꞌoꞌna cyiꞌj takꞌal capiẍay, jun twiꞌ jun t-semil ex jun twiꞌ juntl. Cyuꞌntzun ke abj lu, che tzajel naꞌt ke tcyꞌajal Israel. Che xeltzun tiꞌn Aarón cybi nwitze cywi t-semil, tuꞌn cytzaj naꞌt akine Cymane. 13 Binchama ke cykꞌukbil kꞌan pwak cytxꞌotxꞌil, 14 cyucꞌix cabe caden kꞌan pwak tbanilxix cytxꞌotxꞌil, xpaltxꞌiꞌn cyten, ex che bel tkꞌoꞌna ke caden lu cyiꞌjele ke cykꞌukbil.

15 Ax icx tbanil binchben te tal xbalun cꞌoquel ten ttzi t-xuꞌc Aarón tuꞌn t-xi tbinchaꞌn cyiꞌj xjal, ex ax nokꞌ che ajbel tuꞌna ic tzaꞌn tiꞌj capiẍay, atzun ke jlu: Kꞌan pwak, nokꞌ ẍkꞌilun queꞌyin, nokꞌ ẍjulin queꞌyin, nokꞌ cyak queꞌyin, ex lino chubemaj ttzeꞌyil. 16 Mejetzꞌin twitz ex junx cyjel tnukbil tucꞌil twitz; jun xcꞌachub tnukbil ex jun xcꞌachub twitz. 17 Che oquel tkꞌoꞌna cyaje txol tal abj tbanilxix tiꞌj. Tuj tnejel txol cꞌoquel tkꞌoꞌna jun tal abj sardio, jun topacio ex jun carbunclo. 18 Tuj tcabin txol cꞌoquel tkꞌoꞌna jun tal abj esmeralda, jun zafiro ex jun diamante. 19 Tuj toxin txol cꞌoquel tkꞌoꞌna jun tal abj jacinto, jun ágata ex jun amatista 20 ex tuj tcyajin txol cꞌoquel tkꞌoꞌna jun tal abj berilo, jun ónice ex jun jaspe. Cycyakil ke tal abj lu che belex tkꞌoꞌna cyuj cykꞌukbil kꞌan pwak cytxꞌotxꞌil. 21 Ax cyajlal tal abj cꞌoquel tkꞌoꞌna ic tzaꞌn cyajlal tcyꞌajal Israel, cablaj cybet. Ic tzaꞌn twitz jun sey cꞌoquel tzꞌibet tbi jun tcyꞌajal Israel twitz teyle junjun.

22 Binchama cabe caden kꞌan pwak tbanilxix cytxꞌotxꞌil ex xpaltxꞌiꞌn cyten, tuꞌn cyoc ten tiꞌj tal xbalun cꞌoquel ten ttzi t-xuꞌc. 23 Ax icx binchama cab argoy kꞌan pwak cytxꞌotxꞌil, ex che oquel tkꞌoꞌna cyiꞌj cycabil ttxaꞌn tal xbalun; 24 che oquex tkꞌoꞌna cycabil caden cyuj argoy kꞌan pwak cytxꞌotxꞌil che oquel ten cyiꞌj cycabil ttxaꞌn tal xbalun. 25 Che oquel tkꞌoꞌna cytxaꞌn cycabil caden cyibaj ke cykꞌukbil kꞌan pwak cytxꞌotxꞌil cyocsaꞌn cyiꞌj ke cabe twi t-semil, ttzi twitz capiẍay. 26 Binchan cubtla cab argoy kꞌan pwak cytxꞌotxꞌil ex che oquel tkꞌoꞌna cyiꞌj cycabil ttxaꞌn tal xbalun te tujxi, tibaj ttxaꞌn, junx tucꞌil capiẍay. 27 Binchama cabetl argoy kꞌan pwak cytxꞌotxꞌil, ex che oquel tkꞌoꞌna cyiꞌj ke cabe twi t-semil capiẍay te cubni, junx tucꞌil slapbil te ex chꞌin tibaj cꞌalbil tcꞌuꞌj capiẍay. 28 Tuꞌn jun cꞌalbil ẍkꞌilun queꞌyin, che oquel cꞌalet ke argoy cyoc tiꞌj tal xbalun cyucꞌil keju cyoc tiꞌj capiẍay, tuꞌntzun tcyaj ten tal xbalun tibaj cꞌalbil tcꞌuꞌj capiẍay, ex tuꞌn miꞌn tel tpaꞌn tib tal xbalun tiꞌj capiẍay. 29 Cyjaꞌtzun, oc tocx Aarón tuj Lugar Xjan, che oquex tiꞌn cybi ke tcyꞌajal Israel twitz tal xbalun cꞌoquel ten ttzi t-xuꞌc, tuꞌn t-xi tbinchaꞌn cyiꞌj xjal, tuꞌntzun cucx cytzaj naꞌt nwitze, akine Cymane. 30 Kꞌon cuꞌxa Urim ex Tumim tuj tal xbalun cꞌoquel ten ttzi t-xuꞌc Aarón tuꞌn t-xi tbinchaꞌn cyiꞌj xjal, tuꞌntzun cyxi tiꞌn Aarón ttzi t-xuꞌc oc tocx nwitze. Cyjaꞌtzun cucx che xel tiꞌn Aarón ttzi t-xuꞌc ke macbil che ajbel tuꞌn t-xi tbinchaꞌn cyiꞌj xjal nwitze, akine Cymane.

