Aju altar kꞌan cꞌuxbil ttxꞌotxꞌil
27
Binchama jun altar tiꞌj tzeꞌ chꞌiꞌx acacia, jun var cyucꞌil cab xcꞌachub twaꞌl, cab var cyucꞌil cab xcꞌachub tnukbil, ex cab var cyucꞌil cab xcꞌachub twitz; junx cyjel echbil te twitz tucꞌil tnukbil. 2 Binchama cyaje tcach, jun tiꞌj teyle junjun tbutxꞌ, ax che elel tiꞌj altar, ex loꞌtzin oca kꞌan cꞌuxbil cyiꞌj. 3 Kꞌan cꞌuxbil cytxꞌotxꞌil cycyakil macbil teju altar: Ke tcubil tzaꞌj, ke jocbil tzaꞌj, ke lak matij, ke jacul twitz chibj ex ke tcubil xkꞌaꞌl. 4 Ax icx binchama jun cꞌuxbil ẍawcꞌin toyꞌ kꞌan cꞌuxbil ttxꞌotxꞌil, aju cbel ten tjakꞌ chojbil oc tcub patit, ex che oquel tkꞌoꞌna cyaje argoy kꞌan cꞌuxbil cytxꞌotxꞌil tiꞌj, jun tiꞌj teyle junjun tbutxꞌ. 5 Cbelex tkꞌoꞌna cꞌuxbil lu tuj tpeꞌnil altar tuꞌn tcyaj ten ax tuj tmij. 6 Ax icx binchama cabe tzeꞌ tolin cyiꞌj tiꞌj chꞌiꞌx acacia, tuꞌn cyajben tiꞌj altar, ex loꞌtzin oca kꞌan cꞌuxbil cyiꞌj. 7 Che elex tkꞌoꞌna ke tzeꞌ lu cyuj argoy oc t-xi tanut, jun tiꞌj jun pacꞌ ex jun tiꞌj juntl pacꞌ. 8 Tiꞌj tzꞌlom cbantel altar cyuꞌne, ex catl tuj tcꞌuꞌj, ic tzaꞌnx tzaj nyecꞌune teya twi witz.Aju ttxaꞌn tpeꞌn tja Dios
9 Binchama jun ttxaꞌn tpeꞌn ja xbalun. Tuj jun pacꞌ ttxaꞌn peꞌn lu tuj tumlal tnayaj kꞌij, che bel tkꞌoꞌna xbalun te peꞌn, binchamaj tiꞌj xbalun lino tbanil, chubemaj ttzeꞌyil. Aju pacꞌ lu, 50 var tnukbil. 10 Kꞌan cꞌuxbil cytxꞌotxꞌil ke winkin tkan ex ax kꞌan cꞌuxbil cytxꞌotxꞌil ke winkin tkꞌukbil tkan, ex sak pwak cytxꞌotxꞌil ke ganch ex ke argoy. 11 Ax icx 50 var tnukbil juntl pacꞌ ttxaꞌn peꞌn tuj tumlal tbankꞌab kꞌij, ex che bel tkꞌoꞌna xbalun te peꞌn. Winkin tkan ex winkin cykꞌukbil kꞌan cꞌuxbil cytxꞌotxꞌil, ex sak pwak cytxꞌotxꞌil ke ganch ex ke argoy. 12 Tuj juntl pacꞌ tuj tumlal telex kꞌij, ax cbel tkꞌoꞌna xbalun te peꞌn, cyucꞌix laj tkan ex laj cykꞌukbil. Aju pacꞌ lu, 25 var tnukbil. 13 Aju pacꞌ tuj tumlal tjawitz kꞌij ax te 25 var tnukbil. 14 Ttxlaj ttzi peꞌn jatum che oquex xjal, che bel tkꞌoꞌna xbalun te peꞌn tucꞌix ox tkan ex ox cykꞌukbil. Aju tnukbil ttxlaj lu, wuk var cyucꞌil cabe xcꞌachub. 15 Ax icx tuj juntl ttxlaj ttzi peꞌn, che bel tkꞌoꞌna xbalun te peꞌn tucꞌix ox tkan ex ox cykꞌukbil. Aju tnukbil ttxlaj lu, ax wuk var cyucꞌil cabe xcꞌachub. 16 Tuj ttzi peꞌn jatum che oquex xjal, cbel tkꞌoꞌna jun xbalun te makbil, binchamaj tuꞌn nokꞌ ẍkꞌilun queꞌyin, nokꞌ ẍjulin queꞌyin, nokꞌ cyak queꞌyin, ex lino chubemaj ttzeꞌyil, ex chmoꞌmaj ke twitz. Aju xbalun te makbil lu laj var tnukbil, ex che bel ten cyaje tkan ex cyaje cykꞌukbil tkan. 17 Sak pwak cytxꞌotxꞌil ke ganch ex ke argoy cyoc cyiꞌj cycyakil ke tkan che bel ten tiꞌjele peꞌn, ex kꞌan cꞌuxbil cytxꞌotxꞌil ke cykꞌukbil. 18 Te 50 var tnukbil peꞌn, te 25 var twitz tuj jun pacꞌ, icx tuj juntl pacꞌ ex te cab var cyucꞌil cab xcꞌachub twaꞌl. Aju xbalun te peꞌn binchamaj tiꞌj lino chubemaj ttzeꞌyil, ex kꞌan cꞌuxbil cytxꞌotxꞌil ke cykꞌukbil. 19 Kꞌan cꞌuxbil cytxꞌotxꞌil cycyakil ke macbil che ajbel tuj ja xbalun, ax icx cycyakil ke stac te ex ke stac che belex tiꞌjele peꞌn.
Aju aseyt tuꞌn tajben cyuj candil
20 Kꞌmanxa cye aj Israel tuꞌn ttzaj cyiꞌn tbanil aseyt, aju nneꞌl tiꞌj twitz tzeꞌ olivo, tuꞌntzun cucx tuꞌn cycꞌant ke candil. 21 Tuj tcwent Aarón ex tuj cycwent ke tcyꞌajal che cyjel ten ke candil, tuꞌntzun cycꞌant nwitze biꞌx oc ttzaj klolj ex ocxi tcub kꞌij. Che cꞌantel tetz tiꞌjtzi xbalun te makbil, aju tcub twitz cax te cꞌubl nleye tuj ja xbalun te mojbabl tibil, akine Cymane. A jlu jun ley cucx ctel cyxol aj Israel ex cyxol cyiyjil che ul itzꞌj te tibajxi.