31 Binchama jun xbalun ẍkꞌilun queꞌyin, aju cꞌoquel tujxi capiẍay, 32 tucꞌix jun toyꞌ tuj tmij tuꞌn tjax twiꞌ tuj. Slapun cuba jun tkul ttziꞌyile toyꞌ lu, ic tzaꞌn cyten ke chicyet tzꞌuꞌm, tuꞌntzun miꞌn t-xi tzakj. 33 Ttxaꞌnile xbalun lu cꞌoquel tkꞌoꞌna tilbilal ẍokꞌ carnad ẍkꞌilun queꞌyin, ẍjulin queꞌyin ex cyak queꞌyin. Cyxoltzun ke jlu che oquex ten tal campan kꞌan pwak cytxꞌotxꞌil. 34 Jun tal campan kꞌan pwak ttxꞌotxꞌil ex jun ẍokꞌ carnad, juntl tal campan ex juntl ẍokꞌ carnad; iclex ctembil tcyakil ttxaꞌnile xbalun. 35 Cꞌoqueltzun tkꞌoꞌn Aarón tiꞌj tcyakil maj oc tajben tuj takꞌun te pal, tuꞌntzun cybinjtz tkꞌajkꞌajel ke campan oc tocx nwitze tuj ja xbalun, ax icx oc tetz, tuꞌntzun miꞌn tcyim.

36 Binchama jun tal tzꞌlom kꞌan pwak tbanilxix ttxꞌotxꞌil ex cꞌochin jatza ic tzaꞌn twitz jun sey, tuꞌn cycyaj ke yol lu twitz: XJANSAMAJ TE JLU TE KMAN. 37 Cꞌoquel tkꞌoꞌna tal tzꞌlom lu tibaj twitz tiꞌj cꞌalbil twiꞌ, ex cꞌoquel cꞌalet tuꞌn jun takꞌal ẍkꞌilun queꞌyin, 38 cyjaꞌtzun ax ctembil tibaj twitz Aarón. Che xel tikan Aarón cycyakil cyil aj Israel oc t-xi cykꞌoꞌn alcyexcu cyoyaj xjan. Acux in akꞌnan nwitze, ax ctembil tibaj twitz tuꞌntzun cycꞌmonte xtalbil wuꞌne. Akine Cymane.

39 Chmon cuꞌtza jun ẍjoꞌw tiꞌj nokꞌ lino, ex binchama jun cꞌalbil twiꞌ ax tiꞌj nokꞌ lino, ex jun cꞌalbil tcꞌuꞌj pitxin twitz. 40 Binchama cyẍjoꞌw ke tcyꞌajal Aarón cyucꞌix cꞌalbil cycꞌuꞌj ex cꞌalbil cywiꞌ, tuꞌn cyjaw nimsaꞌn ex tuꞌn mas baꞌn cyqueꞌyinjtz.

41 Che oqueltzun tkꞌoꞌna xbalun lu tiꞌj Aarón aju termaniya ex cyiꞌj ke tcyꞌajal, ex cbel tkoꞌna aseyt tibaj cywiꞌ, che elel tpaꞌna, ex che bajel t-xjansaꞌna, tuꞌntzun cyoc te pal te weye. 42 Ax icx binchama cycalsonsiy tiꞌj xbalun lino, tuꞌntzun ttxayit cycux. Cxel keꞌ cymij, ex cpol baj tiꞌj cycux. 43 Che oquel tiꞌj Aarón ex cyiꞌj ke tcyꞌajal oc cyocx tuj ja xbalun te mojbabl tibil, ex ka oc cyxi lakꞌeꞌ tiꞌj altar tuꞌn cyajben tuj Lugar Xjan, tuꞌntzun miꞌn cybinchante jun il ex tuꞌn miꞌn cycyim. A jlu jun ley cucx ctel te Aarón ex cye tiyjil che ul itzꞌj te tibajxi.